ປີໃໝ່ຮ່ວມໃຈກັນປະຢັດ

ໂດຍ: ທິດ​ກໍ່າ

ເວົ້າເຖິງການປະຢັດມັດທະຍັດແມ່ນໜຶ່ງໃນມາດຕະການຂອງພັກ ແລະ ລັດຖະບານວາງອອກ. ຈຸດປະສົງ ເພື່ອໃຫ້ພວກເຮົາທຸກຄົນໄດ້ພ້ອມກັນຈັດຕັ້ງປະຕິບັດໃຫ້ມີໝາກຜົນ ນັບທັງເປັນການປູກຈິດສໍານຶກໃຫ້ທຸກຄົນ ມີລະບຽບວິໄນຕໍ່ການເຄື່ອນໄຫວດໍາລົງຊີວິດຢ່າງມີແບບແຜນ. ໃນຄໍາວ່າ ປະຢັດ ນັ້ນ, ມັນບໍ່ໝາຍ ເຖິງເນັ້ນໄປ ແຕ່ທາງການກິນ, ການຢູ່ ມັນຍັງມີການພົວພັນລາມໄປເຖິງການເຮັດການສ້າງ, ການທໍາມາຫາກິນ, ການດໍາລົງ ຊີວິດທີ່ມີແບບແຜນກະທັດຮັດເບົາບາງ ແລະ ປອດໃສຂາວສະອາດ.

ໃນໄລຍະຜ່ານມາ, ພວກເຮົາເຄີຍໄດ້ຍິນ ແລະ ໄດ້ຟັງຜູ້ນໍາເພິ່ນພາເວົ້າ ແລະ ທັງແນະນໍາສັ່ງສອນວ່າ: ພວກ ເຮົາໝົດທຸກຄົນໃນຊາດຕ້ອງຮ່ວມໃຈກັນປະຢັດ, ແຕ່ຜົນອອກມານັ້ນຂ້ອນຂ້າງໜ້ອຍ ແລະ ບໍ່ເປັນເອກະພາບ ກັນ. ເປັນຫຍັງຈຶ່ງວ່າແນວນັ້ນ ? ຍ້ອນວ່າຢືນຢູ່ໃນຖານະເສດຖະກິດ-ສັງຄົມພວກເຮົາກໍມີອັນແຕກຕ່າງ ແລະ ຫລຸດລື່ນກັນ, ດັ່ງຄໍາພັງເພີຍເຂົາວ່າ: “ຜູ້ໄດ້ກິນໆຈົນຮາກ ແຕ່ຜູ້ຢາກໆພໍຕາຍ” ສິ່ງທີ່ສະແດງອອກຢ່າງຈະແຈ້ງ ນັ້ນກໍຄືຍັງມີຜູ້ຮັ່ງ, ຜູ້ທຸກ, ຍັງມີຜູ້ເຫລືອຢູ່ເຫລືອກິນ, ມີຜູ້ອຶດຜູ້ຢາກ, ຜູ້ຫອດຜູ້ຫີວ, ມີການສໍ້ລາດບັງຫລວງ, ມີ ການໃຊ້ຈ່າຍຫລິ້ນກິນຟຸມເຟືອຍ, ມີການພົວພັນຄ້າຂາຍຢາເສບຕິດຢ່າງແຜ່ລາມ. ເວົ້າເຖິງຄວາມຮັບຜິດຊອບ ຕໍ່ໜ້າທີ່ຂອງພະນັກງານ-ລັດຖະກອນ ບາງບ່ອນກໍຍັງບໍ່ເຕັມມາດຕະຖານ, ການຮັບສະໝັກງານກໍມີການຊື້ຈ້າງ, ຫລິ້ນພັກຫລິ້ນພວກ, ຄົນເຈົ້າຄົນຂ້ອຍຄົນເພິ່ນຄົນໂຕ, ຍິ່ງໄປກວ່ານັ້ນ ໃນຖັນແຖວພະນັກງານທີ່ເປັນຫລັກ ແຫລ່ງແກນນໍາຢູ່ບາງກົມກອງທ້ອງຖິ່ນຮາກຖານຈໍານວນບໍ່ໜ້ອຍບໍ່ທັນເປັນແບບຢ່າງນໍາໜ້າທີ່ດີໃນການ ເຄື່ອນໄຫວປະຕິບັດໜ້າທີ່, ເຮັດອັນໃດລົງໄປກໍຕິດພັນກັບຜົນປະໂຫຍດຂອງຕົນເອງ ແລະ ພວກພ້ອງຕົວຢ່າງ: ໃນຊຸມປີຜ່ານມາແມ່ນພາກັນຄ້າໄມ້ຜິດກົດໝາຍ, ກະທໍາຜິດຕໍ່ວິໄນການເງິນ, ມີການລັກລອບນໍາເຂົ້າສິນຄ້າ ບໍ່ຖືກຕ້ອງ, ໜີພາສີ, ມີຊັບສິນຫລວງຫລາຍຜິດປົກກະຕິເກີນກວ່າອາຊີບ, ຖານະຕໍາແໜ່ງ ແລະ ຄວາມຮັບຜິດ ຊອບຂອງຕົນເອງ.

ຈາກປາກົດການທີ່ພົ້ນເດັ່ນ ແລະ ຄວາມເສຍຫາຍຂອງລັດຢ່າງຫລວງຫລາຍໃນໄລຍະຜ່ານມານັ້ນ, ລັດຖະ ບານຊຸດປັດຈຸບັນຈຶ່ງໄດ້ອອກມາດຕະການໃຫ້ພວກເຮົາຫັນເຂົ້າສູ່ການປະຢັດຢ່າງເຄັ່ງຄັດ ເຊິ່ງກ່ອນອື່ນແມ່ນໃນ ຂັ້ນແກນນໍາເພິ່ນລົງມືເຮັດກ່ອນ, ທໍາກ່ອນເພື່ອເປັນຕົ້ນແບບ ແລະ ແບບຢ່າງໃຫ້ພວກເຮົາທັງຫລາຍພ້ອມກັນ ຫລິ່ງເຫັນ ແລະ ປະຕິບັດຕາມໂດຍທົ່ວເຖິງກັນເຊັ່ນ: ພວກເພິ່ນໄດ້ສະຫລະເອົາລົດປະຈໍາຕໍາແໜ່ງທີ່ຫລູຫລາລາ ຄາແພງມາປະມູນອອກຂາຍເພື່ອນໍາເອົາເງິນເຂົ້າງົບປະມານຂອງລັດແລ້ວຫັນໄປຊື້ລົດທີ່ມີລາຄາເໝາະສົມມາ ແທນປະຈໍາຕໍາແໜ່ງ ແລະ ເພື່ອນໍາໃຊ້ເຂົ້າໃນການບໍລິຫານວຽກງານໃຫ້ມີປະສິດທິຜົນ. ນີ້ກໍຖືວ່າເປັນແບບຢ່າງ ແລະ ທັງເປັນການປະຢັດທີ່ດີເລີດ ເພື່ອພ້ອມກັນຫັນເຂົ້າສູ່ລະບຽບແບບແຜນ ແລະ ວິທີການເຮັດວຽກຢ່າງມີ ຜົນປະໂຫຍດສູງສຸດ.

ຕາມທິດກໍ່າຄິດ, ຄໍາວ່າປະຢັດນັ້ນບໍ່ໝາຍເຖິງໃຫ້ພວກເຮົາອົດຢູ່ອົດກິນ, ອົດໃຊ້ອົດຈ່າຍ, ແຕ່ມັນໝາຍເຖິງ ການນໍາໃຊ້ເວລາ, ນໍາໃຊ້ວັດຖຸ, ນໍາໃຊ້ຄົນ ແລະ ນໍາໃຊ້ເງິນເຂົ້າໃນການເຄື່ອນໄຫວດໍາລົງຊີວິດຢ່າງມີວິທະຍາສາດ, ທັງໄດ້ມາດຕະຖານ ແລະ ໃຫ້ເກີດຜົນປະໂຫຍດສູງສຸດ ອັນນັ້ນລະເຂົາເອີ້ນວ່າການປະຢັດ. ສະນັ້ນ ໂອກາດປີໃໝ່ ພສ 2560 ທີ່ຈະມາເຖິງນີ້ ໃຜຈະຄິດ, ຈະມັກໃນສິ່ງທີ່ຕົນເອງໄດ້ຕັ້ງເປົ້າເອົາໄວ້ນັ້ນກໍຂໍໃຫ້ທຸກສິ່ງທຸກຢ່າງເປັນ ໄປຕາມຄວາມມຸ້ງມາດປາດຖະໜາ, ແຕ່ສິ່ງສໍາຄັນນອກຈາກເພື່ອຕົນເອງແລ້ວກໍຕ້ອງເພື່ອໝູ່ເພື່ອເຮົາ, ເຫັນ ແກ່ປະເທດຊາດບ້ານເມືອງເປັນໃຫຍ່ນັ້ນເຂົາຈຶ່ງວ່າເຮົາປະຢັດຊັດທ່ຽງ.