ດ່ານພາສີສາກົນນ້ຳກັ່ນ ເກັບລາຍຮັບເກີນແຜນ 123,50%
ໃນໄລຍະ 10 ເດືອນຜ່ານມານີ້ ດ່ານພາສີສາກົນນ້ຳກັ່ນ ແຂວງຊຽງຂວາງ ສາມາດຈັດເກັບລາຍຮັບໄດ້ທັງໝົດ 51 ຕື້ກວ່າກີບ ເທົ່າກັບ 123,50% ຂອງແຜນການປີ, ຖ້າທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນເກືອບທົບເທົ່າ.
ຮອງຫົວໜ້າດ່ານພາສີດັ່ງກ່າວ ໃຫ້ຮູ້ວ່າ: ດ່ານພາສີສາກົນນ້ຳກັ່ນ ປະກອບມີ 3 ຈຸງານຄື: ຈຸງານບໍລິຫານ-ບັນຊີ-ຂັ້ນຕອນການແຈ້ງພາສີ, ຈຸງານຄຸ້ມຄອງສາງ-ກວດກາສິນຄ້າ, ຈຸງານຄຸ້ມຄອງພາຫະນະ-ຜູ້ໂດຍສານ, ດ້ານການຈັດຕັ້ງວຽກງານວິຊາສະເພາະເກັບລາຍຮັບເຂົ້າງົບປະມານໃນປີ 2017 ຕາມແຜນຈະໃຫ້ໄດ້ 42 ຕື້ກີບ, ແຕ່ຜ່ານການຈັດຕັ້ງປະຕິບັດພຽງ 10 ເດືອນ, ສາມາດຈັດເກັບລາຍຮັບເຂົ້າງົບປະມານໄດ້ທັງໝົດ 51,871 ຕື້ກວ່າກີບ ເທົ່າກັບ 123,50% ຂອງແຜນການປີ ສຳຄັນແມ່ນມີຄວາມໂປ່ງໃສ່ ຈິ່ງເຮັດໃຫ້ການຈັດເກັບລາຍຮັບເຂົ້າງົບປະມານແຫ່ງລັດໄດ້ລື່ນແຜນການປີວາງໄວ້.
ທ່ານ ຮອງຫົວໜ້າດ່ານພາສີສາກົນນ້ຳກັ່ນ ໃຫ້ຮູ້ອີກວ່າ: ຄຽງຄູ່ກັບຜົນງານທີ່ຍາດມາໄດ້ໃນຜ່ານມາ, ແຕ່ພາຍໃນດ່ານຍັງຈະຕ້ອງໄດ້ເອົາໃຈໃສ່ແກ້ໄຂບັນຫາຕ່າງໆໂດຍສະເພາະຈຸດກວດກາສິນຄ້າ, ຢູ່ສາງຂອງບໍລິສັດ ສຸວັນທອນການຄ້ານຳເຂົ້າ-ສົ່ງອອກ ເຊິ່ງມີຄວາມຫ່າງໄກຈາກດ່ານປະມານ 700-800 ແມັດ ພະນັກງານປະຈຳດ່ານບໍ່ພຽງພໍກັບຄວາມຮຽກຮ້ອງຕ້ອງ ການຂອງວຽກງານຕົວຈິງ.
