ທ່ານ ຮຸນເຊນ ທ້າອາເມລິກາ ຍົກເລີກການຊ່ວຍເຫລືອທັງໝົດ
ທ່ານ ຮຸນເຊນ ປະກາດວ່າ: “ກຳປູເຈຍບໍ່ຕາຍ” ຖ້າອາເມລິກາຈະຢຸດມອບການຊ່ວຍເຫລືອທັງໝົດ ທ່າມກາງການພົວພັນລະຫວ່າງສອງປະເທດທີ່ເຄັ່ງຕຶງຂຶ້ນ, ພາຍຫລັງສານສັ່ງຍຸບພັກແກນນຳຝ່າຍຄ້ານຂອງກຳປູເຈຍ.
ສຳນັກຂ່າວຕ່າງປະເທດລາຍງານຈາກນະຄອນຫລວງພະນົມເປັນ ປະເທດກຳປູເຈຍ ໃນວັນທີ 19 ພະຈິກວ່າ: ສຳນັກຂ່າວອອນລາຍ “ເຟສ ນິວ” ເຊິ່ງເປັນໜຶ່ງໃນສື່ກະບອກສຽງຂອງລັດຖະບານກຳປູເຈຍ ສະເໜີລາຍງານໂດຍອ້າງເປັນຄຳຖະແຫລງຂອງທ່ານ ຮຸນເຊນ ນາຍົກລັດຖະມົນຕີ ເຊິ່ງກ່າວລະຫວ່າງລົງພື້ນທີ່ພົບປະກັບພະນັກງານໂຮງງານຜະລິດເສື້ອຜ້າແຫ່ງໜຶ່ງ ໃນອາທິດຜ່ານມາວ່າ: ລັດຖະບານກຳປູເຈຍບໍ່ມີວັນໄດ້ຮັບຜົນກະທົບຈາກການຍົກເລີກການຊ່ວຍເຫລືອຂອງອາເມລິກາ ເພາະຝ່າຍທີ່ຈະເດືອດຮ້ອນຫລາຍທີ່ສຸດອາດເປັນກຸ່ມຄົນ ເຊິ່ງມີໜ້າທີ່ “ປົກປ້ອງ” ຜົນປະໂຫຍດຂອງອາເມລິກາເທົ່ານັ້ນ.
US Pulls Cambodia’s Election Funding; Hun Sen Says Cut It All https://t.co/xnDkbswIdw pic.twitter.com/dYxBZiYEqy
— The Voice of America (@VOANews) November 19, 2017
ຂະນະທີ່ຂໍ້ມູນກ່ຽວກັບງົບປະມານການຊ່ວຍເຫລືອຂອງລັດຖະບານວໍຊິງຕັນຕໍ່ກຳປູເຈຍຕາມຖານຂໍ້ມູນຂອງກະຊວງການຕ່າງປະເທດອາເມລິກາ ລະບຸວ່າ: ມີມູນຄ່າຫລາຍກວ່າ 77,6 ລ້ານໂດລາສະຫະລັດ ໃນປີ 2014 ໂດຍຄວບຄຸມບໍລິການພື້ນຖານທັງໃນດ້ານການສຶກສາ, ສາທາລະນະສຸກ, ເສດຖະກິດ ແລະ ການສະໜັບສະໜູນລະບົບບໍລິຫານລັດ.
