ພະຍາດປິດສະໜາ ຄ້າຍຄືໄຂ້ຫວັດໃຫຍ່ ມີຜູ້ເສຍຊີວິດເກືອບ 80 ຄົນຢູ່ຄອງໂກ ຕິດເຊື້ອອີກ 300 ຄົນ

      ກະຊວງສາທາລະນະສຸກຂອງຄອງໂກ ເປີດເຜີຍວ່າ: ມີຜູ້ເສຍຊີວິດຈາກພະຍາດທີ່ບໍ່ຮູ້ສາເຫດຢ່າງໜ້ອຍ 79 ຄົນ ເຊິ່ງສົ່ງຜົນເຮັດໃຫ້ເກີດອາການຄ້າຍຄືໄຂ້ຫວັດໃຫຍ່ ຢູ່ຕາເວັນຕົກສຽງໃຕ້ຂອງປະເທດ.

      ຜູ້ເສຍຊີວິດສ່ວນຫລາຍຈາກພະຍາດປິດສະໜາດັ່ງກ່າວມີອາຍຸລະຫວ່າງ 15-18 ປີ. ຂະນະທີ່ຜູ້ຕິດເຊື້ອອີກ 300 ກວ່າຄົນມີອາການໄຂ້, ເຈັບຫົວ, ນໍ້າມູກໄຫລ, ໄອ, ຫາຍໃຈລໍາບາກ ແລະ ເລືອດຈາງ.

      ປັດຈຸບັນ, ເຈົ້າໜ້າທີ່ຝ່າຍຕອບສະໜອງໄດ້ລົງພື້ນທີ່ສອບສວນຢູ່ແຂວງກວັງໂກ ຕັ້ງຢູ່ທາງຕາເວັນຕົກສຽງໃຕ້ຂອງປະເທດ ເຊິ່ງເປັນສູນກາງການລະບາດຂອງພະຍາດ ໂດຍສະເພາະຢູ່ເຂດສຸຂະພາບປານຊີ ເຊິ່ງເປັນເຂດຊົນນະບົດທີ່ພົບຜູ້ຕິດເຊື້ອຫລາຍທີ່ສຸດ.

       ສ່ວນອົງການອະນາໄມໂລກ (WHO) ປະຈໍາພາກພື້ນອາຟຣິກາ ສົ່ງເຈົ້າໜ້າທີ່ໄປເກັບຕົວຢ່າງ ແລະ ຈະເອົາໄປທົດລອງໃນຫ້ອງປະຕິບັດການ ເພື່ອຂະຫຍາຍຜົນຕໍ່ໄປ ທ່າມກາງຄວາມກັງວົນວ່າພະຍາດດັ່ງກ່າວອາດຊໍ້າຕື່ມວິກິດສາທາລະນະສຸກຂອງຄອງໂກ ເຊິ່ງກໍາລັງຕໍ່ສູ້ນໍາການລະບາດທີ່ຮຸນແຮງຂອງພະຍາດໝາກສຸກລີງ.

       ທັງນີ້, WHO ແນະນໍາໃຫ້ປະຊາຊົນຄວນຢູ່ໃນຄວາມສະຫງົບ ແລະ ເພີ່ມຄວາມລະມັດລະວັງໃນການດໍາລົງຊີວິດ ລວມທັງລ້າງມືດ້ວຍສະບູ, ຫລີກເວັ້ນການລວມຕົວ ແລະ ສໍາຜັດຜູ້ເສຍຊີວິດ ໂດຍປາສະຈາກບຸກຄະລາກອນທາງການແພດ.