ສານສູງສຸດອີຣັກຊີ້ການລົງປະຊາມະຕິ ຂອງຊາວເຄີດຂັດລັດຖະທຳມະນູນ
ສານສູງສຸດອີຣັກປະກາດໃນວັນທີ 20 ພະຈິກວ່າ: ການລົງປະຊາມະຕິແຍກຕົວເປັນເອກະລາດຂອງເຂດປົກຄອງຕົນເອງຊາວເຄີດທາງຕອນເໜືອຂອງອີຣັກເປັນການຂັດຕໍ່ລັດຖະທຳມະນູນ.
ຖະແຫລງການຂອງທາງການອີຣັກລະບຸວ່າ: ສານສູງສຸດມີຄຳຕັດສິນວ່າການລົງປະຊາມະຕິທີ່ຈັດຂຶ້ນໃນວັນທີ 25 ກັນຍາຜ່ານມາ ໃນເຂດປົກຄອງຕົນເອງເກີດິດສະຖານຂັດຕໍ່ລັດຖະທຳມະນູນ ແລະ ໃຫ້ຍົກເລີກຜົນການລົງປະຊາມະຕິທັງໝົດ.
ກ່ອນໜ້ານີ້, ສະພາຄວາມໝັ້ນຄົງແຫ່ງສະຫະປະຊາຊາດ ໄດ້ຮຽກຮ້ອງໃຫ້ລັດຖະບານອີຣັກ ແລະ ບັນດາຜູ້ນຳໃນເກີດິດສະຖານກຳນົດຂອບເວລາໃນການເຈລະຈາ ເພື່ອຢຸດວິກິດການທີ່ເກີດຂຶ້ນ, ພາຍຫລັງລັດຖະບານອີຣັກປະຕິເສດຂໍ້ສະເໜີຈາກບັນດາຜູ້ນຳຊາວເຄີດທີ່ຈະລະງັບຜົນການລົງປະຊາມະຕິໄວ້ ແລະ ເປີດການເຈລະຈາລະຫວ່າງກັນ ໂດຍນາຍົກລັດຖະມົນຕີ ໄຮເດີ ອັດ ອາບາດີ ພັດຮຽກຮ້ອງໃຫ້ປະກາດວ່າ: ຜົນການລົງປະຊາມະຕິເປັນໂມຂະ. ຫລ້າສຸດໃນອາທິດຜ່ານມາ, ບັນດາຜູ້ນຳຊາວເຄີດໄດ້ອອກມາປະກາດວ່າຈະເຄົາລົບການຕັດສິນຂອງສານສູງສຸດອີຣັກ. ເຖິງຢ່າງໃດກໍຕາມ, ມີລາຍງານວ່າ: ລັດຖະສະພາອີຣັກກຳລັງຢູ່ລະຫວ່າງການທົບທວນງົບປະມານສຳລັບປີທີ່ກຳລັງຈະມາເຖິງ ເຊິ່ງລວມທັງການຈັດສັນງົບປະມານໃຫ້ແກ່ເຂດປົກຄອງຕົນເອງຊາວເຄີດ.
