ວິທີກິນບຸບເຟ້ຊີ້ນດາດຢ່າງປອດໄພ
ອາຫານປະເພດຊີ້ນດາດ ຫລື ບຸບເຟ້ຊີ້ນດາດນັບມື້ນັບຈະຍິ່ງໄດ້ຮັບຄວາມນິຍົມສູງຂຶ້ນ ໂດຍສະເພາະຜູ້ທີ່ຮັກການກິນຊີ້ນສັດແລ້ວ ພຽງແຕ່ຍ່າງກາຍຍັງຕ້ອງງວາກກັບມາເບິ່ງ ແຕ່ທ່ານຮູ້ຫລືບໍ່ວ່າອາຫານປະເພດຊີ້ນດາດນັ້ນນອກຈາກຄວາມແຊບແລ້ວຍັງແຝງໄວ້ດ້ວຍຄວາມໜ້າຢ້ານສາລະພັດຖ້າ ບໍ່ຮູ້ຈັກກິນ ຫລື ກິນບໍ່ເປັນ ພະຍາດຮ້າຍທີ່ບໍ່ເພິງປະສົງອາດມາຢາມທ່ານໄດ້ເຊັ່ນກັນ.
ຊີ້ນສັດທີ່ເອົາມາບໍລິການໃນຮ້ານອາຫານປະເພດຊີ້ນດາດທັງຫລາຍສ່ວນຫລາຍເປັນຊີ້ນສັດທີ່ເຮົາລຶ້ງເຄີຍກັນດີ ເຊັ່ນ : ຊີ້ນໝູ ແລະ ເຄື່ອງໃນໝູ, ຊີ້ນໄກ່, ຊີ້ນງົວ, ໄສ້ກອກ, ລູກຊີ້ນຊະນິດຕ່າງໆ ແລະ ອາຫານທະເລ ເຊິ່ງອາຫານເຫລົ່ານີ້ມີສ່ວນປະກອບ ຂອງໂປຣຕິນ ແລະ ໄຂມັນເປັນຫລັກ ເຊິ່ງຖ້າເຮົາປີ້ງບໍ່ຖືກວິທີຈະສາມາດນຳອັນຕະລາຍທີ່ຄາດບໍ່ເຖິງມາສູ່ໂຕເຮົາໄດ້ເຊັ່ນກັນ ຖ້າ ຊີ້ນເຫລົ່ານັ້ນມີເຊື້ອພະຍາດ ຫລື ແມ່ພະຍາດຢູ່ແລ້ວເຮົາປີ້ງຊີ້ນສັດບໍ່ສຸກ ກໍປຽບດັ່ງເຮົາເປີດທາງສະດວກໃຫ້ເຊື້ອພະຍາດ ຫລື ແມ່ພະຍາດເຫລົ່ານັ້ນເຂົ້າສູ່ຮ່າງກາຍໄດ້ຢ່າງສະບາຍ ຫລື ຖ້າປີ້ງສຸກຈົນເກີນໄປ ຫລື ປີ້ງຈົນໄໝ້ ໄຂມັນໃນຊີ້ນສັດທີ່ຖືກເຜົາໄໝ້ຈະປ່ຽນສະພາບເປັນສານພິດໃນກຸ່ມໄພໂຣໄລເຊດ (Pyrolysates) ເຊິ່ງເປັນສານກໍ່ມະເຮັງໂດຍກົງ. ນອກຈາກນີ້, ອາຫານທະເລຈຳພວກປາໝຶກ ຫລື ປາທະເລຍັງມີສານຈຳພວກນີໂຕຣຊາມີນ ເຊິ່ງເປັນສານກໍ່ມະເຮັງເຊັ່ນກັນ ເຖິງວ່າຈະມີຈຳນວນບໍ່ຫລາຍກໍຕາມ.
ນອກຈາກຊີ້ນສັດ ຫລື ໄຂມັນສັດທີ່ໄໝ້ດຳຈະເປັນສານກໍ່ມະເຮັງໂດຍກົງແລ້ວ ໄຂມັນທີ່ຢອດລົງໄປຖືກຖ່ານໄຟຍັງກໍ່ໃຫ້ເກີດ ສານຈຳພວກ (Polycyclic Aromatic Hydrocarbon) ເຊິ່ງເປັນອັນຕະລາຍຫລາຍຄືກັນກັບຄັວນພິດຈາກທໍ່ອາຍເສຍຂອງ ລົດ ເຊິ່ງຖ້າເຮົາສືບດົມເຂົ້າໄປຫລາຍໆ ສານດັ່ງກ່າວຈະກາຍເປັນສານຕັ້ງຕົ້ນຂອງການເກີດມະເຮັງໄດ້.
+ ວິທີກິນອາຫານປະເພດຊີ້ນດາດຢ່າງປອດໄພນັ້ນກໍສາມາດເຮັດໄດ້ດ້ວຍວິທີຕ່າງໆດັ່ງນີ້ :
- ບໍ່ປີ້ງຊີ້ນສັດໃຫ້ສຸກໜ້ອຍ ຫລື ຫລາຍເກີນໄປຈົນໄໝ້ດຳ.
- ຫລີກເວັ້ນການກິນໄຂມັນສັດທີ່ໄໝ້ຈົນດຳ.
- ຫລີກເວັ້ນການສືບດົມເອົາຄັວນທີ່ເກີດຈາກການປີ້ງດາດ.
- ບໍ່ກິນອາຫານປະເພດຊີ້ນດາດເລື້ອຍເກີນໄປ.
- ເລືອກຮ້ານທີ່ສະອາດ ແລະ ມີລະບົບດູດຄັວນ.
- ຖ້າເປັນໄປໄດ້ ເລືອກໃຊ້ວິທີຕົ້ມຈະດີກ່ວາປີ້ງດາດ.
ພຽງເທົ່ານີ້ທ່ານກໍຈະຫລຸດຄວາມສ່ຽງສາລະພັດທີ່ມາຈາກການກິນອາຫານປະເພດຊີ້ນດາດຜິດວິທີໄດ້ແລ້ວ.
