ຄະນະນຳກະຊວງການຕ່າງປະເທດລົງຕິດຕາມ ແລະ ລົງຊຸກຍູ້ວຽກງານການຮ່ວມມືດ້ານມະນຸດສະທຳລະຫວ່າງລາວ-ອາເມລິກາ ຢູ່ແຂວງອຸດົມໄຊ
ໃນວັນທີ 18 ພະຈິກຜ່ານມານີ້, ທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີກະຊວງການຕ່າງປະເທດ, ພ້ອມດ້ວຍຄະນະ ໄດ້ເດີນທາງໄປຢ້ຽມຢາມການປະຕິບັດງານຮ່ວມ ລາວ-ອາເມລິກາ ຂອງວຽກງານສຳຫລວດ ແລະ ຂຸດຄົ້ນ ເພື່ອຊອກຫາຮ່ອງຮອຍ ແລະ ສິ່ງເສດເຫລືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ (MIA), ຄັ້ງທີ1 ປະຈຳສົກປີ 2017-2018 ຢູ່ແຂວງອຸດົມໄຊ ເພື່ອເປັນການລົງຕິດຕາມ ແລະ ຢ້ຽມຢາມການປະຕິບັດງານຂອງຄະນະວິຊາການຮ່ວມດັ່ງກ່າວ ໃນການປະຕິບັດວຽກງານມະນຸດສະທຳ, ເພື່ອເປັນການປະຕິບັດນະໂຍບາຍມະນຸດສະທຳອັນສະເໝີຕົ້ນສະເໝີປາຍຂອງພັກ ແລະ ລັດຖະບານເຮົາ ໃນການຮ່ວມມືເພື່ອແກ້ໄຂບັນຫາຜູ້ເສຍຊີວິດຂອງທະຫານອາເມລິກາໃນປາງສົງຄາມຢູ່ລາວ.
ໃນໂອກາດນີ້, ທ່ານຮອງລັດຖະມົນຕີກະຊວງການຕ່າງປະເທດ ກໍໄດ້ພົບປະ ແລະ ໂອ້ລົມກັບບັນດາພະນັກງານວິຊາການທີ່ເຮັດວຽກຕົວຈິງຢູ່ພາກສະໜາມຈາກກະຊວງການຕ່າງປະເທດ, ກະຊວງປ້ອງກັນປະເທດ ແລະ ອຳນາດການປົກຄອງທ້ອງຖິ່ນທີ່ຄ້າຍພັກເມືອງຮຸນ, ແຂວງອຸດົມໄຊ. ຈາກນັ້ນ ຄະນະຍັງໄດ້ເຄື່ອນໄຫວຢ້ຽມຢາມການປະຕິບັດງານຕົວຈິງຢູ່ຈຸດຂຸດຄົ້ນກໍລະນີ 1791, ບ້ານສີບຸນເຮືອງ, ເມືອງຮຸນ, ໂດຍໄດ້ຮັບຟັງການລາຍງານສະພາບການປະຕິບັດວຽກງານຢູ່ໃນຈຸດຂຸດຄົ້ນຈາກຫົວໜ້າພາກສະໜາມຂອງຝ່າຍລາວ ແລະ ຝ່າຍອາເມລິກາ, ເຫັນວ່າໄດ້ຮັບຜົນສຳເລັດໄປດ້ວຍດີ, ຍ້ອນພະນັກງານວິຊາການທັງສູນກາງ ແລະ ທ້ອງຖິ່ນ ພ້ອມດ້ວຍປະຊາຊົນທ້ອງຖິ່ນໄດ້ປະກອບສ່ວນຢ່າງຕັ້ງໜ້າ ແລະ ມີຄວາມເອົາໃຈໃສ່ຕໍ່ການປະຕິບັດໜ້າທີ່ວຽກງານຂອງຕົນເປັນຢ່າງດີ.
ຜ່ານການປະຕິບັດວຽກງານການສຳຫລວດ ແລະ ຂຸດຄົ້ນ, ໃນຫລາຍປີຜ່ານມາຈົນມາເຖິງປັດຈຸບັນທີມງານຮ່ວມລາວ-ອາເມລິການ ໄດ້ຄົ້ນພົບຊິ້ນສ່ວນຂອງທະຫານອາເມລິກາທີ່ເສຍຊີວິດໃນປາງສົງຄາມຢູ່ລາວມີຈຳນວນ 279 ກໍລະນີ, ຈາກຈຳນວນຜູ້ເສຍຫາຍສາບສູນທັງໝົດຢູ່ລາວ 573 ກໍລະນີ ແລະ ຍັງຈະສືບຕໍ່ຄົ້ນຫາອີກ 294 ກໍລະນີ. ແຜນການປະຕິບັດງານຮ່ວມໃນຄັ້ງທີ 2 ປະຈຳສົກປີ2017-2018 ຈະມີການສຳຫລວດ ແລະ ຂຸດຄົ້ນຢູ່ເຂດພາກກາງ, ໂດຍສະເພາະຢູ່ເມືອງບົວລະພາ, ແຂວງຄຳມ່ວນ.
