ນາຍົກລັດຖະມົນຕີອົດສະຕຣາລີກຽມຈະປະກາດລາອອກຈາກຕໍາແໜ່ງຫລັງຈາກເຈລະຈາຈັດຕັ້ງລັດຖະບານປະສົມ ບໍ່ສໍາເລັດ

ເວັບໄຊສໍານັກຂ່າວ CNN ລາຍງານວັນທີ 4 ມັງກອນ 2025ນີ້ ວ່າ: ທ່ານ ຄາ ເນຮໍາເມີ ນາຍົກລັດຖະມົນຕີອົດສະຕຣາລີ ປະກາດວ່າຈະລາອອກຈາກຕໍາແໜ່ງຜູ້ນໍາລັດຖະບານ ແລະ ຫົວໜ້າພັກໃນໄວໆນີ້ ຫລັງຈາກການເຈລະຈາເພື່ອຈັດຕັ້ງລັດຖະບານປະສົບບໍ່ສໍາເລັດ.

ທ່ານ ເນຮໍາເມີ ໄດ້ເຜີຍແຜ່ວີດີໂອໃນແພັດຟອມ X ວ່າ: ຫລັງຈາກການເຈລະຈາ ເພື່ອຈັດຕັ້ງລັດຖະບານປະສົມສິ້ນສຸດລົງ ພັກປະຊາຊົນ(OPV) ຂອງຕົນ ແລະ ພັກສັງຄົມປະຊາທິປະໄຕ ບໍ່ສາມາດຕົກລົງກັນໄດ້ໃນຫລາຍປະເດັນສໍາຄັນ ເພື່ອຈັດຕັ້ງລັດຖະບານ ເຮັດໃຫ້ຕົນຕັດສິນໃຈຈະກ້າວລົງຈາກຕໍາແໜ່ງນາຍົກລັດຖະມົນຕີ ແລະ ຫົວໜ້າພັກປະຊາຊົນ(OPV) ໃນໄວໆນີ້ ແລະ ຮັບຮອງວ່າ ການປ່ຽນຜ່ານຈະເປັນໄປຢ່າງຮຽບຮ້ອຍ.

ພ້ອມດຽວກັນ ປະທານາທິບໍດີ ອາເລັກຊານເດີ ຟານ ເດີ ເບວເລນ ຂອງອົດສະຕຣາລີ ກຽມຈັດຕັ້ງລັດຖະບານຊົ່ວຄາວ ແລະ ຮັກສາການນາຍົກລັດຖະມົນຕີ ຕໍ່ຈາກນີ້ໄປ.

ຕາມການລາຍງານຂອງຄະນະກໍາມາທິການເອີລົບໄດ້ລະບຸວ່າ ລັດຖະບານຊຸດຕໍ່ໄປຂອງອົດສະຕຣາລີຕ້ອງປະເຊີນກັບຄວາມທ້າທາຍໃນການປະຢັດເງິນປະມານ 18 – 24 ຕື້ຢູໂຣ. (18,000 ຫາ 24,000 ລ້ານຢູໂຣ).

ໃນຂະນະທີ່ເສດຖະກິດຂອງປະເທດອົດສະຕາລີ ຢູ່ໃນພາວະຖົດຖອຍມາເປັນເວລາ 2 ປີແລ້ວ ປະສົບບັນຫາການວ່າງງານເພີ່ມຂຶ້ນ ແລະ ປັດຈຸບັນມີການຂາດດຸນງົບປະມານຢູ່ທີ່ 3.7% ຂອງຜະລິດຕະພັນລວມພາຍໃນປະເທດ ເຊິ່ງສູງກວ່າຂີດຈໍາກັດຂອງສະຫະພາບເອີຣົບທີ່ 3%.