ຄວນໃຊ້ຊຸດກວດມື້ໃດຈຶ່ງຈະຮູ້ຜົນແນ່ນອນວ່າມີລູກ ?
ເມື່ອໃດຈຶ່ງຈະເໝາະສົມໃນການກວດການຖືພາ ? ເມື່ອມີການຕົກໄຂ່ ໄຂ່ຈະມີອາຍຸໃຫ້ເຊື້ອອະສຸຈິມາປະຕິສົນທິໄດ້ພຽງ 1 ມື້ ເທົ່ານັ້ນ ເມື່ອປະຕິສົນທິແລ້ວຈະແບ່ງໂຕ ແລະ ເດີນທາງມາຫາຜົ້ງມົດລູກ ຝັງໂຕເຂົ້າກັບເນື້ອເຍື່ອຜົ້ງມົດລູກໃນມື້ທີ 7 ຫລັງການປະຕິສົນທິ, ເມື່ອໂຕອ່ອນຝັງໂຕ ເຮົາຖືວ່າເລີ່ມຖືພາ ໂຕອ່ອນຈະເລີ່ມສ້າງຮໍໂມນ Beta HCG ເພື່ອກະຕຸ້ນໃຫ້ຮັງໄຂ່ສ້າງຮໍໂມນໂປຣເຈສເຕີໂຣນ ເຮັດໃຫ້ເນື້ອເຍື່ອມົດລູກສົມບູນຫລາຍຂຶ້ນ.
Beta HCG ຖືກສ້າງຂຶ້ນມາ ຈະເຂົ້າໄປໃນກະແສເລືອດ ຈະມີຄວາມເຂັ້ມຂຸ້ນຫລາຍຂຶ້ນເມື່ອອາຍຸການຖືພາຫລາຍຂຶ້ນ ແລະ ຈະຂັບຖ່າຍອອກມາທາງນຳ້ຍ່ຽວ.
ເຮົາໃຊ້ຮໍໂມນ Beta HCG ໃນການກວດການຖືພາ ໂດຍການເຈາະເລືອດ ນັບແຕ່ມື້ທີ 9 – 10 ຫລັງຈາກປະຕິສົນທິ ແລະ ກວດໂດຍການໃຊ້ຊຸດກວດນຳ້ຍ່ຽວ ນັບແຕ່ມື້ທີ 15 ເປັນຕົ້ນໄປ ຫລັງຈາກມື້ດັ່ງກ່າວ ຄວາມຈະແຈ້ງຈະຍິ່ງມີຫລາຍຂຶ້ນ.
ດັ່ງນັ້ນ, ຖ້າເຮົາຮູ້ມື້ຕົກໄຂ່ ຫລື ມື້ປະຕິສົນທິ ເຮົາກໍສາມາດຮູ້ວ່າ ຄວນຈະຖືພາໄດ້ເມື່ອໃດ. ໃນກໍລະນີທີ່ບໍ່ຮູ້ມື້ຕົກໄຂ່ ຮູ້ແຕ່ມື້ມີເພດສຳພັນເທື່ອສຸດທ້າຍ ກໍພໍຈະປະຍຸກໃຊ້ໄດ້ ຄື ເມື່ອມີເພດສຳພັນ ແລະ ເຊື້ອອະສຸຈິເຂົ້າໄປຫາປາກມົດລູກ ມັນອາດຈະມີຊີວິດລໍຖ້າປະຕິສົນທິໄດ້ດົນທີ່ສຸດ 5 ມື້ ໝາຍຄວາມວ່າ ຖ້າໄຂ່ຕົກພາຍໃນ 5 ມື້ ຫລັງການມີເພດສຳພັນ ຍັງມີໂອກາດຖືພາໄດ້ ຖ້າເກີນນັ້ນບໍ່ຄວນຈະມີການຖືພາ.
ດັ່ງນັ້ນ ຖ້າມີການຖືພາ ຄວນກວດເລືອດເປັນບວກຫລັງຈາກມີເພດສຳພັນເທື່ອສຸດທ້າຍ 15 ມື້ ຫລື ກວດນຳ້ຍ່ຽວເປັນບວກ ຫລັງຈາກມີເພດສຳພັນເທື່ອສຸດທ້າຍ 20 ມື້ຂຶ້ນໄປ ຖ້າກວດແລ້ວເປັນລົບແປວ່າບໍ່ຖືພາ ເຊັ່ນ : ບໍ່ຮູ້ມື້ຕົກໄຂ່, ມີເພດສຳພັນເທື່ອສຸດທ້າຍວັນ ທີ 1 ມັງກອນ, ໄຂ່ຕົກວັນທີ 1 – 5 ມັງກອນ ມີໂອກາດໄດ້ຮັບປະຕິສົນທິ, ໄຂ່ທີ່ຕົກວັນທີ 6 ມັງກອນ ຫລື ຫລັງຈາກນັ້ນບໍ່ຄວນໄດ້ຮັບການປະຕິສົນທິ. ດັ່ງນັ້ນ ຖ້າກວດເລືອດວັນທີ 15 ມັງກອນ ຫລື ກວດຍ່ຽວວັນທີ 20 ມັງກອນ ກໍຈະບອກໄດ້ເລີຍວ່າຖືພາ ຫລື ບໍ່ຖືພາ.
ສະຫລຸບແລ້ວ ການກວດນຳ້ຍ່ຽວເພື່ອການທົດລອງດ້ວຍຕົນເອງ ເປັນພຽງການທົດລອງໃນເບື້ອງຕົ້ນທີ່ຈະບອກວ່າຕົນເອງ ອາດຈະຖືພາຫລືບໍ່ ຖ້າໄດ້ຜົນບວກ ແຕ່ອາການຂອງເຮົາບໍ່ກົງກັບອາການທີ່ໜ້າຈະຖືພາ ຫລື ກົງກັນກໍຕາມ, ແຕ່ຜົນກວດແຕກຕ່າງອອກໄປກໍຄວນໄປພົບທ່ານໝໍທີ່ໃຊ້ວິທີກວດທີ່ແນ່ນອນຫລາຍຂຶ້ນ ເຊັ່ນ : ກວດເລືອດຫາລະດັບຮໍໂມນການຖືພາ ຫລື ການເອັກໂກ ເປັນຕົ້ນ.
