ຊາວປາແລັສຕິນທະຍອຍກັບຖິ່ນຖານຢູ່ພາກເໜືອກາຊາ ທ່າມກາງບັນຍາກາດສະຫງົບເສິກ

       ປະຊາຊົນຢູ່ພາກເໜືອຂອງເຂດກາຊາທະຍອຍເດີນທາງກັບຖິ່ນຖານໄດ້ເປັນຄັ້ງທໍາອິດຕາມເງື່ອນໄຂຂອງຂໍ້ຕົກລົງຢຸດຍິງຄັ້ງຫລ້າສຸດລະຫວ່າງອິດສະລາແອນກັບກຸ່ມຮາມັດ.

      ກະຊວງສາທາລະນະສຸກຂອງເຂດກາຊາ ເຊິ່ງຢູ່ພາຍໃຕ້ການບໍລິຫານຂອງກຸ່ມຮາມັດ ອອກຖະແຫລງການວ່າ: ຊາວປາແລັສຕິນຈໍານວນຫລາຍ ເຊິ່ງພັດຖິ່ນຖານອອກຈາກພາກເໜືອຂອງພື້ນທີ່ ໂດຍເປັນຜົນມາຈາກສົງຄາມລະຫວ່າງອິດສະລາແອນກັບກຸ່ມຮາມັດ ເຊິ່ງເລີ່ມຂຶ້ນວັນທີ 7 ຕຸລາ 2023 ທະຍອຍເດີນທາງກັບພູມລໍາເນົາໄດ້ເປັນຄັ້ງທໍາອິດ.

      ການເຄື່ອນໄຫວດັ່ງກ່າວເປັນໄປຕາມສ່ວນໜຶ່ງຂອງຂໍ້ຕົກລົງຢຸດຍິງຄັ້ງໃໝ່ລະຫວ່າງອິດສະລາແອນກັບກຸ່ມຮາມັດ ເຊິ່ງມີຜົນບັງຄັບໃຊ້ເປັນເວລາ 6 ອາທິດ ຫລື 42 ວັນ ນັບແຕ່ວັນທີ 19 ມັງກອນຜ່ານມາ, ແຕ່ມີອັນຕ້ອງຊັກຊ້າກວ່າກໍານົດ ເນື່ອງຈາກອິດສະລາແອນກ່າວວ່າ: ກຸ່ມຮາມັດຍັງບໍ່ໄດ້ປະຕິບັດຢ່າງເຄັ່ງຂັດຕາມຂໍ້ຕົກລົງຢຸດຍິງ.

      ເຖິງຢ່າງໃດກໍດີ, ທໍານຽບລັດຖະບານອິດສະລາແອນຂອງນາຍົກລັດຖະມົນຕີ ເບນຈາມິນ ເນທັນຢາຮູ ອອກຖະແຫລງການວ່າ: ກຸ່ມຮາມັດກຽມປ່ອຍຕົວປະກັນເພີ່ມອີກ 3 ຄົນ ໃນວັນທີ 30 ມັງກອນ ແລະ ອີກ 3 ຄົນໃນວັນທີ 1 ກຸມພາ.