42 ປີແຫ່ງການສ້າງສາ ແລະ ພັດທະນາ ສປປ ລາວ (ເນື່ອງໃນໂອກາດວັນຊາດທີ 2 ທັນວາຄົບຮອບ 42 ປີ 1975-2017)

ພາຍຫລັງປະເທດຊາດໄດ້ຮັບການປົດປ່ອຍຢ່າງສົມບູນ ແລະ ສະຖາປະນາເປັນ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975 ເປັນຕົ້ນມາ, ພັກປະຊາຊົນປະຕິວັດລາວ, ຊຶ່ງເປັນພັກກໍາອໍານາດໄດ້ນໍາພາການສ້າງສາປະເທດຊາດຕາມເສັ້ນທາງສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນາຖາວອນ ແລະ ກ້າວສູ່ສັງຄົມນິຍົມ. ພັກໄດ້ສຸມໃສ່ນໍາພາສ້າງຕັ້ງລະບົບການເມືອງ-ການປົກຄອງ ປະຊາທິປະໄຕປະຊາຊົນ ຕັ້ງແຕ່ຂັ້ນຮາກຖານຮອດສູນກາງໃນຂອບເຂດທົ່ວປະເທດ, ໄປຄຽງຄູ່ກັບການຈັດຕັ້ງນໍາພາທົ່ວປວງຊົນ ປະຕິບັດສອງໜ້າທີ່ຍຸດທະສາດ, ສາມາດປົກປັກຮັກສາໝາກຜົນຂອງການປະຕິວັດ, ອໍານາດອະທິປະໄຕ ແລະ ຜືນແຜນດິນອັນຄົບຖ້ວນຂອງຊາດໄວ້ໄດ້ຢ່າງໝັ້ນຄົງ, ຟື້ນຟູບູລະນະພື້ນຖານການຜະລິດ, ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ພ້ອມທັງກໍ່ສ້າງພື້ນຖານວັດຖຸເຕັກນິກ ແລະ ເສດຖະກິດ-ວັດທະນາທໍາຂອງຊາດກ້າວຂຶ້ນຕາມຈຸດໝາຍກໍານົດໄວ້.

ນັບແຕ່ພັກເຮົາໄດ້ດໍາເນີນນະໂຍບາຍປ່ຽນແປງໃໝ່ຮອບດ້ານທີ່ມີຫລັກການ ເລີ່ມແຕ່ປີ 1986 ເປັນຕົ້ນມາ, ເຖິງວ່າປະເທດເຮົາໄດ້ພົບຄວາມຫຍຸ້ງຍາກທ້າທາຍຫລາຍປະການກໍຕາມ, ແຕ່ເຮົາກໍສາມາດຍາດໄດ້ຜົນງານ ແລະ ໄຊຊະນະອັນໃຫຍ່ຫລວງເປັນປະຫວັດສາດຄື: ດ້ານເສດຖະກິດມີການຂະຫຍາຍຕົວຢ່າງຕໍ່ເນື່ອງ ແລະ ໄດ້ຮັບການພັດທະນາດີຂຶ້ນເປັນກ້າວໆ, ໃນໄລຍະ ປີ 1981-1985 ລວມຍອດຜະລິດຕະພັນພາຍໃນ (GDP) ສະເລ່ຍ 5,5%, ປີ 1986-1990 ຢູ່ໃນລະດັບ 4,5%, ປີ 1991-1995 ໃນລະດັບ 6,4%, ຊຸມປີ 1996-2000 ສະເລ່ຍ 6,2%, ປີ 2001-2005 ຢູ່ລະດັບ 6,2%, ປີ 2006-2010 ສະເລ່ຍ 7,9%, ປີ 2011-2014 ຢູ່ໃນລະດັບ 8% ແລະ ແຕ່ 2014 ມາຮອດປັດຈຸບັນຢູ່ໃນລະດັບ 7,5% ຕໍ່ປີ, ອັນໄດ້ສະແດງໃຫ້ເຫັນວ່າພື້ນຖານເສດຖະກິດສືບຕໍ່ພັດທະນາຢ່າງຕັ້ງໜ້າ ແລະ ໄປຕາມທິດຫັນເປັນອຸດສະຫະກໍາທັນສະໄໝເທື່ອລະກ້າວ, ຊີວິດການເປັນຢູ່ຂອງປະຊາຊົນນັບມື້ໄດ້ຮັບການປັບປຸງດີຂຶ້ນໃນແຕ່ລະໄລຍະ. ການພັດທະນາໃນຂະແໜງການຕ່າງໆກໍມີການປັບປຸງເສີມຂະຫຍາຍຢ່າງຕັ້ງໜ້າ, ຜົນຜະລິດກະສິກໍາ, ຫັດຖະກໍາ, ອຸດສະຫະກໍາປຸງແຕ່ງ, ການບໍລິການ ໄດ້ຮັບການພັດທະນາ ແລະ ຂະຫຍາຍຕົວດີສົມຄວນ ແລະ ນໍາໃຊ້ເຄື່ອງຈັກ ແລະ ກົນຈັກທັນສະໄໝເຂົ້າໃນຂະບວນການຜະລິດຢ່າງກວ້າງຂວາງ ແລະ ເປັນຂະບວນຟົດຟື້ນ, ທັງສອດຄ່ອງກັບກົນໄກເສດຖະກິດຕະຫລາດທີ່ມີການຄຸ້ມຄອງ ແລະ ດັດສົມຂອງລັດ. ດ້ານພື້ນຖານໂຄງລ່າງ ເປັນຕົ້ນ: ຖະໜົນຫົນທາງ, ໄຟຟ້າ, ນໍ້າປະປາ ກໍໄດ້ຮັບການປັບປຸງ ແລະ ກໍ່ສ້າງຢ່າງກວ້າງຂວາງໃນທົ່ວປະເທດ, ປັດຈຸບັນຕາໜ່າງເສັ້ນທາງໄດ້ເພີ່ມຂຶ້ນຫລາຍກວ່າ 46.000 ກິໂລແມັດ, ສາຍການບິນໄດ້ຮັບການຂະຫຍາຍການບໍລິການໄປສູ່ຫລາຍແຂວງ ແລະ ຫລາຍປະເທດ, ເສັ້ນທາງລົດໄຟລາວ-ຈີນ ກໍພວມຢູ່ໃນຂັ້ນຕອນການກໍ່ສ້າງ, ວຽກງານໄປສະນີ, ໂທລະຄົມມະນາຄົມ ໄດ້ຮັບການພັດທະນາທາງດ້ານປະລິມານ ແລະ ຄຸນນະພາບ ແລະ ຄວບຄຸມທົ່ວທຸກແຂວງຂອງປະເທດ, ວຽກງານພັດທະນາຊົນນະບົດ ແລະ ລືບລ້າງຄວາມທຸກຍາກໄດ້ມີຜົນສໍາເລັດເປັນກ້າວໆຢ່າງໜ້າພໍໃຈ, ວຽກງານການສຶກສາໄດ້ມີການເຕີບໃຫຍ່ຂະຫາຍຕົວນັບທັງດ້ານປະລິມານ ແລະ ຄຸນນະພາບ, ສະຖາບັນການສຶກສາ, ໂຮງຮຽນວິຊາຊີບທັງພາກລັດ ແລະ ເອກະຊົນໄດ້ເພີ່ມຂຶ້ນຈໍານວນຫລາຍ, ວຽກງານສາທາລະນະສຸກໄດ້ຮັບການປັບປຸງດ້ານຄຸນນະພາບ ແລະ ຂະຫຍາຍໄປສູ່ທ້ອງຖິ່ນຮາກຖານຫລາຍຂຶ້ນ, ເຮັດໃຫ້ປະຊາຊົນມີສຸຂະພາບແຂງແຮງ ແລະ ສາມາດປະກອບສ່ວນເຂົ້າໃນການພັດທະນາເສດຖະກິດ-ສັງຄົມ, ການພັດທະນາກໍາລັງແຮງງານໄດ້ມີຄຸນນະພາບດີຂຶ້ນ ແລະ ສາມາດຕອບສະໜອງຕໍ່ໂຄງປະກອບເສດຖະກິດຂອງຊາດໄດ້ເປັນຢ່າງດີ ແລະ ຂົງເຂດວຽກງານອື່ນໆກໍໄດ້ຮັບການພັດທະນາດີຂຶ້ນເຊັ່ນກັນ.

ໂດຍລວມແລ້ວ, ຕະຫລອດໄລຍະ 40 ກວ່າປີຜ່ານມາ, ພາຍໃຕ້ການນໍາພາຂອງພັກປະຊາຊົນປະຕິວັດລາວ, ລັດຖະບານ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ມີຄວາມຕັ້ງໜ້າໃນການວາງແຜນ ແລະ ຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມເປັນແຕ່ລະໄລຍະ ເພື່ອພາປະເທດຊາດຫລຸດ ພົ້ນອອກຈາກຄວາມທຸກຍາກ ແລະ ຄວາມດ້ອຍພັດທະນາ, ປະຊາຊົນລາວບັນ ດາເຜົ່າໄດ້ເຊີດຊູນ້ຳໃຈຮັກເຊື້ອແພງຊາດ, ຮັກລະບອບໃໝ່, ຄວາມສາມັກຄີ ປອງດອງເປັນປຶກແຜ່ນແໜ້ນໜາບຸກບືນທຳມາຫາກິນ ສ້າງຄວາມຢູ່ດີກິນດີໃຫ້ ແກ່ຕົນເອງ ແລະ ວົງສາຄະນາຍາດ ກໍຄືປະເທດຊາດອັນແສນຮັກ ແລະ ຫວງແຫນຂອງພວກເຮົາໃຫ້ຈະເລີນສີວິໄລ.