ຟີລິບປິນສັ່ງຫ້າມຈຳໜ່າຍ ວັກແຊງປ້ອງກັນໄຂ້ເລືອດອອກ

ຟີ​ລິບ​ປິນມີ​ຄຳ​ສັ່ງ​ໃຫ້​ບໍລິສັດຜະລິດ​ຢາ​ຂອງຝຣັ່ງຢຸດ​ຈຳໜ່າຍ, ​ແຈກ​ຢາຍ​ວັກ​ແຊງ​ປ້ອງ​ກັນ​ໄຂ້​ເລືອດ​ອອກ​ໂດຍ​​ເດັດຂາດ, ຫລັງ​ບໍລິສັດ​ອອກ​ມາ​ເຕືອນ​ວ່າ: ລິດ​ຂອງ​ວັກ​ແຊງ​ຊະນິດ​ນີ້​ອາດ​ເຮັດ​ໃຫ້​ຜູ້​ປ່ວຍ​ບາງ​ຄົນ​ມີ​ອາການ​ໜັກ​ຂຶ້ນກວ່າ​ເກົ່າ.

ຄຳ​ສັ່ງ​ຂອງ​ອົງການ​ອາຫານ ​ແລະ ຢາ​ຟີ​ລິບ​ປິນ ມີ​ຂຶ້ນພາຍຫລັງ​ລັດຖະບານ​ສັ່ງ​ຢຸດ​ໂຄງການ​ໃຫ້​ວັກ​ແຊງ​ປ້ອງ​ກັນ​ໄຂ້​ເລືອດ​ອອກ​ເດ​ງວາ​ເຊຍ​ແກ່​ເດັກ​ຫລາຍ​ແສນ​ຄົນ, ພາຍຫລັງ​ບໍລິສັດ​ຜະລິດ​ຢາ​ເປີດ​ເຜີຍ​ຜົນ​ການຄົ້ນພົບຫລ້າ​ສຸດ​ອອກ​ມາ. ນອກຈາກ​ຫ້າມຈຳໜ່າຍ, ​ແຈກ​ຢາຍ​ແລ້ວ ຍັງ​ສັ່ງ​ໃຫ້ ຊາ​ໂນ​ຟີ ລາຍ​ງານ​ຜົນ​ໂດຍ​ລະອຽດ​ວ່າ: ວັກ​ແຊງ​ເດ​ງວາ​ເຊຍ​ເປັນສາ​ເຫດການ​ຕາຍ ຫລື ​ເຮັດ​ໃຫ້​ຜູ້​ປ່ວຍ​ຄົນ​ໃດ​ມີ​ອາການ​ໜັກ​ຂຶ້ນ ຫລື ບໍ່. ທາງ​ດ້ານ​ເຈົ້າໜ້າ​ທີ່​ຂອງ​ບໍລິສັດ ຊາ​ໂນຟີ ​ໄດ້​ເປີດ​ເຜີຍ​ໃນ​ວັນ​ທີ 4 ທັນວາ​ວ່າ: ຍັງ​ບໍ່​ມີ​ລາຍ​ງານ​ການ​ເສຍ​ຊີວິດຈາກ​ວັກ​ແຊງ​ເດ​ງວາ​ເຊຍ​ແຕ່​ຢ່າງ​ໃດ, ​ເຖິງ​ວ່າ​ຈະ​ແຈກ​ຢາຍ​ໃຫ້​ເດັກ​ຟີ​ລິບ​ປິ​ນອາຍຸ​ແຕ່ 9 ປີ​ຂຶ້ນ​ໄປ​ແລ້ວ​ເກືອບ 734.000 ຄົນ​ກໍ​ຕາມ ​ແລະ ​ເດັກ​ເຫລົ່າ​ນີ້​ຕ່າງ​ໄດ້​ຮັບ​ວັກ​ແຊງ​ຢ່າງ​ໜ້ອຍ​ຄົນ​ລະ 1 ​ໂດ​ສຕາມ​ໂຄງການ​ຂອງ​ລັດຖະບານ ​ເຊິ່ງມີ​ມູນ​ຄ່າ​ປະມານ 3.500 ລ້ານ​ເປ​ໂຊ.

​ເດ​ງວາ​ເຊຍ​ເປັນ​ວັກ​ແຊງ​ປ້ອງ​ກັນ​ໄຂ້​ເລືອດ​ອອກ​ໂຕ​ທຳ​ອິດ​ທີ່​ໄດ້​ຮັບ​ການ​ຮັບຮອງ​ຢ່າງ​ເປັນ​ທາງ​ການ. ຊາ​ໂນ​ຟີ​ຄາດ​ວ່າ: ວັກ​ແຊງ​​ເດ​ງວາ​ເຊຍ​ສ້າງ​ລາຍ​ຮັບ​ໃຫ້​ແກ່​ບໍລິສັດ​ໄດ້​ເຖິງ​ເກືອບ​ປີ​ລະ 1 ພັນ​ລ້ານ​ໂດ​ລາ​ສະຫະລັດ. ດ້ານ​ອົງການ​ອະນາ​ໄມ​ໂລກ​ລະບຸ​ໃນ​ວັນ​ທີ 4 ທັນວາ​ວ່າ: ຈະ​ທົບ​ທວນ​ຂໍ້​ມູນ​ດ້ານ​ຄວາມ​ປອດ​ໄພ​ຂອງ​ວັກ​ແຊງ​ປ້ອງ​ກັນ​ໄຂ້​ເລືອດ​ອອກ​ຂອງ​ຊາ​ໂນ​ຟີ​ພາຍ​ໃນ​ເດືອນ​ນີ້​ວ່າ: ຈະ​ມີ​ຄວາມ​ສ່ຽງ​ເພີ່ມ​ຂຶ້ນສຳລັບ​ຜູ້​ທີ່ບໍ່​ເຄີຍ​ສຳຜັດ​ກັບ​ເຊື້ອ​ໄວຣັສ​ໄຂ້​ເລືອດ​ອອກ​ມາ​ກ່ອນ​ໄດ້​ຮັບ​ວັກ​ແຊງ​ເດ​ງວາ​ເຊຍ ຫລື ບໍ່.

error: Alert: Content is protected !!