ລາວໄດ້ 2 ຫຼຽນເງິນລະດັບອາຊຽນຈາກອົງກອນຜູ້ໃຊ້ເຄື່ອງໄອຊີທີ
ໃນວັນທີ 6 ທັນວານີ້, ສະມາຄົມເພື່ອຄົນໂອທິສຕິກ ໄດ້ຖະແຫຼ່ງໃຫ້ຮູ້ວ່າ: ເມື່ອທ້າຍເດືອນພະຈິກຜ່ານມາ, ແອັບເວົ້າພາສາລາວຂອງຄົນໂອທິສຕິກໄດ້ຮັບ 2 ລາງວັນຊະນະເລີດລະດັບອາຊຽນ ຈາກອົງກອນຜູ້ໃຊ້ເຄື່ອງໄອຊີທີ ຄື: ລາງວັນອຸດສາຫະກໍາດ້ານຄອມພິວເຕີຂອງພາກພື້ນອາຊີ ແລະ ໂອເຊອານີ ແລະ ລາງວັນງານປະກວດລາວໄອຊີທີ ທີ່ກະຊວງໄປສະນີໂທລະຄົມມະນາຄົມ ແລະ ການສື່ສານ. ສໍາລັບຜູ້ຕາງໜ້າໃຫ້ສະມາຄົມເພື່ອຄົນໂອທິສຕິກໄປຮ່ວມແຂ່ງຂັນໃນລາຍການອາຊຽນໄອຊີທີອາວອດ (ASEAN ICT Awards) ຄັ້ງນີ້ ມີ: ທ້າວ ທະວີສຸກ ດວງມາລາ ທູດເດັກໂອທິສຕິກ, ທ່ານນາງ ມິສຸດາ ເຮືອງສຸກຄູນ ຜູ້ປະສານໂຄງການພັດທະນາແອັບເວົ້າພາສາລາວຂອງຄົນໂອທິສຕິກ ແລະ ທ່ານນາງ ຊາລອນ ກໍເທິນ ຜູ້ຊ່ຽວຊານການສຶກສາພິເສດ. ຜົນຂອງການແຂ່ງຂັນປະກົດວ່າທີມລາວໄດ້ຮັບລາງວັນ ຫຼຽນເງິນໃນຂົງເຂດວຽກງານຮັບຜິດຊອບຕໍ່ສັງຄົມໃຫ້ແກ່ສະມາຄົມເພື່ອຄົນໂອທີສຕິກ ທີ່ແຂວງຊຽມລຽບ ປະເທດກຳປູເຈຍ.
ການໄດ້ຮັບລາງວັນຄັ້ງນີ້, ສະແດງເຖິງຄວາມສໍາຄັນຂອງວຽກງານພັດທະນາຄົນພິການ, ໂດຍສະເພາະ ການສົ່ງເສີມໃຫ້ບຸກຄົນໂອທິສຕິກສາມາດສື່ສານຄວາມຮູ້ສຶກນຶກຄິດ ແລະ ຄວາມຕ້ອງການຂອງພວກເຂົາໄດ້. ສໍາລັບແອັບພາສາລາວຂອງຄົນໂອທິສຕິກເປັນເຄື່ອງມືສື່ສານທຳອິດທີ່ສ້າງຂຶ້ນຢູ່ປະເທດລາວ ແລະ ໂດຍແມ່ນບໍລິສັດ ລາວໄອທີເດັບ ເປັນຜູ້ສ້າງແອັບພຣີເຄເຊິນ, ຊຶ່ງອອກແບບນຳໃຊ້ກັບໂທລະສັບມືຖື ແລະ ແທັບເລັດ, ໃນນັ້ນຈັດເກັບເປັນ 12 ໝວດ ແລະ 1500 ຄຳສັບ, ພ້ອມອໍານວຍຄວາມສະດວກ ໃຫ້ຄົນພິການທີ່ມີຄວາມຫຍຸ້ງຍາກໃນການປາກເວົ້າໃຫ້ສາມາດສື່ສານໄດ້ ໂດຍນຳໃຊ້ການປະສົມປະສານກັນລະຫວ່າງຄຳສັບພາສາລາວ ແລະ ປະກອບຮູບພາບສຽງເວົ້າ.
