ລັດຖະບານລາວປະດັບຫລຽນໄຊໃຫ້ສະພາບັນດິດວິທະຍາສາດຫວຽດນາມ
ໃນວັນທີ 6 ທັນວານີ້, ລັດຖະບານລາວໄດ້ປະດັບຫລຽນໄຊ ແລະ ຫລຽນກາມິດຕະພາບໃຫ້ສະພາບັນດິດວິທະຍາສາດ ແລະ ເຕັກໂນໂລຊີແຫ່ງ ສສ ຫວຽດນາມ, ຊຶ່ງຕາງໜ້າປະດັບໂດຍທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ທັງເປັນປະທານສະພາບັນດິດວິທະຍາສາດ ແລະ ເຕັກໂນໂລຊີແຫ່ງຊາດລາວ ແລະ ຮັບໂດຍທ່ານ ເຈົາວັນມິງ ປະທານສະພາບັນດິດວິທະຍາສາດ ແລະ ເຕັກໂນໂລຊີແຫ່ງ ສສ ຫວຽດນາມ ແລະ ຫລຽນກາມິດຕະພາບມີຫົວໜ້າສະຖາບັນທໍລະນີວິທະຍາ, ຫົວໜ້າກົມຮ່ວມມືສາກົນ, ຫົວໜ້າສະຖາບັນພູມສາດ, ຫົວໜ້າສູນພັດທະນາເຕັກໂນໂລຊີລະດັບສູງ ຂອງສະພາບັນດິດວິທະຍາສາດ ແລະ ເຕັກໂນໂລຊີ ແຫ່ງ ສສ ຫວຽດນາມ. ເພື່ອເປັນການຍ້ອງຍໍຜູ້ທີ່ມີຜົນງານ, ຄຸນງາມຄວາມດີປະກອບສ່ວນເຫື່ອແຮງ, ສະຕິປັນຍາ ເຂົ້າໃນການຈັດຕັ້ງປະຕິບັດໂຄງການຊ່ວຍເຫລືອດ້ານອຸປະກອນ ແລະ ທຶນຮອນໃຫ້ແກ່ການຄົ້ນຄວ້າວິທະຍາສາດແຫ່ງຊາດລາວໃນໄລຍະຜ່ານມາ, ຊຶ່ງຜົນງານດັ່ງກ່າວເປັນການປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມໃຫ້ແໜ້ນແຟ້ນຍິ່ງຂຶ້ນ.
