ຄົນສະຫລາດຍ່ອມບໍ່ເຄີຍຄິດວ່າຄົນອື່ນໂງ່
ຄົນສະຫລາດຍ່ອມບໍ່ເຄີຍຄິດວ່າຄົນອື່ນໂງ ແລະ ຄົນໂງ່ມັກຄິດວ່າຕົນເອງສະຫລາດ, ຄົນທີ່ດູຖູກຄົນອື່ນວ່າໂງ່ ບາງເທື່ອໂຕເອງອາດໂງ່ຍິ່ງກ່ວາ ແລະ ມີແຕ່ບຸກຄົນປະເພດນີ້ເທົ່ານັ້ນທີ່ມັກຖືກຜູ້ອື່ນຫລອກລວງຢູ່ສະເໝີ.
ສິ່ງທີ່ເຮົາບໍ່ມັກ ບາງເທ່ືອເຮົາກໍຈຳເປັນຕ້ອງຮູ້ ຢ່າປິດກັ້ນໂຕເອງໃຫ້ຫ່າງໄກອອກຈາກສິ່ງທີ່ບໍ່ມັກນັ້ນເລີຍ ເພາະໃນໂລກນີ້ສິ່ງທີ່ທຳຮ້າຍເຮົາໄດ້ງ່າຍທີ່ສຸດກໍແມ່ນສິ່ງທີ່ເຮົາບໍ່ຍອມຮັບ ແລະ ບໍ່ເຄີຍເຂົ້າໃຈ.
ຊີວິດເປັນຂອງເຮົາ ທາງເດີນຊີວິດຍ່ອມເປັນຂອງເຮົາ ສອງຂາຂອງເຮົາຈົ່ງກ້າວໄປຕາມທາງນັ້ນ ເຮັດໃນສິ່ງທີ່ເຮົາຊຳນານ ແລະ ເຂົ້າໃຈ ເຮົາຈະໄປໄດ້ດີເທົ່າທີ່ເຮົາຄວນຈະໄປ ຫາກຢາກຈະຖາມຫາຄວາມຈິງໃຈຈາກໃຜຕໍ່ໃຜ ຕ້ອງເລີ່ມຖາມຫາຈາກໂຕເຮົາເອງກ່ອນວ່າມີຄວາມຈິງໃຈພຽງພໍຫລືບໍ່.
ຊີວິດບໍ່ເຄີຍມີຄຳວ່າສວາຍເກີນໄປ ຫາກກ້າວຫລົງຍ່າງທາງຜິດຍ່ອມກັບມາເລີ່ມຕົ້ນໃໝ່ໄດ້ ອາດຈະຊ້າກ່ວາທີ່ຄວນຈະເປັນ ໄປ ແຕ່ກໍຍັງດີກ່ວາຈົມເລິກລົງໄປໃນຄວາມຜິດພາດນັ້ນ.
ຢ່າພະຍາຍາມຍັດຍຽດຄວາມສຸກ ຫລື ສິ່ງທີ່ເຮົາຄິດວ່າດີໃຫ້ໃຜຕໍ່ໃຜ ເພາະມັນອາດຈະກາຍເປັນຄວາມທຸກ ທຸກທັງຜູ້ໃຫ້ ແລະ ທຸກທັງຜູ້ຮັບ.
ເຄີຍຖາມໂຕເອງບໍ່ວ່າຊີວິດຕ້ອງການຫຍັງ ? ຖາມ ແລະ ຫາຄຳຕອບໃຫ້ແນ່ໃຈ ແລະ ເຂົ້າໃຈໃຫ້ເລິກເຊິ່ງ ເມື່ອນັ້ນເຮົາຈະກ້າວຕໍ່ໄປຂ້າງໜ້າຢ່າງເຊື່ອໝັ້ນ ແລະ ຖືກທິດທາງກ່ວາເກົ່າ ໂລກເຮົາຍັງຄົງໝູນໄປທຸກມື້ ຫາກມື້ນີ້ເຮົາຢຸດນິ້ງ ມື້ອື່ນເຮົາກໍເກືອບຈະແລ່ນນຳມັນບໍ່ທັນ.
ຊີວິດທີ່ມີຄຸນຄ່າ ແມ່ນການໃຊ້ເວລາທີ່ມີຢູ່ຢ່າງກຸ້ມຄ່າ ຢ່າປ່ອຍໃຫ້ວັນເວລາຜ່ານໄປຢ່າງໄຮ້ປະໂຫຍດເລີຍ ມາເລີ່ມຕົ້ນສ້າງສັນສິ່ງດີໆໃຫ້ກັບຊີວິດຂອງເຮົາຖ້ອນ ຢ່າໄປຄິດວ່າຄົນທີ່ນັ່ງຢູ່ໃນຮົ່ມໄມ້ຢ້ານແສງແດດ, ຢ່າໄປຄິດວ່າຄົນທີ່ເຊືອບຫລັບຢູ່ນັ້ນເປັນຄົນກຽດຄ້ານ, ຢ່າໄປຄິດວ່າຄົນທີ່ຍ່າງລົ້ມເປັນຄົນອ່ອນແອ ຈົ່ງຢ່າໃຊ້ເຫດຜົນຂອງໂຕເອງຕັດສິນຄວາມໝາຍໃນສິ່ງທີ່ເຫັນ ໂດຍທີ່ບໍ່ຮັບຟັງເຫດຜົນຈາກອີກຝ່າຍໃຫ້ດີສາກ່ອນ.
