ທ່ານ ປູຕິນ ເຫັນພ້ອມຕໍ່ແຜນຢຸດຍິງ 30 ວັນຢູ່ອູແກຣນ ຊີ້ຄວນນໍາໄປສູ່ສັນຕິພາບທີ່ຍືນຍົງ
ປະທານາທິບໍດີ ວະລາດິເມຍ ປູຕິນ ຂອງຣັດເຊຍ ຖະແຫລງຂ່າວຢູ່ນະຄອນຫລວງມົດສະກູໃນວັນທີ 13 ມີນາ ໂດຍສະແດງທ່າທີຕໍ່ຂໍ້ສະເໜີຢຸດຍິງ 30 ວັນ ທີ່ອູແກຣນຕອບຮັບເມື່ອຕົ້ນອາທິດຜ່ານມາ ພາຍຫລັງການເຈລະຈາກັບອາເມລິກາ.
ໂດຍທ່ານ ປູຕິນ ກ່າວວ່າ: ທ່ານສະໜັບສະໜູນແນວຄິດນີ້, ແຕ່ຍັງມີຄໍາຖາມທີ່ຈໍາເປັນຕ້ອງຫາລື.
“ການຢຸດຍິງຄວນນໍາໄປສູ່ ສັນຕິພາບທີ່ຍືນຍົງ ແລະ ແກ້ໄຂສາເຫດຕົ້ນຕໍຂອງວິກິດນີ້, ພວກເຮົາຈໍາເປັນຕ້ອງເຈລະຈາກັບເພື່ອນຮ່ວມງານ ແລະ ຫຸ້ນສ່ວນຊາວອາເມລິກາ, ບາງເທື່ອຂ້າພະເຈົ້າຈະໂທຫາທ່ານ ໂດນັລ ທຣໍາ” ທ່ານກ່າວ.
ຂະນະທີ່ທ່ານ ປູຕິນ ເບິ່ງວ່າການບັນລຸຂໍ້ຕົກລົງຢຸດຍິງ 30 ວັນຈະເປັນເລື່ອງດີສໍາລັບຝ່າຍອູແກຣນ ແລະ ຣັດເຊຍສະໜັບສະໜູນຂໍ້ຕົກລົງນີ້, ແຕ່ຍັງມີລາຍລະອຽດຈໍານວນຫລາຍທີ່ຕ້ອງເຈລະຈາ, ພ້ອມຕັ້ງຄໍາຖາມຫລາຍຢ່າງເຊັ່ນ:
“30 ວັນດັ່ງກ່າວຈະຖືກໃຊ້ໄປແນວໃດ, ອູແກຣນຈະລະດົມພົນ, ເພີ່ມກໍາລັງ, ຝຶກແອບ ຫລື ອາດຈະບໍ່ ຄໍາຖາມຄື ຈະຄວບຄຸມເລື່ອງນີ້ໄດ້ແນວໃດ”.
“ໃຜຈະເປັນຜູ້ອອກຄໍາສັ່ງໃຫ້ຢຸດການສູ້ຮົບ ຕ້ອງແລກມາດ້ວຍຫຍັງ ໃຜຈະເປັນຜູ້ຕັດສິນວ່າ ໃຜທີ່ເປັນຝ່າຍທໍາລາຍການຢຸດຍິງທີ່ອາດເກີດຂຶ້ນໃນເຂດຊາຍແດນໄລຍະທາງກວ່າ 2,000 ກິໂລແມັດ. ຄໍາຖາມເຫລົ່ານີ້ຕ້ອງອາໄສການເຮັດວຽກຢ່າງລະອຽດອ່ອນຈາກສອງຝ່າຍ” ທ່ານ ປູຕິນ ກ່າວ.
ສ່ວນປະທານາທິບໍດີ ໂວໂລດິເມຍ ເຊເລນສກີ ຂອງອູແກຣນ ຖະແຫລງຜ່ານວິດີໂອວ່າ: ທ່ານ ປູຕິນ ບໍ່ໄດ້ປະຕິເສດໂດຍກົງ, ແຕ່ໃນທາງປະຕິບັດ ທ່ານກໍາລັງກຽມຈະປະຕິເສດ.
ອ້າງອີງ:
- https://www.bbc.com/news/articles/cp8l00l4rejo
- https://edition.cnn.com/2025/03/13/europe/russia-us-ceasefire-talks-intl/index.html
