ຄວາມ​ໜາວ​ມາ​ຄຸກ​ຄາມ​ອີ​ກ​ແລ້ວ

- 25394769 2002456436746999 4307380847113061759 o - ຄວາມ​ໜາວ​ມາ​ຄຸກ​ຄາມ​ອີ​ກ​ແລ້ວ
- Untitled design - ຄວາມ​ໜາວ​ມາ​ຄຸກ​ຄາມ​ອີ​ກ​ແລ້ວ

ສະພາບ​ຄວາມ​ໜາວ​ເຢັນ​ສົ່ງ​ທ້າຍ​ປີ​ເກົ່າ 2017 ຕ້ອນຮັບ​ປີ​ໃໝ່ 2018 ​ໄດ້​ຄຸກ​ຄາມ​ຊາວ​ລາວ​ເຮົາ​ບໍ່ໜ້ອຍ. ຈຸດ​ໜັກ​ກໍແມ່ນ​ແຖວ​ແຂວງ​ພາກ​ເໜືອ​ຄື: ​ແຂວງ​ຜົ້ງສາລີ, ຊຳ​ເໜືອ, ຊຽງ​ຂວາງ, ​ໄຊ​ສົມບູນ ​ແລະ ປາກ​ຊ່ອງ​ບໍລິ​ເວນ​, ເພາະ​ ​ເປັນ​ເຂດ​ພູ​ດອຍ. ສະ​ເພາະ​ແຂວງ​ໄຊ​ສົມບູນ​ເຂດ​ເມືອງ​ອານຸວົງ, ​ເມືອງ​ລ່ອງ​ແຈ້ງ​ປີ​ກ່ອນໆ​ນັ້ນ, ທິດ​ກ່ຳ ​ເຄີຍ​ໄປ​ເຮັດ​ວຽກ​ຖ້າ​ອຸນຫະພູມ​ຢູ່​ວຽງ​ຈັນ​ໃນ​ລະດັບ 30 – 35 ອົງສາ​ຢູ່​ເຂດ​ດັ່ງກ່າວ​ກໍຈະ​ຢູ່​ໃນ​ລະດັບ 20 ຫາ 25 ອົງສາ​, ແຕ່​ສະ​ເພາະ​ປີ​ນີ້​ອາດ​ໜາວ​ກວ່າ​ປີຜ່ານໆ​ມາ​ຫລາຍ​ທົບ. ສຳລັບ​ຍາມ​ຮ້ອນ​ຫາກ​ຜູ້​ໃດ​ຕ້ອງການ​ໄປ​ທ່ອງ​ທ່ຽວ​ໃນ​ເຂດ​ນີ້​ແມ່ນ​ເໝາະ​ສົມ​ທີ່​ສຸດ​ເພາະ​ທຳ​ມະ​ຊາດ​ກໍ​ສວຍ​ງາມ, ​ອາກາດ​ກໍ​ສົດ​ໃສ ​ເຂດ​ໄຊ​ສົມບູນ​ຈະ​ມີ​ເສັ້ນທາງ​ທະ​ລຸ​ຂຶ້ນ​ໄປ​ຮອດ​ຊຽງ​ຂວາງ​ຢູ່​ສອງ​ເສັ້ນຄື​ຈາກ​ໄຊ​ສົມບູນ​ໄປ​ຫາ​ທ່າ​ໂທມຕໍ່​ໃສ່​ຊຽງ​ຂວາງ ຫລື ຈະ​ໂງ​ໄປ​ທາງ​ເຂດ​ບໍລິ​ຄຳ​ໄຊ​ເຈີດ​ໃສ່​ຄຳ​ມ່ວນ​ກໍ​ໄດ້​, ສ່ວນ​ເບື້ອງໜຶ່ງ​ແມ່ນ​ຕໍຈາກ​​ເທດສະບານ​ແຂວງ​ໄຊ​ສົມບູນ​ໄປ​ຊຳ​ທອງ​ລ້ອງ​ແຈ້ງ​ຂຶ້ນ​ໄປ​ຮອດ​ຊຽງ​ຂວາງ ​ແຂວງ​ນີ້​ມີ​ພູຜາ​ປ່າ​ໄມ້ ​ແລະ ທຳ​ມະ​ຊາດ​ສວຍ​ງາມ​ຫລາຍ​ບ່ອນ​ທີ່​ມີ​ຊື່​ສຽງ​ກວ່າ​ໝູ່​ແມ່ນ​ຖ້ຳ​ເຈົ້າອານຸວົງ ​ແລະ ພູ​ໝອກ​ນອກ​ນັ້ນ, ຍັງ​ມີ​ບໍ່​ຄຳ​ພູ​ເບ້ຍ​ທີ່​ພວມ​ຂຸດ​ຄົ້ນ ​ແລະ ມີ​ເຂື່ອນ​ໄຟຟ້າ​ນ້ຳງື່ມ 3 ທີ່​ກຳລັງ​ກໍ່ສ້າງ ​ເຊິ່ງອານາ​ຄົດ​ຈະ​ກາຍ​ເປັນ​​ແຫ​ລ່ງທ່ອງ​ທ່ຽວ​ທີ່​ສຳຄັນ​ຈຸດ​ໜຶ່ງ​ຂອງ​ປະ​ເທດ.

​​       ແນວ​ໃດ​ກໍ​ຕາມ, ຖ້າ​ເວົ້າ​ເຖິງ​ສະພາບ​ອາກາດ​ຢູ່​ບ້ານ​ເຮົາ​ເຫັນ​ວ່າ​ມັນ​ກໍ​ນັບ​ມື້ປ່ຽນ​ແປງ​ໄປ​ຕາມ​ວາຕະ​ຈັກ​ຂອງ​ໂລກ. ​ໃນ​ສະ​ໄໝ​ປູ່ຍ່າຕານາຍ, ພໍ່​ແມ່​ເຮົາ​ຍັງ​ບໍ່​ໜາວ​ປານ​ນີ້, ຕໍ່​ມາ​ຮອດ​ຍຸກ​ຂອງ​ເຮົາ​ມັນ​ກໍ​ເປັນ​ຄື​ສະພາບ​ເຮົາ​ໄດ້​ເຫັນ. ຕາມ​ທິດ​ກ່ຳ​ຄິດ​, ​ໃນ​ອານາ​ຄົດ​ບ້ານ​ເຮົາ​ຢ້ານ​ວ່າ​ມັນ​ຈະ​ເປັນ​ຄື​ບາງ​ປະ​ເທດ​ທີ່​ເຄີຍ​ປະສົບ​ກັບ​ບັນຫາ, ບໍ່​ຈັກ​ແລ້ງ, ຈັກ​ຖ້ວມ, ຈັກ​ລົມ, ຈັກ​ຝົນ​ມາ​ຖະຫລົ່ມ​ເຮັດ​ໃຫ້​ຄົນ​ຕາຍ​ເປັນ​ຮ້ອຍ​ເປັນ​ພັນ, ຍັງ​ໄຄ​ແດ່​ແຕ່​ວ່າ​ບ້ານ​ເຮົາ​ມີ​ພູຜາ​ປ່າ​ໄມ້​ຫລາຍ. ພູ​ທີ່​ສຳຄັນ​ທີ່​ສຸດ​ກໍ​ແມ່ນ​ສາຍພູ​ຫລວງ​ທີ່​ສາມາດ​ກັ້ນລົມ​ພາຍຸ​ທີ່​ມາ​ຈາກ​ທິດຕາ​ເວັນ​ອອກ​ໄດ້​ເປັນ​ຢ່າງ​ດີ. ຕາມ​ເຮົາ​ຄິດ, ອັນ​ສາ​​ເຫດ​ທີ່​ເຮັດ​ໃຫ້​ສະພາບ​ດິນ​ຟ້າ​ອາກາດ​ມີ​ການ​ປ່ຽນ​ແປງ​ຢູ່​ບ້ານ​ເຮົາ​ກໍ​ຍ້ອນ​ປັດ​ໄຈ​ຫລາຍ​ຢ່າງ​ເປ​ັນຕົ້ນການ​ປ່ຽນ​ແປງ​ຂອງ​ໂລກ​ໄປ​ຕາມ​ກົດ​ເກນ​ທຳ​ມະ​ຊາດ​ຂອງ​ມັນ. ອັນ​ສອງ​ແມ່​ນຍ້ອນ​ພວກ​ເຮົາ​ທຳ​ລາຍ​ທຳ​ມະ​ຊາດ, ມີ​ການ​ຕັດ​ໄມ້​ທຳລາຍ​ປ່າ, ​ໂດຍ​ບໍ່​ຄຳນຶງ​ເຖິງ​ຄວາມ​ຍືນ​ຍົງ​ຂອງ​ຄົນ ​ແລະ ທຳ​ມະ​ຊາດ. ​ເມື່ອທຳ​ມະ​ຊາດ​ຖືກ​ທຳລາຍ​ຍ້ອນ​ຄົນ​ແນ່​ນອນ​ມັນ​ກໍ​ກາຍ​ເປັນ​ມັດຈຸລາດ​ມາ​ທຳລາຍ​ຄົນ​ດັ່ງ​ສະພາບ​ທີ່​ເຮົາ​ປະສົບ​ພົບ​ພໍ້. ຍັງ​ໄຄ​ແດ່​ແຕ່​ວ່າ​ໜາວ​ປີ​ນີ້​ຍັງ​ບໍ່​ມີ​ແຫ​ລ່ງຂ່າວ​ຄາວ​ວ່າ​ມີ​ສັດ ຫລື ຄົນ​ຕາຍ​ຍ້ອນ​ໄພ​ໜາວ ສ່ວນວ່າ​ສະພາບ​ສັດ​ຕາຍ​ຢູ່​ເມືອງ​ວຽງ​ໄຊ​ແຂວງ​ຫົວພັນ 100 ກວ່າ​ໂຕນັ້ນ​ເປັນ​ຍ້ອນ​ພະຍາດ​ປາກ​ເປື່ອຍ​ລົງ​ເລັບ​ມັນ​ບໍ່​ແມ່ນ​ຍ້ອນ​ໄພ​ໜາວ.

​       ເຖິງ​ຢ່າງ​ໃດ​ກໍ​ດີ, ຕາມ​ການ​ພະຍາກອນ​ຂອງ​ອຸ​ຕຸ​ນິຍົມ​ ​ແລະ ອຸ​ທົກ​ກະສາ​ດຂອງ​ລາວ​ເຮົາ​ເພິ່ນ​ກໍ​ວ່າ​ສະພາບ​ຄວາມ​ໜາວ​ບ້ານ​ເຮົາ​ອາດ​ຈະ​ແກ່ຍາວ​ໄປ​ຮອດ​ວັນ​ທີ 15 ມັງກອນ​ຈຶ່ງ​ຈະ​ເບົາບາງ​ລົງ, ​ຄິດ​ວ່າ​ສະພາບ​ຄວາມໜາວ​ມາ​ຮອບ​ນີ້​ກໍ​ອາດ​ຈະ​ບໍ່​ມີ​ສັດສາ​ວາ​ສິ່ງ ຫລື ຄົນ​ເຮົາ​ເຈັບ​ເປັນ ຫລື ​ເສຍ​ຊີວິດ​ຍ້ອນ, ສິ່ງ​ສຳຄັນ​ຄື​ໃຫ້​ທຸກ​ຄົນ​ຮັກສາ​ສຸຂະພາບ​ທັງ​ຕິດຕາມ​ຂ່າວ​ຄາວ​ສະພາບ​ການ​ປ່ຽນ​ແປງ​ຂອງ​ດິນ​ຟ້າ​ອາກາດ​ແຕ່ລະ​ໄລຍະ​, ເພາະສະ​ໄໝ​ນີ້​ທຸກ​ສິ່ງຢ່າງ​ມັນ​ບໍ່​ມີ​ຫຍັງ​ຈະ​ແນ່ນອນ​ສິ່ງ​ທີ່​ແນ່ນອນ​ກໍ​ຄື​ຄວາມ​ບໍ່​ແນ່ນອນ​ນັ້ນ​ເອງ. ​ເບິ່ງ​ພະພຸດທະ​ເຈົ້າຕອນ​ພະ​ອົງ​ຍັງ​ມີ​ຊີວິດ​ເພິ່ນ​ໄດ້​ທຳນາຍ​ໄວ້​ລ່ວງ​ໜ້າ​​ໄວ້​ວ່າ: ກ້າວ​ເຂົ້າຍຸກ ພສ 2500 ມະນຸດ​ທີ່ຢູ່​ໃນ​ໂລກ​ຈະ​ປະສົບ​ບັນຫາ​ໄພພິບັດ 9 ຢ່າງ​ດັ່ງ​ນີ້: ໜຶ່ງ​ຈະ​ເກີດ​ພາຍຸ​ລົມ​ແຮງ​ແຜ່ນດິນ​ໄຫວ, ສອງ​ຈະ​ເກີ​ດອັກຄີ​ໄພ, ສາມ​ຈະ​ເກີດ​ອຸ​ທົກ​ກະ​ໄພ, ສີ່ ຈະ​ເກີດ​ຟ້າຜ່າ, ຫ້າ​ຈະ​ເກີດ​ຮ້ອນ​ເກີນ​ໄປ​ໜາວ​ເກີນ​ໄປ, ຫົກ​ຈະ​ເກີດ​ສານພິດ​ຕ່າງໆ, ​ເຈັດ​ຈະ​ເກີດ​ກາລະ​ໂລກ​ຕ່າງ​ໆ, ​ແປດ​ຈະ​ເກີດ​ເຂົ້າຍາກໝາກ​ແພງ ​ແລະ ​ເກົ້າຈະ​ເກີດ​ອາ​ຄາດ​ພະຍາບຽດບຽນ​ ​ເຊິ່ງກັນ ​ແລະ ກັນ ຕາມ​ທິດ​ກ່ຳ​ວ່າ​ສິ່ງ​ທີ່​ເພິ່ນ​ໄດ້​ທຳນາຍ​ໄວ້​ນີ້ ມາ​ຮອດ​ຍຸກ​ປັດຈຸບັນ​ມັນ​ຖືກ​​ເປະປາ​ນກຳປັ້ນຕີ​ດິນ, ​ແຕ່​ອັນ​ສຳຄັນ​ທີ່​ສຸດ​ຢ່າ​ພາກັນ​ຕາຍ​ຍ້ອນ​ຄວາມ​ປະໝາດ​ກໍ​ຖື​ວ່າ​ພວກ​ເຮົາ​ພາກັນ​ຍືນ​ຍົງ​ໄປ​ຫລາຍ​ເຕີບ.

- Wave100S AD to Website 2020 0 - ຄວາມ​ໜາວ​ມາ​ຄຸກ​ຄາມ​ອີ​ກ​ແລ້ວ
- WhatsApp Image 2020 05 27 at 5 - ຄວາມ​ໜາວ​ມາ​ຄຸກ​ຄາມ​ອີ​ກ​ແລ້ວ
- WhatsApp Image 2020 05 27 at 5 - ຄວາມ​ໜາວ​ມາ​ຄຸກ​ຄາມ​ອີ​ກ​ແລ້ວ
error: Alert: ເນື້ອຫາຂ່າວມີລິຂະສິດ !!