ລາວ-ກໍາປູເຈຍເພີ່ມທະວີການຮ່ວມມືວຽກງານປ້ອງກັນຄວາມສະຫງົບ
ກອງປະຊຸມຮ່ວມມືສອງຝ່າຍລະຫວ່າງກະຊວງປ້ອງກັນຄວາມສະຫງົບແຫ່ງ ສປປ ລາວ ແລະ ກະຊວງພາຍໃນແຫ່ງຣາຊະອານາຈັກກຳປູເຈຍປີ 2018 ໄດ້ຈັດຂຶ້ນໃນວັນທີ 17 ມັງກອນນີ້ທີ່ນະຄອນຫລວງວຽງຈັນ, ໂດຍການເປັນປະທານຮ່ວມຂອງທ່ານພົນຕີ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບລາວ ແລະ ສົມເດັດ ກຼໍລາໂຮມ ຊໍ ເຄັງ ຮອງນາຍົກລັດຖະມົນຕີ, ລັດຖະມົນຕີກະຊວງພາຍໃນແຫ່ງຣາຊະອານາຈັກກຳປູເຈຍ, ພ້ອມດ້ວຍຄະນະຜູ້ແທນສອງຝ່າຍເຂົ້າຮ່ວມ.
ກອງປະຊຸມຄັ້ງນີ້, ສອງຝ່າຍໄດ້ຜັດປ່ຽນກັນແຈ້ງສະພາບ ແລະ ທົບທວນຄືນຜົນການຈັດຕັ້ງປະຕິບັດບົດບັນທຶກການຮ່ວມມືລະຫວ່າງສອງກະຊວງໃນປີ ຜ່ານມາ, ພ້ອມທັງປຶກສາຫາລືແລກປ່ຽນຄຳຄິດຄຳເຫັນເຊິ່ງກັນ ແລະ ກັນຢ່າງກົງໄປກົງມາໃນຫລາຍດ້ານ ເປັນຕົ້ນ: ການຮ່ວມມືຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ, ການກວດກາ ແລະ ຄວບຄຸມຢາເສບຕິດ, ການຕ້ານການຄ້າມະນຸດ, ການອຳນວຍຄວາມສະດວກໃນການເຂົ້າ-ອອກເມືອງ, ການແລກປ່ຽນຢ້ຽມຢາມຂອງຄະນະຜູ້ແທນ, ການກໍ່ສ້າງກຳລັງ ແລະ ການຮ່ວມມືດ້ານອື່ນໆ, ຊຶ່ງໃນໄລຍະຜ່ານມາໜ່ວຍງານທີ່ກ່ຽວຂ້ອງຂອງສອງຝ່າຍໄດ້ຮ່ວມມືກັນໃນການສະກັດກັ້ນກຸ່ມຄົນບໍ່ດີທີ່ເຄື່ອນໄຫວລັກລອບຂົນສົ່ງ ແລະ ຄ້າຂາຍຢາເສບຕິດຢູ່ບໍລິເວນຊາຍແດນ ແລະ ສາມາດຈັບກຸມເປົ້າຜູ້ກະທຳຜິດມາດຳເນີນຄະດີຕາມລະບຽບກົດໝາຍໄດ້ຈຳນວນໜຶ່ງ.
ໂອກາດນີ້, ທ່ານລັດຖະມົນຕີກະຊວງປ້ອງກັນຄວາມສະຫງົບລາວ ແລະ ທ່ານຮອງນາຍົກລັດຖະມົນຕີ, ລັດຖະມົນຕີກະຊວງພາຍໃນກຳປູເຈຍ, ໄດ້ຮ່ວມກັນລົງນາມໃນບົດບັນທຶກວ່າດ້ວຍການຮ່ວມມືລະຫວ່າງກະຊວງປ້ອງກັນຄວາມສະຫງົບລາວ ແລະ ກະຊວງພາຍໃນກຳປູເຈຍປະຈຳປີ 2018 ເພື່ອແນໃສ່ເຮັດໃຫ້ຊາຍແດນສອງປະເທດມີຄວາມສະຫງົບ ແລະ ເປັນລະບຽບຮຽບຮ້ອຍດີ.
