ມີຜູ້ເສຍຊີວິດ 8 ຄົນ ສູນຫາຍ 3 ຄົນ ຫລັງຖະໜົນຍຸບຂະໜາດໃຫຍ່ຢູ່ຈີນ
ເຈົ້າໜ້າທີ່ຈີນ ກ່າວໃນວັນທີ 8 ກຸມພາວ່າ: ມີຜູ້ເສຍຊີວິດ 8 ຄົນ ແລະ ສູນຫາຍອີກ 3 ຄົນທາງພາກໃຕ້ຂອງຈີນ ພາຍຫລັງນ້ຳຮົ່ວພາຍໃນບໍລິເວນບ່ອນກໍ່ສ້າງສະຖານີລົດໄຟຟ້າໃຕ້ດິນ ເຮັດໃຫ້ຖະໜົນສາຍຫລັກຍຸບລົງເປັນຂຸມເລິກຂະໜາດໃຫຍ່.
ທາງການທ້ອງຖິ່ນຖະແຫລງວ່າ: ເຫດນ້ຳຖ້ວມກະທັນຫັນບໍລິເວນຊັ້ນໃຕ້ດິນເຮັດໃຫ້ຖະໜົນຍຸບລົງໃນເຂດໃຈກາງເມືອງຟໍຊົນ ແຂວງກວາງຕຸ້ງ ໃນຕອນຄໍ່າວັນທີ 7 ກຸມພາ ໂດຍສາມາດຊ່ວຍເຫລືອກຳມະກອນໄດ້ 9 ຄົນ. ຂະນະທີ່ກຳລັງເລັ່ງກູ້ໄພ ແລະ ສ້ອມແປງ ແຕ່ຍັງບໍ່ຮູ້ແນ່ນອນວ່າຜູ້ເສຍຊີວິດ ແລະ ສູນຫາຍເປັນກຳມະກອນທັງໝົດ ຫລື ບໍ່. ໜັງສືພິມໄຊນາເດລີ ລາຍງານວ່າ: ບໍລິເວນເກີດເຫດເລິກຂະໜາດໃຫຍ່ ແລະ ມີຄວາມເລິກ 6-7 ແມັດ. ຕົວເລກທາງການຈີນລະບຸວ່າ: ມີຜູ້ເສຍຊີວິດ 38.000 ຄົນຈາກອຸປະຕິເຫດໃນສະຖານທີ່ເຮັດວຽກໃນປີ 2017.
