ຈຳປາສັກສຳເລັດການຂຶ້ນທະບຽນຄົນຕ່າງປະເທດ
ຈຳປາສັກເປັນແຂວງໜຶ່ງທີ່ມີຄົນຕ່າງປະເທດອາໄສຢູ່ເປັນຈຳນວນຫລາຍ ບໍ່ວ່າຈະມາຢູ່ແບບນັກທຸລະກິດ ຫລື ອອກແຮງງານ ເຊິ່ງຜ່ານມາແຂວງໄດ້ມີແຜນຂຶ້ນທະບຽນໃຫ້ຖືກຕ້ອງມາຫລາຍປີ, ແຕ່ເນື່ອງຈາກປັດໄຈຫລາຍຢ່າງເຮັດໃຫ້ການເຮັດວຽກແກ່ຍາວມາຮອດປັດຈຸບັນຈຶ່ງສຳເລັດ.
ຮອງຫົວໜ້າພະແນກແຮງງານ ແລະ ສະຫວັດດີການສັງຄົມ (ຮສສ) ແຂວງ ໃຫ້ຮູ້ວ່າ: ພາຍຫລັງທີ່ໄດ້ຮັບຄຳສັ່ງຂອງນາຍົກລັດຖະມົນຕີ ວ່າດ້ວຍການອຳນວຍຄວາມສະດວກ, ການໃຫ້ຄວາມຮ່ວມມືໃນການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດ, ທາງພະແນກ ຮສສ ກໍໄດ້ສົມທົບກັບພາກສ່ວນທີ່ກ່ຽວຂ້ອງທຸກຂັ້ນ ເພື່ອເຄື່ອນໄຫວຈັດຕັ້ງປະຕິບັດໃນການຈັດສັນຄວາມເປັນລະບຽບຮຽບຮ້ອຍຂອງຄົນຕ່າງປະເທດ ກໍຄືແຮງງານຕ່າງປະເທດທີ່ເຂົ້າມາເຄື່ອນໄຫວພາຍໃນແຂວງໃຫ້ເຂົ້າສູ່ລະບຽບກົດໝາຍ.
ສຳລັບແຮງງານຕ່າງປະເທດທີ່ມີເງື່ອນໄຂໃນການປະກອບອາຊີບ ເຊິ່ງບໍ່ຂັດກັບອາຊີບສະຫງວນຂອງຄົນລາວ ທາງຄະນະກຳມະການໄດ້ອອກບັດອະນຸຍາດເຄື່ອນໄຫວຊົ່ວຄາວ 3 ເດືອນ (ປັບສະຖານະພາບ) ເພື່ອລໍຖ້າປະກອບເອກະສານໃຫ້ຖືກຕ້ອງ, ພ້ອມທັງແນະນຳໃຫ້ໄປປະກອບເອກະສານຖືກຕ້ອງຕາມຂັ້ນຕອນຂອງລະບຽບກົດໝາຍ. ສຳລັບແຮງງານຕ່າງປະເທດຜູ້ທີ່ບໍ່ມີເອກະສານຖືກຕ້ອງ ແລະ ບໍ່ມີເງື່ອນໄຂໃນການປະກອບອາຊີບຢູ່ລາວ ທາງຄະນະກຳມະການຈະອອກບັດອະນຸຍາດເຄື່ອນໄຫວຊົ່ວຄາວໃຫ້ ເພື່ອສຳລະສະສາງ ແລະ ຊຸກຍູ້ໃຫ້ກັບຄືນປະເທດ.
ຮອງຫົວໜ້າພະແນກການດັ່ງກ່າວໃຫ້ຮູ້ຕື່ມວ່າ: ຜ່ານການລົງກວດກາຕົວຈິງສາມາດເກັບກຳສະຖິຕິຄົນຕ່າງປະເທດທີ່ມາເຄື່ອນໄຫວຢູ່ແຂວງຈຳປາສັກມີທັງໝົດ 2.913 ຄົນ ຍິງ 720 ຄົນ, ມີເອກະສານຖືກຕ້ອງ 1.221 ຄົນ ຍິງ 302 ຄົນ ແລະ ຈຳນວນທີ່ເຂົ້າມາບໍ່ຖືກຕ້ອງຕາມລະບຽບການ. ປັດຈຸບັນໄດ້ຮັບການແກ້ໄຂດ້ວຍການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວສຳເລັດ 100%. ທ່ານກ່າວວ່າ: ການເຂົ້າມາເຄື່ອນໄຫວຂອງຄົນຕ່າງປະເທດຢູ່ແຂວງຈຳປາສັກແມ່ນຢູ່ໃນເກນປົກກະຕິ. ປັດຈຸບັນເຫັນວ່າສ່ວນໃຫຍ່ແມ່ນມີເອກະສານຖືກຕ້ອງ ແລະ ແຮງງານຕ່າງປະເທດຈຳນວນໜຶ່ງແມ່ນໄດ້ນຳເອົາເຕັກນິກວິຊາການເຂົ້າມາພັດທະນາຂະແໜງການຕ່າງໆທີ່ມີປະໂຫຍດໃຫ້ແກ່ແຂວງຈຳປາສັກ ສ່ວນຫລາຍແມ່ນຄົນຫວຽດນາມ, ໄທ, ຈີນ ແລະ ປະເທດອື່ນໆຈຳນວນໜຶ່ງ.
