ເຜີຍແຜ່ຜົນຮ້າຍຂອງຢາເສບຕິດໃຫ້ນັກຮຽນໃນເມືອງສີສັດຕະນາກ
ເມື່ອທ້າຍອາທິດຜ່ານມານີ້, ເຈົ້າໜ້າທີ່ ປກສ ເມືອງ ສີສັດຕະນາກໄດ້ລົງເຜີຍແຜ່ຜົນຮ້າຍຂອງຢາເສບຕິດ ແລະ ບັນຫາອຸປະຕິເຫດໃຫ້ນັກຮຽນພາຍໃນເມືອງດັ່ງກ່າວຄື: ໂຮງຮຽນມັດທະຍົມທົ່ງກາງ, ໂຮງຮຽນມັດທະຍົມສີສັດຕະນາກ ແລະ ໂຮງຮຽນແຫ່ງອື່ນໆ ເພື່ອໃຫ້ບັນດາຄູອາຈານ ແລະ ນ້ອງນັກຮຽນເຫັນໄດ້ຜົນຮ້າຍ ແລະ ຄວາມອັນຕະລາຍຂອງມັນ, ພາຍຫລັງເຫັນວ່າປັດຈຸບັນ, ສະພາບຢາເສບຕິດມີລັກສະນະຂະຫຍາຍວົງກວ້າງ ແລະ ໄດ້ມີຊາວໜຸ່ມເຍົາວະຊົນຈໍານວນບໍ່ໜ້ອຍຕົກເປັນເຄື່ອງມືຂອງຂະບວນການຄ້າຂາຍຢາເສບຕິດ ແລະ ເກີດມີປາກົດການຫຍໍ້ທໍ້ສັງຄົມຕ່າງໆ ເປັນຕົ້ນ: ລັກຊັບ, ປຸ້ນຈີ້-ຊີງຊັບ ແລະ ອຸປະຕິເຫດ. ສະນັ້ນ, ຫລີກລ່ຽງບໍ່ໃຫ້ຕົກເປັນເຫຍື່ອຂອງຢາເສບຕິດແມ່ນຕ້ອງບໍ່ເຂົ້າໄປຫຍຸ້ງກ່ຽວກັບຢາເສບຕິດທຸກປະເພດໂດຍເດັດຂາດ ແລະ ໃຊ້ເວລາຫວ່າງໃຫ້ເກີດປະໂຫຍດ ເຊັ່ນ: ຫລີ້ນກິລາ, ການຄົ້ນຄວ້າຮໍ່າຮຽນ ແລະ ເຮັກກິດຈະກໍາອື່ນໆທີ່ມີປະໂຫຍດແກ່ຕົນເອງ ແລະ ສັງຄົມ.
ເຈົ້າໜ້າທີ່ ປກສ ເມືອງສີສັດຕະນາກ ໃຫ້ຮູ້ວ່າ: ໃນປີ 2017 ປາກົດການຫຍໍ້ທໍ້ພົ້ນເດັ່ນແມ່ນລັກຊັບພົນລະເມືອງເກີດຂຶ້ນ 221 ເລື່ອງ ແລະ ຄ້າຂາຍເສບຢາເສບຕິດ 110 ເລື່ອງ, ກັກຕົວໄດ້ 224 ຄົນ (ຍິງ 29 ຄົນ).
ຂ່າວໃຫ້ຮູ້ຕື່ມວ່າ: ເມື່ອທ້າຍອາທິດຜ່ານມານີ້, ເຈົ້າໜ້າທີ່ ປກສ ນະຄອນຫລວງວຽງຈັນ, ໄດ້ສຶກສາອົບຮົມຜູ້ມົ້ວສຸມຢາເສບຕິດຈໍານວນ 36 ຄົນກ່ອນມອບໃຫ້ຜູ້ປົກຄອງໄປສຶກສາຕື່ມ ແລະ ຜູ້ຕິດຢາເສບຕິດຮຸນແຮງແມ່ນໄດ້ນຳສົ່ງສູນບຳບັດຢາເສບຕິດ. ສ່ວນຜູ້ມີຢາເສບຕິດຄອບຄອງແມ່ນໄດ້ເອົາຕົວໄປດໍາເນີນຄະດີຕາມລະບຽບກົດໝາຍ ລວມມີທ້າວ ຈອນນີ ອາຍຸ 25 ປີຢູ່ບ້ານຄຳສະຫວາດ, ທ້າວ ແສງມະນີ (ຈ່ອຍ) ອາຍຸ 22 ປີຢູ່ບ້ານໂນນສະຫວ່າງ, ທ້າວ ສົມຊາຍ ອາຍຸ 30 ປີຢູ່ບ້ານໜອງໜ່ຽງ, ທ້າວ ສົມພັນ (ບ້ຽວ) ອາຍຸ 36 ປີຢູ່ບ້ານທາດຫລວງໃຕ້ ແລະ ນາງ ສະດາພອນ (ຈຽບ) ອາຍຸ 22 ປີຢູ່ບ້ານໂນນສະຫວ່າງເມືອງໄຊເສດຖານະຄອນຫລວງວຽງຈັນ, ໂດຍທັງໝົດຖືກຈັບຕົວໄດ້ໃນຮ້ານເກມແຫ່ງໜຶ່ງເຂດບ້ານໂນນຄໍ້ເໜືອເມືອງໄຊເສດຖານະຄອນຫລວງວຽງຈັນ, ພ້ອມຂອງກາງຢາບ້າ 30 ກວ່າເມັດ.
