ລົງນາມສັນຍາການສະຫນອງບໍລິການໂທລະຄົມມະນາຄົມໃນສູນການຄ້າສາກົນເວີລເທຼດເຊັນເຕີ

ພິທີລົງນາມສັນຍາຮ່ວມມືເພື່ອສະຫນອງບໍລິການໂທລະຄົມມະນາຄົມຄົບວົງຈອນໃນສູນການຄ້າເວີລເທຼດເຊັນເຕີລະຫວ່າງທ່ານ ຖາວອນ ສົມສະກຸນ ອໍານວຍການໃຫຍ່ລັດວິສາຫະກິດລາວໂທລະຄົມ ແລະ ທ່ານ ຊຽວ ຫລົງ ຕາງຫນ້າຜູ້ບໍລິຫານສູນການຄ້າສາກົນເວີລເທຼດເຊັນເຕີ, ພ້ອມດ້ວຍພະນັກງານສອງຝ່າຍເຂົ້າຮ່ວມນໍາດ້ວຍ.

ຜູ້ບໍລິຫານລະດັບສູງຂອງສູນການຄ້າດັ່ງກ່າວ ໃຫ້ຮູ້ວ່າ: ສູນການຄ້າພວກເຮົາແມ່ນໂຄງການກໍ່ສ້າງຂະໜາດໃຫຍ່ໃນນະຄອນຫລວງວຽງຈັນ ທີ່ຈະປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ແລະ ເປັນໂຄງການທີ່ເກີດຈາກການເປີດກວ້າງ ແລະ ຍົກລະດັບການຮ່ວມມືດ້ານເສດຖະກິດ, ການຄ້າ, ການລົງທຶນ ແລະ ການທ່ອງທ່ຽວ ຂອງສອງປະເທດລາວ-ຈີນ, ເວົ້າລວມແມ່ນເພີ່ມທະວີການພົວ ພັນທາງດ້ານເສດຖະກິດໃນຂົງເຂດການຄ້າເສລີອາຊຽນ-ຈີນ. ດັ່ງນັ້ນ ບໍລິສັດພວກເຮົາຈຶ່ງໄດ້ ເລືອກເອົາລັດວິສາຫະກິດລາວໂທລະຄົມ ເປັນຜູ້ສະຫນອງລະບົບການຕິດຕໍ່ສື່ສານໂທລະຄົມ ເຊັ່ນ: ສັນຍານໂທລະສັບມືຖື, ລະບົບອິນເຕີເນັດ ແລະ ການຮັບ-ສົ່ງຂໍ້ມູນຕ່າງໆ.

ລາວໂທລະຄົມ ໃຫ້ຮູ້ວ່າ: ພວກເຮົາໄດ້ລົງທຶນກໍ່ສ້າງລະບົບສື່ສານທັງແບບມີສາຍ ແລະ ບໍ່ມີສາຍ ເຂົ້າໃນພື້ນທີ່ເຂດສູນການຄ້າດັ່ງກ່າວ ເພື່ອໃຫ້ບໍລິການລະບົບ 3g, 4g ແລະ 4,5g ເພື່ອຮັບປະກັນໃຫ້ການຊົມໃຊ້ລະບົບໂທລະຄົມໃນອາຄານດັ່ງກ່າວທັນສະໄໝ, ວ່ອງໄວ ແລະ ມີປະສິດທິຜົນ.