ເປີດງານວາງສະແດງຮູບຖ່າຍຢູ່ຈີນຂອງນັກຖ່າຍຮູບລາວ

ໃນວັນທີ 2 ເມສານີ້, ສູນວັດທະນະທຳຈີນປະຈຳລາວ ໄດ້ຈັດງານວາງ ສະແດງຮູບຖ່າຍຢູ່ຈີນຂອງນັກຖ່າຍຮູບລາວຂຶ້ນຢູ່ທີ່ສູນການຄ້າວຽງຈັນເຊັນເຕີ, ໂດຍການເຂົ້າຮ່ວມຂອງທ່ານຫົວໜ້າສະຖາບັນວິຈິດສິນແຫ່ງຊາດ ກະຊວງ​ຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ, ມີເລຂາເອກເອກອັກຄະລັດຖະທູດ ສປຈີນ ປະຈຳລາວ, ພ້ອມດ້ວຍມວນຊົນເຂົ້າຮ່ວມເປັນຈໍານວນຫລາຍ.

ໃນໂອກາດດັ່ງກ່າວ, ຜູ້ຕາງໜ້າສູນວັດທະນະທຳຈີນປະຈຳລາວ ໄດ້ມີຄໍາເຫັນວ່າ: ງານວາງສະແດງຄັ້ງນີ້ໄດ້ເປີດວິໃສທັດໃໝ່ແຫ່ງການຖ່າຍທອດອາລົມຈິດ ແລະ ຄວາມຮູ້ສຶກທີ່ແຕກຕ່າງ, ສະແດງອອກເຖິງທັດສະນິຍະພາບ ທາງທຳມະຊາດທີ່ງົດງາມຂອງແຂວງຫູເປີຍ, ທິວທັດດ້ານວັດທະນະທຳ, ປະເພນີຊົນເຜົ່າ ແລະ ຮູບຕຶກອາຄານຕ່າງໆ. ຜົນງານໄດ້ເຊື່ອມໂຍງແຮງບັນດານໃຈດ້ານສິລະປະ, ສະຕິປັນຍາ, ພອນສະຫວັນ ແລະ ຄວາມຮູ້ສຶກອັນເລິກເຊິ່ງ ຕໍ່ປະຊາຊົນຈີນ ຂອງນັກຖ່າຍຮູບ, ເພື່ອໃຫ້ສິລະປິນລາວ-ຈີນ ໄດ້ແລກປ່ຽນບົດຮຽນໃນການສ້າງສັນຜົນງານສິລະປະໃຫ້ເລິກເຊິ່ງກວ່າເກົ່າ, ທັງເປັນສິ່ງອ້າງອີງ, ເປັນແຮງບັນດານໃຈ ແລະ ການພັດທະນາທີ່ດີໃຫ້ແກ່ວົງການສິລະປະການຖ່າຍຮູບ. ເຊື່ອໝັ້ນວ່າຄວາມສຳເລັດໃນການຈັດງານວາງ ສະແດງຄັ້ງນີ້, ຈະເປັນແຮງກະຕຸ້ນ, ຊຸກຍູ້, ສົ່ງເສີມການພົວພັນແລກປ່ຽນທາງສິລະປະ, ຮັກສາ, ພັດທະນາມູນເຊື້ອວັດທະນະທຳອັນດີງາມ, ພ້ອມທັງເປັນການສ້າງຄວາມເຂົ້າອົກເຂົ້າໃຈໃນສິລະປະ ແລະ ມິດຕະພາບອັນດີງາມຂອງສອງຊາດລາວ-ຈີນ.

ພ້ອມດຽວກັນ, ທ່ານຫົວໜ້າພະແນກຮູບພາບ-ສຳເນົາ ສຳນັກຂ່າວສານປະເທດລາວ, ເຊິ່ງເປັນໜຶ່ງໃນເຈົ້າຂອງຜົນງານຮູບຖ່າຍໃນງານວາງສະແດງດັ່ງກ່າວ ເວົ້າວ່າ: ຮູ້ສຶກເປັນກຽດຢ່າງຍິ່ງທີ່ໄດ້ຮັບຄັດເລືອກ ແລະ ຖືກເຊື້ອເຊີນໄປຮ່ວມແລກປ່ຽນສ້າງສັນຜົນງານການຖ່າຍຮູບຢູ່ ສປຈີນ ເພື່ອເກັບພາບສະຖານທີ່ທ່ອງທ່ຽວທີ່ສຳຄັນຂອງແຂວງຫູເປີຍ, ບໍ່ວ່າຈະເປັນສະຖານທີ່ທ່ອງທ່ຽວທາງທຳມະຊາດ, ປະຫັວດສາດ, ວັດທະນະທຳ, ສັງຄົມ ແລະ ຄວາມຈະເລີນສີວິໄລຂອງບ້ານເມືອງໃນ ສປຈີນ.

ໃນງານຄັ້ງນີ້, ໄດ້ຄັດເລືອກເອົາຜົນງານທີ່ພົ້ນເດັ່ນປະມານ 40 ຮູບ ມາວາງສະແດງເພື່ອໃຫ້ສັງຄົມໄດ້ຮັບຊົມ ແລະ ເປັນຂີດໝາຍສຳຄັນໃນການຮ່ວມມື ທາງດ້ານສິລະປະວັດທະນະທຳ, ການ ທ່ອງທ່ຽວ, ເສີມສ້າງຄວາມເຂົ້າໃຈເຊິ່ງກັນ ແລະ ກັນ ຂອງສອງປະເທດ ກໍຄື ປະຊາຊົນສອງຊາດລາວ -ຈີນ ໃຫ້ແໜ້ນແຟ້ນຍິ່ງຂຶ້ນ.

ງານວາງສະແດງຮູບຖ່າຍໃນຄັ້ງນີ້, ເປີດໃຫ້ເຂົ້າຊົມໂດຍບໍ່ໄດ້ເສຍຄ່າ ຈົນຮອດວັນທີ 5 ເມສາ 2018 ຢູ່ທີ່ຊັ້ນໜຶ່ງ ສູນການຄ້າວຽງຈັນເຊັນເຕີ.