ຄະນະສຶກສາສາດຈັດແຂ່ງຂັນໂຕ້ວາທີ ສົ່ງເສີມທັກສະການນຳໃຊ້ພາສາລາວ
ເມື່ອມໍ່ໆມານີ້, ພາກສ້າງຄູພາສາລາວ-ວັນນະຄະດີ ຄະນະສຶກສາສາດ ມະຫາວິທະຍາໄລແຫ່ງຊາດ (ມຊ) ໄດ້ຈັດການແຂ່ງຂັນໂຕ້ວາທີ ຄັ້ງທີ 1 ຂຶ້ນ ທີ່ມະຫາວິທະຍາໄລດັ່ງກ່າວ ເພື່ອສົ່ງເສີມທັກສະທາງດ້ານການນຳໃຊ້ພາສາລາວ ໂດຍສະເພາະແມ່ນທັກສະດ້ານການເວົ້າໃຫ້ແກ່ນັກສຶກສາ ແລະ ຍັງເປັນການປົກປັກຮັກສາມໍລະດົກອັນລ້ຳຄ່າຂອງຊາດ ໂດຍການເປັນປະທານຂອງທ່ານ ວິຊຽນ ທອງທະວີ ຮອງຄະນະບໍດີຄະນະສຶກສາສາດ, ມີຜູ້ຕາງໜ້າຈາກສະມາຄົມນັກປະພັນລາວ, ຜູ້ໃຫ້ການສະໜັບສະໜູນ, ຫົວໜ້າພາກວິຊາ ແລະ ພະນັກງານຄູ-ອາຈານ ແລະ ນັກສຶກສາໃນຄະນະສຶກສາສາດເຂົ້າຮ່ວມຢ່າງພ້ອມພຽງ.
ໃນໂອກາດດຽວກັນ, ທ່ານ ວິຊຽນ ທອງທະວີ ກ່າວວ່າ: ການຈັດການແຂ່ງຂັນດັ່ງກ່າວ ເພື່ອສົ່ງເສີມທັກສະການນຳໃຊ້ພາສາລາວ ໂດຍສະເພາະທັກສະດ້ານການເວົ້າໃຫ້ແກ່ນັກສຶກສາ ແລະ ທັງເປັນການທົດສອບຄວາມຮູ້ຄວາມສາມາດທາງດ້ານການເວົ້າໂຕ້ແຍ້ງຂອງບັນດານັກສຶກສາທີ່ຜ່ານການສຶກສາຮໍ່າຮຽນມາແລ້ວ ຈະມີທັກສະການໃຊ້ແນວໃດ ເພື່ອໃຫ້ເຂົາເຈົ້າໄດ້ຮຽນຮູ້ການນຳໃຊ້ພາສາຕ່າງໆໃຫ້ດີຂຶ້ນ.
ການແຂ່ງຂັນໂຕ້ວາທີຄັ້ງນີ້ ປະກອບມີ 4 ທີມຄື: ທີມຍອດຊາຂຽວຝ່າຍສະເໜີ ພົບກັບ ທີມໂອ ! ລະນໍ ຝ່າຍຄ້ານ ໃນຍັດຕິທີ່ວ່າ: “ທິດສະດີ ດີກວ່າ ການປະຕິບັດຕົວຈິງ”, ທີມສິນໄຊຝ່າຍສະເໜີ ພົບກັບ ທີມສາມສະຫາຍ ຝ່າຍຄ້ານ ໃນຍັດຕິທີ່ວ່າ: “ການສອນແບບເອົານັກຮຽນເປັນໃຈກາງ ດີກວ່າ ການສອນແບບເອົາຄູເປັນໃຈກາງ”. ສໍາລັບຜົນຂອງການແຂ່ງຂັນຮອບທຳອິດ ທີມໂອ ! ລະນໍ ເອົາຊະນະ ທີມຍອດຊາຂຽວ ແລະ ທີມສາມສະຫາຍ ເອົາຊະນະທີມສິນໄຊ. ຫຼັງຈາກນັ້ນ, ທີມໂອ ! ລະນໍ ເປັນຝ່າຍສະເໜີ ໄດ້ພົບກັບ ທີມສາມສະຫາຍ ຝ່າຍຄ້ານ ໃນຍັດຕິທີ່ວ່າ: “ເງິນເຕັມພາ ບໍ່ເທົ່າຜະຫຍາເຕັມປູມ” ເຊິ່ງການໂຕ້ຂອງ 2 ທີມດຳເນີນໄປຢ່າງດຸເດືອດ. ຜົນການແຂ່ງຂັນປາກົດວ່າ ທີມສາມສະຫາຍ ເປັນຝ່າຍຊະນະເລີດ ເພາະມີເຫດຜົນຫຼາຍກວ່າ, ອັນດັບທີ 2 ໄດ້ແກ່ທີມໂອ ! ລະນໍ. ສ່ວນທີມຍອດຊາຂຽວ ແລະ ທີມສິນໄຊ ໄດ້ຮັບລາງວັນຊົມເຊີຍ.
