ລາວຈະ​ຍົກລະດັບ​ຜະ​ລິດ​ຕະ​ພາບ ແລະ ຄຸນ​ນະ​ພາບ​ດ້ານກະ​ສິ​ກຳ

- lao corn - ລາວຈະ​ຍົກລະດັບ​ຜະ​ລິດ​ຕະ​ພາບ ແລະ ຄຸນ​ນະ​ພາບ​ດ້ານກະ​ສິ​ກຳ
- Untitled design - ລາວຈະ​ຍົກລະດັບ​ຜະ​ລິດ​ຕະ​ພາບ ແລະ ຄຸນ​ນະ​ພາບ​ດ້ານກະ​ສິ​ກຳ

ແຫລ່ງຂ່າວ ຂປລ ລາຍງານວ່າ: ໃນວັນທີ 26 ເມ​ສານີ້, ທີ່ນະຄອນຫລວງວໍ​ຊິງ​ຕັນດີ​ຊີ, ປະ​ຊາ​ຊົນຫລາຍກວ່າ 140.000 ຄົນ ​ຈະ​ໄດ້​ຮັບ​ຜົນ​ປະ​ໂຫຍດ​ຈາກ​ກາ​ນ​ຊຸ​ກ​ຍູ້​ ​ແລ​ະ​ ສົ່ງ​ເສີ​ມ​​​ເພື່ອ​ເຮັດ​ໃຫ້​ການ​ຜະ​ລິດ​ເຂົ້າ, ສາ​ລີ ແລະ ຜະ​ລິດ​ຕະ​ພັນ​ກະ​ສິ​ກຳ​ຕ່າງໆມີ​ປະ​ສິດ​ທິ​ພາບ ແລະ ມີ​ກຳ​ໄລ​ຫລາຍ​ຂຶ້ນ​, ໂດຍ​ຜ່ານ​​ໂຄງ​ການຜະລິດກະ​ສິ​ກຳ​ເປັນສິນຄ້າ​ຢູ່ ສ​ປ​ປ ລາວ. ​ໂຄງ​ກາ​ນ​ນີ້, ໄດ້​ຮັບ​ກາ​ນ​​ອະ​ນຸ​ມັດ​ຈາ​ກສະ​ພາ​ບໍ​ລິ​ຫານ​ຂອງ​ທະ​ນາ​ຄານ​ໂລກ, ລວມມີ​​ມູນ​ຄ່າ 25 ລ້ານ​ໂດ​ລາ​ສະ​ຫະ​ລັດ ເພື່ອແນໃສ່​ສະ​ໜັບ​ສະ​ໜູນ 28.000 ຄົວ​ເຮືອນໃນ 224 ບ້ານ​ທີ່​ຖືກ​ຄັດ​ເລືອກ​ໃນຂົງເຂດ​ຊົນ​ນະ​ບົດ, ​ເພື່ອ​ເພີ່ມ​ຜົນ​​ຜະ​ລິດ, ປັບປຸງຄຸນ​ນະ​ພາບ​ສິນຄ້າ​ ແລະ ເພີ່ມ​ຜະ​ລິດ​ຕະ​ພາບ​ດ້ານແຮງ​ງານ ແລະ ເພີ່ມ​ຍອດ​ຂາຍຜົນ​ລະ​ປູກ, ຊ່ວຍໃຫ້ຊາວກະສິກອນສາມາດ​ເຂົ້າ​ເຖິງ​ແນວ​​ພັນ​ພືດທີ່​ມີ​ຄຸນ​ນະ​ພາບ​ສູງ, ການ​ນຳ​ໃຊ້​ກົນ​ຈັກ ແລະ ​ຊົນ​ລະ​ປະ​ທານ​ ມີເປົ້າໝາຍເພື່ອຫລຸດຕົ້ນ​ທຶນ​ການ​ຜ​ະ​ລິດ​ ​​​ ແລະ ເຮັດ​ໃຫ້​ຊາວ​ກະ​ສິ​ກອນ​ໄດ້ຮັບຜົນ​ຕອບ​ແທນສູງ​ຂຶ້ນ.

ທ່ານ ພວງ​ປາ​ຣິ​ສັກ ປ​ຣະ​ວົງ​ວຽງ​ຄຳ ຮອງ​ລັດ​ຖະ​ມົນ​ຕີ​ກະ​ຊວງ​ກະ​ສິ​ກຳ ແລະ ​ປ່າ​ໄມ້ ​ກ່າວ​ວ່າ: ກ​ະ​ສິ​ກຳມີ​ຄວາມ​ສຳ​ຄັນ​ຫລາຍຕໍ່​ປະ​ເທດ​ຂອງ​ພວກ​ເຮົາໃນການສ້າງວຽກເຮັດງານທຳໃຫ້ແກ່ກຳ​ລັງ​ແຮງ​ງານລາວເປັນຈໍານວນ​ຫລາຍ. ອີງຕາມ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ 5 ​ປີ​ຄັ້ງ​ທີ 8, ສ​ປ​ປ ລາວ ໄດ້​ກຳນົດ​ບຸ​ລິ​ມະ​ສິດການ​ເຕີບ​ໂຕທາງເສດຖະກິດ​ແບບ​ສີ​ຂຽວ​ໃນ​ຍຸດ​ທະ​ສາດ​ການ​ພັດ​ທະ​ນາ​ກະ​ສິ​​ກຳ ແລະ ປ່າ​ໄມ້ໄລ​ຍະຍາວຂອງຕົນ ​ແລະ ໄດ້ສຸມ​ໃສ່ປັບປຸງຄຸນ​ນະ​ພາບ​ຂອງການ​ຜະລິດກະ​ສິ​ກຳ, ອາ​ຫານ​ ແລະ ຜະ​ລິດ​ຕະ​ພັນທີ່​ປອດ​ໄພ, ໂດຍ​ຖືເອົາ​ວິ​ສາ​ຫະ​ກິດ​ຂະ​ໜາດ​ນ້ອຍ ແລະ ຂະ​ໜາດ​ກາງ ​ເປັນ​ໃຈກາງໃນການ​ຂັບ​ເຄື່ອນ​ແຜນ​ຍຸດ​ທະ​ສາດແຫ່ງຊາດປາກົດຜົນ​ເປັນ​ຈິງ.

ຂະ​ແໜງ​ກະ​ສິ​ກຳ​ຂອງ ສ​ປ​ປ ລາວ ກຳ​ລັງ​ປະ​ເຊີນ​ໜ້າ​ກັບ​​ສິ່ງ​ທ້າ​ທາຍ​ຫລາຍຢ່າງ​ໃນ​ການ​ຕອບ​ສະ​ໜອງ​ສິນຄ້າກະສິກຳຕໍ່ຄວາມ​ຕ້ອງ​ການ​ຂອງ​ຕະ​ຫລາດ​ພາຍ​ໃນ ແລະ ຕ່າງ​ປະ​ເທດ​, ຍ້ອນຍັງມີ​ບັນ​ຫາ​ຕ່າງໆທີ່ຕິດພັນ​ກັບ​ຜະ​ລິດ​ຕະ​ພາບ​ຂອງ​ການຜະລິດ​ກະ​ສິ​ກຳ, ຄຸນ​ນະ​ພາບ​ຂອງ​ຜົນ​ຜະ​ລິດ ແລະ ການ​ສ້າງ​ກຳ​ໄລ. ໂຄງ​ການນີ້​, ມີ​ເປົ້າໝາຍ​ທີ່​ຈະ​ແກ້​ໄຂ​ສິ່ງ​ທ້າ​ທາຍ​ເຫລົ່າ​ນີ້​ ດ້ວຍການ​ສົ່ງ​ເສີມ​ການຜະລິດ​ກະ​ສິ​ກຳທີ່ດີ, ການປັບ​ປຸງ​ຄຸນ​ນະ​ພາບ​ຂອງ​ຜະ​ລິດ​ຕະ​ພັນ, ການຫລຸດ​ຜ່ອນ​ຕົ້ນ​ທຶນ, ລວມທັງການເຊື່ອມໂຍງ​ຊາວ​ກະ​ສິ​ກອນ​ເຂົ້າ​ກັບ​ທຸ​ລະ​ກິດ​ກະ​ສິ​ກຳ​ ເພື່ອປັບປຸງດ້ານການ​ຕະ​ຫລາດ ແລະ ຫັນ​ໄປ​ສູ່​ການ​ນຳ​ໃຊ້ເຄື່ອງຈັກເຕັກນິກ ແລະ ເຕັກ​ໂນ​ໂລ​ຊີ ໃນການປຸ່ງແຕ່ງ​ທີ່​ທັນ​ສະ​ໄໝ​ກວ່າ​ເກົ່າ ແລະ ເປັນ​ມິດ​ກັບ​ສິ່ງ​ແວດ​ລ້ອມເພື່ອເພີ່ມ​ມູນ​ຄ່າ​ ແລະ ຫລຸດ​ຜ່ອນ​ການ​ສູນ​ເສຍຂອງຜົນ​ຜະ​ລິດ.

- Wave100S AD to Website 2020 0 - ລາວຈະ​ຍົກລະດັບ​ຜະ​ລິດ​ຕະ​ພາບ ແລະ ຄຸນ​ນະ​ພາບ​ດ້ານກະ​ສິ​ກຳ

ທ່ານ ນາງ ເອແລນ ໂກນສະຕິນ (Ellen Goldstein) ຜູ້​ອຳ​ນວຍ​ການ​ທະ​ນາ​ຄານ​ໂລກ ​ປະ​ຈຳ​ປະ​ເທດມຽນ​ມາ, ກຳ​ປູ​ເຈຍ ແລະ ສ​ປ​ປ ລາວ ​​ກ່າວ​ວ່າ: ສ​ປ​ປ ລາວ ກຳ​ລັງ​​ປັບປຸງ​ຂະ​ແໜງ​ກະ​ສິ​ກຳ​ໃຫ້​ມີ​ປະສິດ​ທິ​ຜົນ​ກວ່າ​ເກົ່າ, ​ໃຫ້ມີ​ກຳ​ໄລ ແລະ ໃນ​ຮູບ​ແບບ​ສີ​ຂຽວ, ບັນ​ດາ​ຄອບ​ຄົວ​ຊາວກະ​ສິ​ກອນ ທຸ​ລະ​ກິດ​ກະ​ສິ​ກຳ ຊາວ​ຄ້າຂາຍ​ຍ່ອຍ ແລະ ຜູ້​ບໍ​ລິ​ໂພກ​ ຈະ​ໄດ້​ຮັບ​ຜົນ​ປະ​ໂຫຍດຈາກ​ໂຄງ​ການນີ້, ​ຊຶ່ງ​ ຈ​ະຊ່ວຍປັບ​ປຸງ​ຄຸນ​ນະ​ພາບ, ເຮັດ​ໃຫ້​ມີ​ຜະ​ລິດ​ຕະ​ພັນ​​ກ​ະ​ສິ​ກຳຫລາ​ກ​ຫລາຍຂຶ້ນ ແລະ ມີ​ລາ​ຄາ​ຖືກລົງ.ຊາວ​ກະ​ສິ​ກອນ​ ຍັງ​ຈະ​ໄດ້​ນຳ​ໃຊ້​ເຕັກ​ໂນ​ໂລ​ຊີ​ ເພື່ອ​​ປັບ​ຕົວກັບກາ​ນ​ປຽ່ນ​ແປງດິນ​ຟ້າ​ອາ​ກາດ ແລະ​ ເພື່ອ​ເຮັດ​ໃຫ້​ຜະ​ລິດ​ຕະ​ພັນ​ກະ​ສິ​ກຳ​ມີ​ຄວາມ​ສະ​ອາດ​ກວ່າ ແລະ ມີ​ມູນ​ຄ່າ​ສູງ​ຂຶ້ນ.

ໂຄງການດັ່ງກ່າວ, ຈະ​ຈັດ​ຕັ້ງ​ປະ​ຕິ​ບັດ​ຢູ່​ແຂວງ​ຄຳ​ມ່ວນ, ບໍ​ລິ​ຄຳ​ໄຊ, ໄຊ​ຍະ​ບູ​ລີ, ແຂວງວຽງ​ຈັນ ແລະ ນະ​ຄອນ​ຫລວງວຽງ​ຈັນ ​ຈົນຮອດ​ປີ 2024, ຊຶ່ງທະ​ນາ​ຄານ​ໂລກ​ ໃຫ້​ການ​ສະໜັບສະໜູນ ສ​ປ​ປ ລາວ ໂດຍ​ຜ່ານແຜນການຮ່ວມມືກັບ ສປປ ລາວ ​ສຳ​ລັບ​ໄລ​ຍະ 2017-2021 ​ໃນ 3 ຂົງ​ເຂດ​ວຽກຈຸດ​ສຸມ ເຊັ່ນ: ການ​ເຕີບ​ໂຕ​ແບບ​ມີ​ສ່ວນ​ຮ່ວມ, ການ​ລົງ​ທຶນ​ໃສ່​ຊັບ​ພະ​ຍາ​ກອນ​ມະ​ນຸດ, ແລະ ການ​ປົກ​ປັກ​ຮັກ​ສາ​ສິ່ງ​ແວດ​ລ້ອມ, ຊຶ່ງ​ຂົງ​ເຂດ​ວຽກ​ທັງ​ໝົດ​ເຫລົ່າ​ນີ້​ ຈະ​ໄດ້​ຮັບ​ການ​ສະ​ໜັບ​ສະ​ໜູນ​ຈາກ​ໂຄງ​ການ​ກະ​ສິ​ກຳ​ໃໝ່​ນີ້.

- WhatsApp Image 2020 05 27 at 5 - ລາວຈະ​ຍົກລະດັບ​ຜະ​ລິດ​ຕະ​ພາບ ແລະ ຄຸນ​ນະ​ພາບ​ດ້ານກະ​ສິ​ກຳ
- WhatsApp Image 2020 05 27 at 5 - ລາວຈະ​ຍົກລະດັບ​ຜະ​ລິດ​ຕະ​ພາບ ແລະ ຄຸນ​ນະ​ພາບ​ດ້ານກະ​ສິ​ກຳ
error: Alert: ເນື້ອຫາຂ່າວມີລິຂະສິດ !!