ທ່ານນາຍົກລັດຖະມົນຕີ ເຄື່ອນໄຫວເຮັດວຽກຢູ່ເມືອງໄຊຈໍາພອນ

- PM - ທ່ານນາຍົກລັດຖະມົນຕີ ເຄື່ອນໄຫວເຮັດວຽກຢູ່ເມືອງໄຊຈໍາພອນ
- Untitled design - ທ່ານນາຍົກລັດຖະມົນຕີ ເຄື່ອນໄຫວເຮັດວຽກຢູ່ເມືອງໄຊຈໍາພອນ

ໃນຕອນເຊົ້າວັນທີ 10 ພຶດສະພາຜ່ານມານີ້, ທ່ານນາຍົກລັດຖະມົນຕີ ທອງລຸນ ສີສຸລິດ ພ້ອມດ້ວຍຄະນະ ໄດ້ເດີນທາງໄປເຄື່ອນໄຫວເຮັດວຽກ ແລະ ຊີ້ນໍາວຽກງານຢູ່ ເມືອງໄຊຈໍາພອນ ແຂວງ ບໍລິ ຄໍາໄຊ ໂດຍໄດ້ຮັບການຕ້ອນຮັບຈາກທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ແລະ ຄະນະປົກຄອງເມືອງໄຊຈໍາພອນ ແລະ ປະຊາຊົນດ້ຍຄວາມອົບອຸ່ນ. ພ້ອມໄດ້ຮັບຟັງລາຍງານສະພາບການພັດທະນາເສດຖະກິດ-ສັງຄົມຮອບດ້ານຂອງເມືອງໃນໄລຍະຜ່ານມາໃຫ້ທ່ານນາຍົກລັດຖະມົນຕີ ຊາບວ່າ: ເມືອງໄຊຈໍາພອນ ແມ່ນເມືອງພື້ນຖານການປະຕິວັດ ເປັນເມືອງແນວຫຼັງຍຸດທະສາດ ແລະ ເປັນເສັ້ນທາງຜ່ານຂອງບັນດາທ່ານຜູ້ນໍາ ໃນໄລຍະເຄື່ອນໄຫວການປະຕິວັດ; ສໍາລັບທີ່ຕັ້ງ ທິດຕາເວັນອອກ ແລະ ທິດເໜືອ ມີຊາຍແດນຮ່ວມກັນກັບ 4 ເມືອງຂອງແຂວງເຫງະອານ ແລະ ແຂວງຮ່າຕິ້ງ ສສ ຫວຽດນາມ, ທິດຕາເວັນຕົກຕິດກັບເມືອງ ວຽງທອງ, ທິດໃຕ້ຕິດກັບເມືອງ ຄໍາເກີດ. ມີເນື້ອທີ່ທັງໝົດ 2.545 ກິໂລຕາແມັດ ສ່ວນໃຫຍ່ແມ່ນພູດອຍກວມ 95%, ມີ 4 ກຸ່ມບ້ານ, 1 ຮາກຖານບ້ານໃຫຍ່, 18 ບ້ານ, ມີພົນລະເມືອງທັງໝົດ 11.262 ຄົນ. ການພັດທະນາ ດ້ານເສດຖະກິດນັບມື້ນັບດີຂຶ້ນ ສະເລ່ຍລາຍຮັບຕໍ່ຫົວຄົນປະມານ 823 ໂດລາຕໍ່ຄົນຕໍ່ປີ. ສະເລ່ຍເຂົ້າກິນຜູ້ໜຶ່ງໄດ້ຮັບເຂົ້າເປືອກປະມານ 359 ກິໂລ/ປີ. ທຸກບ້ານມີເສັ້ນທາງເຂົ້າເຖີງ, ປະຊາຊົນມໄດ້ຊົມໃຊ້ໄຟຟ້າກວມ 83,3% ຂອງຈໍານວນບ້ານທັງໝົດ, ການເຂົ້າເຖິງການບໍລິການດ້ານສາທາລະນະສຸກ ປະຕິບັດໄດ້ 85% ແລະ ວຽກງານອື່ນໆ​ກໍ່ໄດ້ຮັບການພັດທະນາ ແລະ ປັບປຸງດີຂຶ້ນ.

ໃນໂອກາດດຽວກັນນີ້ທ່ານ ນາຍົກລັດຖະມົນຕີ ກໍ່ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາ ຄາສູງຕໍ່ຜົນສໍາເລັດ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງ ໂດຍສະ ແດງໃຫ້ເຫັນເຖິງຄວາມສາມັກຄີ, ຄວາມເອົາໃຈໃສ່ ແລະ ການຕັດສິນໃຈຂອງຄະນະນໍາຂອງເມືອງ, ສິ່ງສໍາຄັນແມ່ນການປະກອບສ່ວນຂອງປະຊາຊົນບັນດາເຜົ່າ ເຊິ່ງໄດ້ເຮັດໃຫ້ພື້ນຖານໂຄງຮ່າງຂອງເມືອງ ໄດ້ຮັບການພັດທະນາຢ່າງກວ້າງຂວາງ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນ, ແຕ່ເພື່ອເຮັດໃຫ້ການພັດທະນາເສດຖະກິດ-ສັງຄົມຂອງເມືອງ ໄດ້ສືບຂະຫຍາຍຕົວຢ່າງຮອບດ້ານ, ສັງຄົມມີຄວາມສະຫງົບປອດໄພ, ທ່ານນາຍົກລັດຖະມົນຕີ ໄດ້ໃຫ້ທິດຊີ້ນໍາ  ໃຫ້ຄະນະນໍາ, ພະນັກງານທຸກຂັ້ນທົ່ວເມືອງ ໃຫ້ສືບຕໍ່ເອົາໃຈໃສ່ເສີມຂະຫຍາຍມູນເຊື້ອປະຕິວັດ, ຄວາມເສຍສະຫຼະ ແລະ ຄວາມພິລະອາດຫານ, ຄວາມສາມັກຄີອັນເປັນປຶກແຜ່ນ; ສືບຕໍ່ສຶກສາອົບຮົມວຽກງານການເມືອງແນວຄິດ ໃຫ້ແກ່ພະນັກງານ ແລະ ປະຊາຊົນ ພ້ອມກັບການແກ້ໄຂບັນດາປະກົດການຫຍໍ້ທໍ້ ແລະ ແນະນໍາຂະບວນການຜະລິດກະສິກໍາ ໃຫ້ແກ່ປະຊາຊົນ ໂດຍສະເພາະແມ່ນນໍາໃຊ້ທ່າແຮງບົ່ມຊ້ອນຂອງແຕ່ລະບ້ານໃຫ້ມີປະສິດທິຜົນ ເພື່ອກາຍເປັນສິນຄ້າ ຊ່ວຍໃຫ້ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນ ແລະ ກ້າວໄປສູ່ການຫລຸດພົ້ນອອກຈາກຄວາມທຸກຍາກໄດ້ໂດຍໄວ, ພ້ອມນີ້ ກໍໃຫ້ເອົາໃຈໃສ່ ໃນການຄຸ້ມຄອງ ແລະ ປົກປັກຮັກສາຊັບພະຍາກອນທໍາມະຊາດ  ຍືນຍົງ ແລະ ສາມາດນໍາໃຊ້ໄດ້ຍາວນານ.

- Wave100S AD to Website 2020 0 - ທ່ານນາຍົກລັດຖະມົນຕີ ເຄື່ອນໄຫວເຮັດວຽກຢູ່ເມືອງໄຊຈໍາພອນ
- WhatsApp Image 2020 05 27 at 5 - ທ່ານນາຍົກລັດຖະມົນຕີ ເຄື່ອນໄຫວເຮັດວຽກຢູ່ເມືອງໄຊຈໍາພອນ
- WhatsApp Image 2020 05 27 at 5 - ທ່ານນາຍົກລັດຖະມົນຕີ ເຄື່ອນໄຫວເຮັດວຽກຢູ່ເມືອງໄຊຈໍາພອນ
error: Alert: ເນື້ອຫາຂ່າວມີລິຂະສິດ !!