ເຈົ້າໜ້າທີ່ເລັ່ງສືບຫາຜູ້ຢູ່ເບື້ອງຫລັງຊ່ວຍນັກໂທດໂຕນຄ້າຍຄຸມຂັງດົງສະຫວາດ
ເຈົ້າໜ້າທີ່ ປກສ ເມືອງສີສັດຕະນາກ ໃຫ້ຮູ້ວ່າ: ປັດຈຸບັນ, ເຈົ້າໜ້າທີ່ຂອງຕົນພວມເລັ່ງສືບສວນ-ສອບສວນ ນັກໂທດທີ່ໂຕນຄ້າຍຄຸມຂັງດົງສະຫວາດທີ່ເຈົ້າໜ້າທີ່ສາມາດນໍາຈັບຕົວມາໄດ້ຈໍານວນໜຶ່ງຫາຜູ້ຢູ່ເບື້ອງຫລັງໃຫ້ການຊ່ວຍເຫລືອນັກໂທດຈໍານວນດັ່ງກ່າວສາມາດເຈາະຝາຫ້ອງນໍ້າ ແລະ ໂຕນອອກຈາກບ່ອນຄຸມຂັງໄດ້.
ເຈົ້າໜ້າທີ່ ໃຫ້ຮູ້ວ່າ: ເຫດການນີ້ເກີດຂຶ້ນເວລາປະມານ 19:00 ໂມງຂອງວັນທີ 11 ພຶດສະພານີ້, ໂດຍມີຜູ້ຖືກຫາ 10 ຄົນ ແລະ ນັກໂທດ 1 ຄົນຄື: ທ້າວ ຄຳຫລ້າ ອາຍຸ 28 ປີຢູ່ບ້ານທົ່ງພານທອງເມືອງສີສັດຕະນາກ, ຖືກກັກຕົວໃນວັນທີ 30 ພຶດສະພາ 2017 ສານໄດ້ຕັດອິດສະຫລະພາບ 5 ປີ (ນັກໂທດ), ທ້າວ ສົມຊາຍ (ດ່ອງ) ອາຍຸ 22 ປີຢູ່ບ້ານທົ່ງມັ່ງເມືອງໄຊທານີ ຖືກກັກຕົວໃນວັນທີ 11 ພຶດສະພາ 2017 ແລະ ທ້າວ ກ໋ອດ ອາຍຸ 17 ປີຢູ່ບ້ານທ່າສະຫວ່າງເມືອງໄຊທານີ ຖືກກັກຕົວໃນວັນທີ 30 ພຶດສະພາ 2017, ທ້າວ ທອບສະພອນ ອາຍຸ 17 ປີຢູ່ບ້ານສົມສະໜຸກເມືອງຫາດຊາຍຟອງ ຖືກກັກຕົວໃນວັນທີ 26 ກໍລະກົດ 2017 ແລະ ທ້າວ ໜຳ ອາຍຸ 26 ປີຢູ່ບ້ານກາງເມືອງ
ຫາດຊາຍຟອງ ຖືກກັກຕົວໃນວັນທີ 10 ມັງກອນ 2017, ທ້າວ ນ້ອຍ ອາຍຸ 33 ປີຖືກກັກຕົວໃນວັນທີ 19 ກັນຍາ 2017 ແລະ ທ້າວ ຖາວອນ (ອ້າຍ) ອາຍຸ 22 ປີ ຖືກກັກຕົວໃນວັນທີ 8 ພຶດສະພາ 2017 ຢູ່ບ້ານທົ່ງປົ່ງເມືອງສີໂຄດຕະບອງນະຄອນຫລວງວຽງຈັນ, ທ້າວ ວຽງຄຳ ອາຍຸ 24 ປີຢູ່ບ້ານໂພນເຄັງເມືອງໄຊເສດຖາ ຖືກກັກຕົວໃນວັນທີ 19 ກຸມພາ 2018 ຂໍ້ຫາຊື້-ຂາຍອາວຸດເສິກ, ທ້າວ ສຳລີ (ຕ໋ອກ) ອາຍຸ 34 ປີຢູ່ບ້ານດອນປ່າໃໝ່ເມືອງສີສັດຕະນາກ ຖືກກັກຕົວໃນວັນທີ 17 ຕຸລາ 2017 ໃນຂໍ້ຫາທຳຮ້າຍຮ່າງກາຍ-ມີອາວຸດເສິກໄວ້ຄອບຄອງ, ທ້າວ ພອນປະເສີດ ອາຍຸ 16 ປີຢູ່ບ້ານດອນດູ່ເມືອງຫາດຊາຍຟອງ ຖືກກັກຕົວໃນວັນທີ 27 ກຸມພາ 2018 ແລະ ທ້າວ ເພັງພະຈັນ ອາຍຸ 35 ປີຢູ່ບ້ານໂນນຂີ້ເຫລັກເມືອງສີໂຄດຕະບອງ ຖືກກັກຕົວໃນວັນທີ 30 ສິງຫາ 2017 ໃນຂໍ້ຫາລັກຊັບພົນລະເມືອງ, ໂດຍໄດ້ຮ່ວມກັນໂຕນໜີອອກຄ້າຍຄຸມຂັງດົງສະຫວາດ, ເມືອງສີສັດຕະນາກນະຄອນຫລວງວຽງຈັນ ແລະ ມາຮອດປັດຈຸບັນ, ເຈົ້າໜ້າທີ່ສາມາດຕິດຕາມຈັບຕົວນັກໂທດທີ່ຫລົບໜີມາໄດ້ 3 ຄົນແລ້ວຄື: ຄືທ້າວ ສຳລີ, ທ້າວ ອິນປອນ ແລະ ທ້າວ ພອນປະເສີດ. ສ່ວນທີ່ເຫລືອແມ່ນພວມສືບຕໍ່ຕິດຕາມນໍາຕົວມາດຳເນີນຄະດີຕາມລະບຽບກົດໝາຍໃຫ້ໄດ້ໂດຍໄວ.
ຜ່ານມາການສືບສວນ-ສອບສວນຂອງເຈົ້າໜ້າທີ່ພວກກ່ຽວໄດ້ຮັບສາລະພາບວ່າ: ອຸປະກອນທີ່ໃຊ້ເຈາະຝາຊີມັງຫ້ອງນ້ຳໃນຄ້າຍຄຸມຂັງແມ່ນມີຄົນຢູ່ທາງນອກໃຫ້ການຊ່ວຍເຫລືອ, ໂດຍໄດ້ພາກັນສະສົມເອົາສາຍຢາງຢືດມາເປຍເຮັດເປັນຈຸກແລ້ວມັດໃສ່ສາຍດ້າຍສານແຫ, ຈາກນັ້ນໄດ້ຍິງອອກທາງຊ່ອງລົມໄປນອກກຳແພງ, ໂດຍມີພັກພວກເອົາເຫລັກສະແລງ ແລະ ໃບເລື່ອຍຕັດເຫລັກມັດໃສ່ສາຍດ້າຍນັ້ນແລ້ວດຶງເຂົ້າມາ, ຈຶ່ງລົງມືເຈາະຝາຫ້ອງຂັງເປັນປ່ອງຂະໜາດຫລົມຄິງແລ້ວພາກັນລອດອອກຫ້ອງຂັງແລ້ວປີນກໍາແພງໂຕນໜີໄປ.
ເຈົ້າໜ້າທີ່ ໃຫ້ຮູ້ວ່າ: ສ່ວນຜູ້ໂຕນໜີທີ່ເຫລືອ ແລະ ຜູ້ທີ່ໃຫ້ການຊ່ວຍເຫລືອແມ່ນພວມສືບຕໍ່ຕິດຕາມຕົວມາດຳເນີນຄະດີຕາມກົດໝາຍໂດຍໄວ.
