FA ປັບເງິນ ເຊລຊີ ຫລັງຮັບຂໍ້ຫາຄຸມນັກເຕະບໍ່ໄດ້
ເຊລຊີ ຖືກສະມາຄົມບານເຕະອັງກິດ ສັ່ງປັບໄໝເງິນຈຳນວນ 20.000 ປອນ ຫລັງຍອມຮັບຂໍ້ຫາໃນກໍລະນີຄວບຄຸມນັກເຕະບໍ່ໄດ້ໃນເກມ ພຣີເມຍລີກ ອັງກິດ ທີ່ສະເໝີ ຮັດເດິ ສຟິລ ທາວ 1-1 ໃນອາທິດຜ່ານມາ.
ສະມາຄົມບານເຕະອັງກິດ (FA) ໄດ້ສັ່ງປັບໄໝເງິນສະໂມສອນ ເຊລຊີ ຈຳນວນ 20.000 ປອນ ຫລັງຈາກ ເຊລຊີ ຍອມຮັບຂໍ້ຫາທີ່ບໍ່ສາມາດຄວບຄຸມນັກເຕະຂອງຕົນເອງໄດ້ໃນເກມ ພຣີເມຍລີກ ອັງກິດ ທີ່ສະເໝີ ຮັດເດິສຟິລ ທາວ 1-1 ທີ່ສະໜາມສະແຕມຟອດ ບຣິດ ໃນວັນທີ 9 ພຶດສະພາ.
ເຫດການດັ່ງກ່າວເກີດຂຶ້ນກ່ອນຊ່ວງພັກເຄິ່ງ ໂດຍໃນເວລານັ້ນທີມຂອງຜູ້ຈັດການທີມ ອັນໂຕນິໂອ ຄອນເຕ້ ໄດ້ລູກເຕະມຸມ ແຕ່ ລີ ເມສັນ ຜູ້ຕັດສິນ ຕັດສິນໃຈເປົ່າໝາກຫວີດໝົດເວລາທັນທີ ຈາກກໍລະນີນັ້ນເຮັດໃຫ້ 3 ນັກເຕະຂອງ ເຊລຊີ ຄື ອັນໂຕນິໂອ ຣືດິເກີ, ເຊຊາ ອັຊປິລິກວຍຕ້າ ແລະ ເຊສ ຟາເບຣກາສ ເຂົ້າໄປປະທ້ວງ ເມສັນ ກ່ອນທີ່ ຄາໂລ ຄູດິຊິນີ ຜູ້ຊ່ວຍຜູ້ຈັດການທີມ ເຊລຊີ ເຂົ້າໄປເຈລະຈາກັບ ເມສັນ ແລະ ຈະເຂົ້າໄປດຶງ ຣືດິເກີ ອອກມາ.
FA ຖະແຫລງວ່າ: ເຊລຊີ ຖືກສັ່ງປັບເງິນຈຳນວນ 20.000 ປອນ ຫລັງຈາກຍອມຮັບຂໍ້ຫາລົ້ມເຫລວໃນການຄວບຄຸມນັກເຕະ ແລະ ເຈົ້າໜ້າທີ່ທີມຂອງພວກເຂົາໃຫ້ຢູ່່ໃນລະບຽບໄດ້ ເຫດການເກີດຂຶ້ນໃນຊ່ວງພັກເຄິ່ງລະຫວ່າງເກມພົບ ຮັດເດິສຟິລ ທາວ ໃນວັນທີ 9 ພຶດສະພາ.
