ພົບລະເບີດສະໄໝສົງຄາມ ໜັກ 340 ກິໂລ ຢູ່ເມືືອງບົວລະພາ
ໃນອາທິດທີ່ຜ່ານມາ ອົງການ MAG Laos ໄດ້ກວດພົບລະເບີດໃຫ່ຍນໍ້າໜັກ 750 ປອນ ຫຼື 340 ກິໂລ, ໄກຈາກຊຸມຊົນພຽງ 150 ແມັດ ແລະ ເລິກຈາກໜ້າດີນ 170 ຊັງຕີແມັດ; ຢູ່ບ້ານໂພນ,ເມືອງບົວລະພາ ແຂວງຄໍາມ່ວນ. ຜ່ານການກວດສອບຂອງຊ່ຽວຊານ ແລະ ວິຊາການ ເຫັນວ່າລະເບິດດັ່ງກ່າວມີຄວາມປອດໄພໃນການເຄື່ອນຍ້າຍ ເພື່ອໄປທຳລາຍໃນເຂດທີ່ມີຄວາມປອດໄພ.
ການພົບເຫັນລະເບີດດັ່ງກ່າວ ສົ່ງຜົນເຮັດໃຫ້ປະຊາຊົນ ມີຄວາມລະແວງແລະເປັນໄປຂົ່ມຄູ່ຕໍ່ການທຳມາຫາກິນ ເຊິ່ງນັກວິຊາການ ຂອງອົງການເກັບກູ້ລະເບີດບໍ່ທັນແຕກໃນລາວ ຄາດເດົາວ່າ ຍັງມີລະເບີດບໍ່ທັນແຕກໃນໃຕ້ດິນປະມານ30% ຂອງຈຳນວນລະເບີດບໍ່ທັນແຕກທັງໝົດຢູໃນລາວເຮົາ ເຊິ່ງຕ້ອງໃຊ້ເວລາໃນການເກັບກູ້.
ຄະນະກຳມະການຄຸ້ມຄອງ ແຫ່ງຊາດເພື່ອການແກ້ໄຂບັນ ຫາລະເບີດບໍ່ທັນແຕກທີ່ຕົກຄ້າງ ຢູ່ ສປປ ລາວ ( ຄຊລ ) ໄດ້ເປີດເຜີຍໃຫ້ຮູ້ວ່າ: ນັບແຕ່ປີ1996-2016 ຢູ່ລາວເຮົາສາມາດເກັບກູ້ລະເບີດບໍ່ທັນແຕກອອກ ເນື້ອທທີ່ຫຼາຍ ກວ່າ 60 ພັນເຮັກຕາ,ໃນນັ້ນ 40 ພັນກວ່າເຮັກຕາ ແມ່ນເນື້ອທີ່ກະສິກຳ, ຫຼາຍກວ່າ 20 ພັນເຮັກຕາແມ່ນເນື້ອທີ່ພັດ ທະນາຕ່າງໆ, ລະເບີດບໍ່ທັນແຕກ ຫຼາຍກວ່າ 1,7 ລ້ານໜ່ວຍໄດ້ ຖືກທຳລາຍ. ໃນນັ້ນ, ມີລະເບີດ ບົມໃຫຍ່ຫຼາຍກວ່າ 7.500 ໜ່ວຍ, ລະເບີດລູກຫວ່ານ 8 ແສນກວ່າໜ່ວຍ, ລະເບີດຝັງດິນ 7 ພັນກວ່າໜ່ວຍ ແລະ ລະເບີດ ຊະນິດອື່ນໆ 9 ແສນກວ່າໜ່ວຍ.
ສປປ ລາວ ເປັນປະເທດທີ່ ຖືກ ຖິ້ມລະເບີດທາງອາກາດຢ່າງ ໜັກໜ່ວງທີ່ສຸດໃນໄລຍະສົງ ຄາມອິນດູຈີນລະຫວ່າງ ປີ 1964-1973, ມີລະເບີດຖືກຖິ້ມລົງໃສ່ ແຜ່ນດິນລາວຫຼາຍກວ່າ 2 ລ້ານ ໂຕນ, ໃນນັ້ນສ່ວນຫຼາຍ ແມ່ນ ລະເບີດລູກຫວ່ານ ( ບົມບີ ) ລະເບີດດັ່ງກ່າວມີປະມານ 270 ລ້ານໜ່ວຍ ແລະ ຍັງມີ ປະມານ 30% ບໍ່ທັນແຕກ,ຊິ່ງລັດຖະບານໃຫ້ຄວາມສຳຄັນໃນການແກ້ ໄຂບັນຫາລະເບີດບໍ່ທັນແຕກ, ໄດ້ອອກຄຳສັ່ງເລກທີ 39/ນຍ ລົງວັນທີ 28 ກັນຍາ 2016 ວ່າດ້ວຍການເພີ່ມທະວີ ວຽກງານແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ ແຕ່ນີ້ຮອດປີ 2030 ຮັບປະກັນໃຫ້ຈຳນວນຜູ້ ຖືກບາດເຈັບ ແລະ ເສຍຊີວິດ ຈາກລະເບີດດັ່ງກ່າວສາມາດຫຼຸດຜ່ອນລົງໃນແຕ່ລະປີ.
