ລັດຖະມົນຕີຕ່າງປະເທດຕ້ອນຮັບບັນດາທູດຕ່າງປະເທດປະຈຳລາວຄົນໃໝ່

ລັດຖະມົນຕີຕ່າງປະເທດຕ້ອນຮັບບັນດາທູດຕ່າງປະເທດປະຈຳລາວຄົນໃໝ່ - slermxay - ລັດຖະມົນຕີຕ່າງປະເທດຕ້ອນຮັບບັນດາທູດຕ່າງປະເທດປະຈຳລາວຄົນໃໝ່
ລັດຖະມົນຕີຕ່າງປະເທດຕ້ອນຮັບບັນດາທູດຕ່າງປະເທດປະຈຳລາວຄົນໃໝ່ - Untitled design - ລັດຖະມົນຕີຕ່າງປະເທດຕ້ອນຮັບບັນດາທູດຕ່າງປະເທດປະຈຳລາວຄົນໃໝ່

ໃນວັນທີ 14 ມິຖຸນານີ້, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ກຽດຕິຄຸນ ຊາດປຣະເສີດ ເອກອັກຄະຣາຊະທູດວິສາມັນຜູ້ມີອໍານາດເຕັມແຫ່ງຣາຊະອານາຈັກໄທ ແລະ ທ່ານ ຣ.ປ. ປຣະຕິໂຕ ຊູຮາຣິໂຢ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງສາທາລະນະລັດ ອິນໂດເນເຊຍ ປະຈໍາລາວຄົນໃໝ່ ຕາມລຳດັບ, ພາຍຫລັງທີ່ໄດ້ຍື່ນສານຕາຕັ້ງຕໍ່ປະທານປະເທດແຫ່ງ ສປປ ລາວ ຜ່ານມາ.

ໃນໂອກາດຕ້ອນຮັບທ່ານທູດໄທຄົນໃໝ່ຄັ້ງນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືຖານບ້ານໃກ້ເຮືອນຄຽງ ທີ່ເປັນມູນເຊື້ອອັນດີງາມມາແຕ່ບູຮານນະການ ລະຫວ່າງສອງປະເທດ ແລະ ປະຊາຊົນສອງຊາດລາວ-ໄທ ທີ່ໄດ້ຮັບການເສີມຂະຫຍາຍຂຶ້ນເລື້ອຍໆ ນັບຕັ້ງແຕ່ໄດ້ສ້າງຕັ້ງສາຍພົວພັນການທູດນໍາກັນມາເປັນເວລາ 68 ປີ (19 ທັນວາ 1950), ພ້ອມທັງຕີລາຄາສູງຕໍ່ຜົນການຢ້ຽມຢາມ ແລະ ພົບປະຂອງບັນດາການນໍາຂັ້ນສູງລະຫວ່າງສອງປະເທດໃນໄລຍະຜ່ານມາ ໂດຍສະເພາະການຢ້ຽມຢາມໄທຂອງທ່ານປະທານສະພາແຫ່ງຊາດ ສປປ ລາວ, ໃນວັນທີ 1-2 ມິຖຸນາທີ່ຜ່ານມານີ້, ຊຶ່ງເປັນການຮັດແໜ້ນສາຍພົວພັນມິດຕະພາບ ແລະ ເສີມຂະຫຍາຍການຮ່ວມມືອັນເປັນມູນເຊື້ອທີ່ດີງາມຖານປະເທດບ້ານໃກ້ເຮືອນຄຽງທີ່ດີ ແລະ ປະເທດເພື່ອນມິດອາຊຽນດ້ວຍກັນໃຫ້ແໜ້ນແຟ້ນຍິ່ງໆຂຶ້ນ. ພ້ອມນັ້ນ, ທັງສອງທ່ານກໍໄດ້ເຫັນດີທີ່ຈະຊຸກຍູ້ໃຫ້ບັນດາຂະແໜງການທີ່ກ່ຽວຂ້ອງຂອງສອງປະເທດ ສືບຕໍ່ຈັດຕັ້ງປະຕິບັດບັນດາບັນທຶກກອງປະຊຸມ ທີ່ໄດ້ຕົກລົງຮ່ວມກັນ ເຊັ່ນ: ກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມື (JC) ລາວ-ໄທ ຄັ້ງທີ 21, ກອງປະຊຸມເຈົ້າແຂວງ ແລະ ຜູ້ວ່າຣາຊະການຈັງຫວັດຄັ້ງທີ 10, ກອງປະຊຸມຄະນະກຳມາທິການຊາຍແດນຮ່ວມ (JBC) ລາວ-ໄທຄັ້ງທີ 11, ກອງປະຊຸມຄະນະກຳມາທິການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປ (GBC) ລາວ-ໄທຄັ້ງທີ 24 ແລະ ອື່ນໆ, ໂດຍສະເພາະຂອບການຮ່ວມມືຕ່າງໆທັງຂັ້ນສູນກາງ ແລະ ທ້ອງຖິ່ນ ເປັນຕົ້ນແມ່ນບັນດາແຂວງ ແລະ ຈັງຫວັດທີ່ມີຊາຍແດນຮ່ວມກັນ ໃຫ້ໄດ້ຮັບການຈັດຕັ້ງປະຕິບັດເປັນຮູບປະທໍາ. ນອກນັ້ນ, ທັງສອງຝ່າຍ ຍັງໄດ້ສະແດງຄວາມຊົມເຊີຍຕໍ່ຄວາມຄືບໜ້າວຽກງານຊາຍແດນທີ່ທັງສອງຝ່າຍໄດ້ພ້ອມກັນສໍາຫຼວດ ແລະ ປັກຫຼັກໝາຍຊາຍແດນຮ່ວມກັນ, ໂດຍປະຕິບັດຕາມຂໍ້ຕົກລົງຂອງກອງປະຊຸມ JBC ລາວ-ໄທຄັ້ງທີ 11 ທີ່ຜ່ານມາ.

ໃນເວລາຕໍ່ມາ, ທ່ານລັດຖະມົນຕີ ສະເຫຼີມໄຊ ກົມມະສິດ ກໍໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານທູດອິນໂດຄົນໃໝ່, ຊຶ່ງທ່ານລັດຖະມົນຕີເຫັນວ່າ ການພົວພັນທາງດ້ານການທູດ ລະຫວ່າງສອງປະເທດ ແມ່ນພວມໄດ້ຮັບການເສີມຂະຫຍາຍຂື້ນເລື້ອຍໆ ນັບຕັ້ງແຕ່ໄດ້ສ້າງຕັ້ງສາຍພົວພັນການທູດນຳກັນເປັນເວລາ 60 ປີ (30 ສິງຫາ 1957), ພິເສດ ໃນປີ 2017 ທັງສອງປະເທດ ກໍໄດ້ຮ່ວມຈັດກິດຈະກຳຫລາຍຢ່າງ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ-ອິນໂດເນເຊຍຄົບຮອບ 60 ປີ. ພ້ອມນັ້ນ, ສອງຝ່າຍຍັງໄດ້ເຫັນດີຊຸກຍູ້ການຈັດຕັ້ງປະຕິບັດບັນດາບົດບັນທຶກຄວາມເຂົ້າໃຈທາງພາກລັດທີ່ໄດ້ລົງນາມຮ່ວມກັນໃນຊຸມປີຜ່ານມາ, ໂດຍສະເພາະແມ່ນບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານການສຶກສາຂັ້ນສູງ, ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານການສຶກສາ ແລະ ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານການຄວບຄຸມຢາເສບຕິດ, ພ້ອມທັງສະແດງຄວາມຍິນດີທີ່ຈະຊຸກຍູ້ໃຫ້ທັງສອງຝ່າຍເອົາໃຈໃສ່ໃນການຈັດຕັ້ງປະຕິບັດເນື້ອໃນບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານຫັດຖະກຳທີ່ເຫັນວ່າ ຝ່າຍອິນໂດເນເຊຍມີທ່າແຮງທາງດ້ານເຕັກນິກດ້ານຫັດຖະກຳແກະສະລັກໄມ້ ແລະ ຝ່າຍລາວມີທ່າແຮງທາງດ້ານວັດຖຸ, ຊຶ່ງຈະເປັນການດີໃນການສົ່ງເສີມການແກະສະຫລັກໄມ້ລະຫວ່າງລາວ-ອິນໂດເນເຊຍ ເພື່ອສົ່ງອອກຂາຍພາຍໃນ, ພາກພື້ນ ແລະ ສາກົນ.

ລັດຖະມົນຕີຕ່າງປະເທດຕ້ອນຮັບບັນດາທູດຕ່າງປະເທດປະຈຳລາວຄົນໃໝ່ - Wave100S AD to Website 2020 0 - ລັດຖະມົນຕີຕ່າງປະເທດຕ້ອນຮັບບັນດາທູດຕ່າງປະເທດປະຈຳລາວຄົນໃໝ່

ໃນໂອກາດນີ້, ທ່ານ ສະເຫຼີມໄຊ ກົມມະສິດ ຍັງໄດ້ສະແດງຄວາມຊົມເຊີຍ ແລະ ຍິນດີຕ້ອນຮັບ ທ່ານ ກຽດຕິຄຸນ ຊາດປຣະເສີດ ແລະ ທ່ານ ຣ.ປ.ປຣະຕິໂຕ ຊູຮາຣິໂຢ ທີ່ໄດ້ຮັບການແຕ່ງຕັ້ງໃຫ້ມາດໍາລົງຕໍາແໜ່ງເປັນເອກອັກຄະລັດຖະທູດຄົນໃໝ່ປະຈໍາລາວ, ພ້ອມທັງສະແດງຄວາມເຊື່ອໝັ້ນວ່າ ທ່ານທູດທັງສອງຈະປະຕິບັດໜ້າທີ່ສຸດຄວາມສາມາດຂອງຕົນ ເພື່ອປະກອບສ່ວນເຂົ້າໃນການເຄື່ອນໄຫວຊຸກຍູ້ສົ່ງເສີມການພົວພັນຮ່ວມມືລະຫວ່າງສອງປະເທດລາວ-ໄທ, ລາວ-ອິນໂດເນເຊຍ ໃຫ້ນັບມື້ຈະເລີນງອກງາມຍິ່ງໆຂຶ້ນ ແລະ ນໍາເອົາຜົນປະໂຫຍດສູງສຸດມາສູ່ປະຊາຊົນສອງຊາດ.

ລັດຖະມົນຕີຕ່າງປະເທດຕ້ອນຮັບບັນດາທູດຕ່າງປະເທດປະຈຳລາວຄົນໃໝ່ - WhatsApp Image 2020 05 27 at 5 - ລັດຖະມົນຕີຕ່າງປະເທດຕ້ອນຮັບບັນດາທູດຕ່າງປະເທດປະຈຳລາວຄົນໃໝ່
ລັດຖະມົນຕີຕ່າງປະເທດຕ້ອນຮັບບັນດາທູດຕ່າງປະເທດປະຈຳລາວຄົນໃໝ່ - WhatsApp Image 2020 05 27 at 5 - ລັດຖະມົນຕີຕ່າງປະເທດຕ້ອນຮັບບັນດາທູດຕ່າງປະເທດປະຈຳລາວຄົນໃໝ່
error: Alert: ເນື້ອຫາຂ່າວມີລິຂະສິດ !!