ຫລຸດຄວາມພິການໃນເດັກໂດຍແປ້ງເຂົ້າໜົມປັງເສີມກົດໂຟລິກ

ຜູ້ຊ່ຽວຊານໃນອັງກິດເປີດເຜີຍຜົນການວິໄຈທີ່ສະໜັບສະໜູນຂໍ້ຮຽກຮ້ອງໃຫ້ມີການເສີມກົດໂຟລິກໃນແປ້ງເຮັດເຂົ້າໜົມປັງ ເຊິ່ງເປັນຄວາມເຄື່ອນໄຫວທີ່ອາດຈະຊ່ວຍປ້ອງກັນບັນຫາຄວາມພິການຮຸນແຮງແຕ່ກຳເນີດຂອງເດັກໄດ້ເປັນຈຳນວນຫລາຍ.

ຜົນການສຶກສາທີ່ຕີພິມໃນວາລະສານ  Archives of Disease in Childhood ລະບຸວ່າ : ນະໂຍບາຍທີ່ອັງກິດໃຊ້ຢູ່ປະຈຸບັນບໍ່ໄດ້ຜົນ ແລະ ຄວນເຮັດຕາມສະຫະລັດອາເມລິກາທີ່ກຳນົດໃຫ້ບໍລິສັດຜູ້ຜະລິດເສີມກົດໂຟລິກໃນແປ້ງສຳລັບເຮັດເຂົ້າໜົມປັງ ໂດຍມາດຕະການດັ່ງກ່າວຊ່ວຍຫລຸດການຖືພາລູກທີ່ມີບັນຫາຫລອດປະສາດບໍ່ປິດ NTD ເຊິ່ງເປັນຄວາມຜິດປົກກະຕິທີ່ເກີດຂຶ້ນກັບສະໝອງ, ກະດູກສັນຫລັງ ຫລື ໄຂສັນຫລັງໃນສະຫະລັດອາເມລິກາໄດ້ເຖິງ 23% ນັບແຕ່ເລີ່ມໃຊ້ນະໂຍບາຍໃນປີ 1998  ແລະ ຕີລາຄາວ່າຫາກອັງກິດດຳເນີນນະໂຍບາຍດຽວກັນນີ້ມາກ່ອນ ກໍອາດຈະຊ່ວຍຫລຸດບັນຫາດັ່ງກ່າວທີ່ເກີດຂຶ້ນລະຫ່ວາງປີ 1998 – 2012 ລົງໄດ້ ຫລື ປະມານ 2.000 ຄົນ.

ສາດສະດາຈານ ໂຈນ ມໍຣິສ ຫົວໜ້າທີມວິໄຈຈາກສະຖາບັນເວດຊະສາດປ້ອງກັນວູລສັນ ມະຫາວິທະຍາໄລລອນດອນ ບອກ ວ່າ : ການໃສ່ກົດໂຟລິກໃນແປ້ງເຂົ້າໜົມປັງມີຄວາມປອດໄພ ແລະ  ມີແຕ່ຈະກໍ່ໃຫ້ເກີດຜົນດີ ແຕ່ເອີຣົບຊຳ້ພັດເປັນພູມີພາກດຽວທີ່ບໍ່ມີນະໂຍບາຍເສີມກົດໂຟລິກໃນແປ້ງເຂົ້າໜົມປັງ ເຖິງວ່າຈະມີຫລັກຖານບົ່ງບອກວ່າມັນຈະຊ່ວຍຫລຸດຄວາມສ່ຽງຕໍ່ການເກີດພະຍາດ  NTD ໄດ້ເຖິງ 70% ກໍຕາມ.

ດຣ. ອະລິສັນ ເທັດສະໂຕນ ຫົວໜ້ານັກໂພຊະນາການຂອງສຳນັກງານສາທາລະນະສຸກອັງກິດ ລະບຸວ່າ : ວຽກງານວິໄຈນີ້ເນັ້ນເຖິງຄວາມສຳຄັນທີ່ແມ່ຍິງຖືພາ ລວມທັງຜູ້ວາງແຜນ ຫລື ມີທ່າອ່ຽງຈະຖືພາ ຄວນບໍລິໂພກອາຫານເສີມທີ່ມີກົດໂຟລິກມື້ລະ 400 ໄມໂຄຣກຣາມ ໃນໄລຍະກ່ອນຖືພາ ໄປຈົນເຖິງໄລຍະອາທິດທີ 12 ຂອງການຖືພາ.

ທັງນີ້ ກົດໂຟລິກພົບໃນອາຫານປະເພດຜັກໃບຂຽວ, ຖົ່ວ ແລະ ເຂົ້າໜົມປັງທີ່ມີສ່ວນປະສົມຂອງທັນຍາພືດເຕັມແກ່ນ, ແຕ່ ເປັນເລື່ອງຍາກຫລາຍທີ່ແມ່ຍິງຖືພາຈະໄດ້ຮັບກົດໂຟລິກໃນປະລິມານທີ່ເໝາະສົມຈາກການກິນອາຫານພຽງຢ່າງດຽວ ດັ່ງນັ້ນໃນປີ 1992 ກະຊວງສາທາລະນະສຸກຂອງອັງກິດ ຈຶ່ງແນະນຳໃຫ້ແມ່ຍິງຖືພາກິນອາຫານເສີມກົດໂຟລິກກ່ອນຖືພາ.

ປະຈຸບັນສະຫະລັດອາເມລິກາ ແລະ ອີກ 77 ປະເທດໄດ້ໃຊ້ນະໂຍບາຍເສີມກົດໂຟລິກໃນແປ້ງເຂົ້າໜົມປັງ, ແຕ່ລັດຖະບານອັງກິດຍັງບໍ່ດຳເນີນນະໂຍບາຍດັ່ງກ່າວເຖິງຈະມີສຽງຮຽກຮ້ອງມາຈາກ ຫລາຍໆຝ່າຍກໍຕາມ.