ຜູ້ນຳຟີລິບປິນປະກາດເດີນໜ້າ ເຮັດສົງຄາມຢາເສບຕິດ
ປະທານາທິບໍດີ ໂຣດຣິໂກ ດູເຕີເຕ ຢືນຢັນການເດີນໜ້າໃຊ້ “ມາດຕະການຂັ້ນເດັດຂາດ” ໃນການກວາດລ້າງຢາເສບຕິດ, ການເລັ່ງແກ້ໄຂບັນຫາເສດຖະກິດ ແລະ ການຊຸກຍູ້ກໍ່ຕັ້ງ “ເຂດປົກຄອງຕົນເອງບັງຊາໂມໂຣ”.
Pres. Duterte: “Your concern is human rights. Mine is human lives.” #SONA2018 pic.twitter.com/WbvUPPbewY
— GMA Integrated News (@gmanews) July 23, 2018
ສຳນັກຂ່າວຕ່າງປະເທດລາຍງານວ່າ: ປະທານາທິບໍດີ ໂຣດຣິໂກ ດູເຕີເຕ ຖະແຫລງນະໂຍບາຍປະຈຳປີຕໍ່ລັດຖະສະພາ ໃນວັນທີ 23 ກໍລະກົດ ມີເນື້ອໃນສຳຄັນຄືການເດີນໜ້ານະໂຍບາຍສົງຄາມຢາເສບຕິດຕໍ່ໄປໃນລະດັບທີ່ຈິງຈັງຄືມື້ທຳອິດ ແລະ ກ່າວເຖິງການທີ່ຄະນະໄອຍະການຂອງສານອາຍາສາກົນ (ICC) ໃນນະຄອນຫລວງເຮັກ ກຳລັງດຳເນີນການສືບສວນ-ສອບສວນ ເພື່ອຮວບຮວມຫລັກຖານໃນເລື່ອງນີ້ວ່າ: ICC ອ້າງຄວາມກັງວົນເລື່ອງ “ສິດທິມະນຸດ”, ແຕ່ສຳລັບທ່ານ “ຊີວິດຂອງປະຊາຊົນ” ສຳຄັນກວ່າ ເພາະການກວາດລ້າງຢາເສບຕິດຈະຊ່ວຍຮັກສາຊີວິດຂອງຄອບຄົວໄດ້ອີກເປັນຈຳນວນຫລາຍ.
ຂະນະດຽວກັນ, ຜູ້ນຳຟີລິບປິນກ່າວເຖິງນະໂຍບາຍເສດຖະກິດ ລວມທັງການຮຽກຮ້ອງໃຫ້ສະພາເລັ່ງຜ່ານຮ່າງກົດໝາຍປະຕິຮູບແຮງງານສະບັບໃໝ່ ເພື່ອເພີ່ມຄວາມເປັນທຳໃຫ້ແກ່ສັນຍາຈ້າງງານໄລຍະສັ້ນ, ການແກ້ໄຂການຜູກຂາດຕະຫລາດສື່ສານ ແລະ ເຕັກໂນໂລຊີຂໍ້ມູນຂ່າວສານໃນປະເທດທີ່ມີບໍລິສັດພຽງ 2 ແຫ່ງຮ່ວມກັນຜູກຂາດຕະຫລາດ ໂດຍທ່ານ ດູເຕີເຕ ກ່າວວ່າ: ທ່ານກຳລັງພິຈາລະນາການສະເໜີລາຄາຈາກບໍລິສັດທັງໃນ ແລະ ຕ່າງປະເທດ ເພື່ອໃຫ້ເປັນ “ທາງເລືອກທີສາມ” ແກ່ປະຊາຊົນ ແລະ ການເພີ່ມຄວາມຈິງຈັງໃນການແກ້ໄຂບັນຫາສິ່ງແວດລ້ອມ.
