ວີໂວນາມ ເດີນທາງເຂົ້າຮ່ວມຊີງແຊ້ມອາຊຽນ ຄັ້ງທີ 5 ທີ່ມຽນມາ
ໃນວັນທີ 7 ສິງຫານີ້ ທີ່ສະໜາມບິນວັດໄຕ ນະຄອນຫລວງວຽງຈັນ ສະຫະພັນວິໂວນາມ ໄດ້ເດີນທາງເຂົ້າຮ່ວມຊີງແຊ້ມອາຊຽນຄັ້ງທີ 5 ທີ່ປະເທດມຽນມາ ທີ່ຈະຂຶ້ນລະຫວ່າງວັນທີ 7-12 ສິງຫານີ້ ເຊິ່ງນໍາໂດຍທ່ານ ວຽງສຸກ ຮັ່ງເງິນ ຄູຝຶກນັກກິລາວີໂວນາມ ພ້ອມດ້ວຍນັກກິລາ 3 ຄົນ.
ຕາມການໃຫ້ສໍາພາດຂອງທ່ານ ວຽງສຸກ ຮັ່ງເງິນ ວ່າ: ການແຂ່ງຂັນຄັ້ງນີ້ ພວກເຮົາໄດ້ສົ່ງນັກກິລາໂວວີນາມລາວ 3 ຄົນ ປະກອບມີທ້າວ ໄພລັດ ທຳມະວົງສາ ເຈົ້າຂອງຫລຽນຄຳຊີເກມ 2 ສະໄໝຊ້ອນ 2011 ແລະ 2013 ຈະລົງແຂ່ງປະເພດຕໍ່ສູ້ ລຸ້ນນໍ້າຫນັກ 60 ກິໂລ ແລະ ປະເພດຟ້ອນປະກອບອາວຸດໄມກະທາ, ນາງ ພິກສະໄໝ ອິນສຸມັງ ຈະລົງແຂ່ງປະເພດຟ້ອນປະກອບອາວຸດດາບຄູ່ ແລະ ນາງ ມາລາ ຈັນທະລັກສາ ຈະລົງແຂ່ງປະເພດຕໍ່ສູ້ ລຸ້ນນໍ້າຫນັກ 48 ກິໂລ ແລະ ປະເພດຟ້ອນ 2 ລາຍການຄື: ປະກອບອາວຸດດາບຄູ່ ແລະ ມືເປົ່າທ່າມັງກອນປະສານທ່າເສືອ.
ລາຍການນີ້ ມີຊິງໄຊທັງຫມົດ 35 ລາຍການ ລວມປະເພດຟ້ອນ ແລະ ຕໍ່ສູ້ ໂດຍມີນັກກິລາຈາກ 8 ປະເທດໃນອາຊຽນເຂົ້າຮ່ວມເຊັ່ນ: ກຳປູເຈຍ, ອິນໂດເນເຊຍ, ສປປ ລາວ, ຟິລິບປິນ, ໄທ, ຫວຽດນາມ, ຕີມໍເລສເຕ ແລະ ມຽນມາເຈົ້າພາບ.
