ເມື່ອບໍ່ດົນຜ່ານມາ, ສະພາກາແດງ ອົດສະຕຣລີ ແລະ ສະພາກາແດງສະວິດສ ໄດ້ນໍາເອົາເຄື່ອງຊ່ວຍເຫຼືອບັນເທົາທຸກ ມາມອບໃຫ້ແກ່ອົງການກາແດງລາວ ເພື່ອນໍາໄປຊ່ວຍເຫຼືອປະຊາຊົນຜູ້ປະສົບໄພນໍ້າຖ້ວມ ຢູ່ເມືອງສະໜາມໄຊ ແຂວງອັດຕະປື, ທີ່ໄດ້ຮັບຜົນກະທົບຈາກເຂື່ອນເຊປ່ຽນ-ເຊນໍ້ານ້ອຍທະລຸ ເມື່ອວັນທີ 23 ກໍລະກົດ ຜ່ານມາ. ຊຶ່ງເຄື່ອງຊ່ວຍເຫຼືອດັ່ງກ່າວປະກອບມີ: ມຸ້ງ 500 ຝືນ ແລະ ຜ້າຢາງ 500 ແຜ່ນ ລວມມີມູນຄ່າ 10.520 ໂດລາ, ນອກນັ້ນ, ຍັງມີເຄື່ອງອຸປະໂພກ-ບໍລິໂພກຈໍານວນໜຶ່ງ ມູນຄ່າ 32 ລ້ານກວ່າກີບ. ເຄື່ອງດັ່ງກ່າວໄດ້ນໍາໄປແຈກຢາຍໃຫ້ປະຊາຊົນໃນ 4 ບ້ານເຊັ່ນ: ສະໜອງໃຕ້, ຫີນລາດ, ທ່າຫີນ ແລະ ທ່າແສງຈັນ ຊຶ່ງໄດ້ເລີ່ມແຈກຢາຍມາແຕ່ວັນທີ 13 ສິງຫາ ເປັນຕົ້ນມາ.
