ຫົວຫນ້າ​ຄະນະ​ຈັດຕັ້ງສູນ​ກາງ​ພັກ​ເນັ້ນຫລາຍ​ບັນຫາ​ໃຫ້​ຄະນະ​ພັກ ກຊສ ​ເອົາ​ໃຈ​ໃສ່​ປັບປຸງ​​ແກ້​ໄຂ

- Head - ຫົວຫນ້າ​ຄະນະ​ຈັດຕັ້ງສູນ​ກາງ​ພັກ​ເນັ້ນຫລາຍ​ບັນຫາ​ໃຫ້​ຄະນະ​ພັກ ກຊສ ​ເອົາ​ໃຈ​ໃສ່​ປັບປຸງ​​ແກ້​ໄຂ
- Untitled design - ຫົວຫນ້າ​ຄະນະ​ຈັດຕັ້ງສູນ​ກາງ​ພັກ​ເນັ້ນຫລາຍ​ບັນຫາ​ໃຫ້​ຄະນະ​ພັກ ກຊສ ​ເອົາ​ໃຈ​ໃສ່​ປັບປຸງ​​ແກ້​ໄຂ

ກອງປະຊຸມຄົບຄະນະບໍລິຫານງານພັກກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ (ກຊສ) ຄັ້ງທີ 7 ສະໄຫມທີ I ໄດ້ຈັດຂຶ້ນໃນວັນທີ 27 ສິງຫານີ້, ໂດຍການເປັນປະທານຂອງສະຫາຍ ສົມມາດ ພົນເສນາ ກໍາມະການສູນກາງພັກ, ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ໂດຍການໃຫ້ກຽດເຂົ້າຮ່ວມຂອງສະຫາຍ ຈັນສີ ໂພສີຄໍາ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວຫນ້າຄະນະຈັດຕັ້ງສູນກາງພັກ. ກອງປະຊຸມໄດ້ຮັບຟັງບົດສະຫລຸບການຊີ້ນໍາ-ນໍາພາຂອງຄະນະພັກກະຊວງໃນໄລຍະກາງສະໄຫມ ແລະ ທິດທາງແຜນການໄລຍະທ້າຍສະໄຫມ, ຮ່າງບົດສະຫລຸບ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2018 ຂອງຄະນະພັກກະຊວງ, ຮ່າງບົດລາຍງານກ່ຽວກັບວຽກງານປ້ອງກັນພັກແລະ ແຜນການກະກຽມດໍາເນີນກອງປະຊຸມໃຫຍ່ຂອງອົງຄະນະພັກກະຊວງ, ຄະນະພັກຮາກຖານແລະ ບັນດາຫນ່ວຍພັກທີ່ຂຶ້ນກັບກະຊວງ.

ໃນໂອກາດນີ້, ສະຫາຍຈັນສີ ໂພສີຄໍາ ໄດ້ໂອ້ລົມຕໍ່ຄະນະພັກກະຊວງດັ່ງກ່າວໃຫ້ສືບຕໍ່ເອົາໃຈໃສ່ໃນການນໍາພາຄົ້ນຄວ້າແລະ ຜັນຂະຫຍາຍເນື້ອໃນຈິດໃຈມະຕິ X ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ5 ປີ, ກໍຄືວຽກງານຈຸດສຸມຂອງຄະນະພັກກະຊວງ ກຊສ ໃຫ້ປາກົດຜົນເປັນຈິງໃນແຕ່ລະດ້ານ.

ຄະນະພັກທຸກຂັ້ນຕ້ອງເພີ່ມທະວີວຽກງານສຶກສາອົບຮົມທາງດ້ານການເມືອງ-ແນວຄິດ ແນໃສ່ໃຫ້ບຸກຄົນໄດ້ເປັນເຈົ້າການຝຶກຝົນຫລໍ່ຫລອມຕົນເອງຫລາຍຂຶ້ນ, ພ້ອມທັງເອົາໃຈໃສ່ປັບປຸງວຽກງານປ້ອງກັນພັກ-ພະນັກງານໃຫ້ໄດ້ດີ, ສະກັດກັ້ນບັນດາປາກົດການຫຍໍ້ທໍ້ຕ່າງໆທີ່ເກີດຂຶ້ນໃນຖັນແຖວສະມາຊິກພັກ, ພະນັກງານ-ລັດຖະກອນ, ສ້າງໃຫ້ມີຄວາມເປັນແບບຢ່າງນໍາຫນ້າ, ຄະນະພັກທຸກຂັ້ນຕ້ອງມີການຕິດຕາມ, ກວດກາກເຕືອນ ແລະສຶກສາອົບຮົມໃຫ້ສະມາຊິກພັກ, ພະນັກງານ-ລັດຖະກອນໃນຄວາມຮັບຜິດຊອບຂອງຕົນຢ່າງເປັນປົກກະຕິໃນການຍົກສູງສະຕິເຄົາລົບ ແລະ ປະຕິບັດແນວທາງນະໂຍບາຍ, ມະຕິ, ຄໍາສັ່ງຂອງພັກ ແລະ ລະບຽບກົດຫມາຍຂອງລັດຢ່າງເຂັ້ມງວດ. ສືບຕໍ່ຜັນຂະຫຍາຍຜົນສໍາເລັດບັ້ນດໍາເນີນຊີວິດການເມືອງປັບປຸງປົວແປງພັກປີ 2017 ໃຫ້ເຂົ້າສູ່ລວງເລິກ ດ້ວຍການສືບຕໍ່ຕີລາຄາຄວາມຮັບຜິດຊອບຫນ້າທີ່ການເມືອງຂອງຕົນທີ່ໄດ້ຮັບການມອບຫມາຍ, ໂດຍອີງໃສ່ຄໍາຕໍານິສົ່ງຂ່າວຂອງພະນັກງານ, ສະມາຊິກພັກຕໍ່ການນໍາພາລວມ, ຕໍ່ບຸກຄົນພາຍໃນຄະນະພັກມາຄົ້ນຄວ້າຕີລາຄາພາຍໃນຄະນະພັກບັນຫາໃດມີຄວາມຈິງ, ບັນຫາໃດບໍ່ມີ, ຄວນວາງມາດຕະການ, ວິທີການແກ້ໄຂໃຫ້ເປັນຮູບປະທໍາ.

- Wave100S AD to Website 2020 0 - ຫົວຫນ້າ​ຄະນະ​ຈັດຕັ້ງສູນ​ກາງ​ພັກ​ເນັ້ນຫລາຍ​ບັນຫາ​ໃຫ້​ຄະນະ​ພັກ ກຊສ ​ເອົາ​ໃຈ​ໃສ່​ປັບປຸງ​​ແກ້​ໄຂ

ສືບຕໍ່ຄົ້ນຄວ້າປັບປຸງກົງຈັກການຈັດຕັ້ງໃຫ້ສົມຄູ່ກັບຫນ້າທີ່ການເມືອງໃນໄລຍະໃຫມ່ ນັບແຕ່ຂັ້ນສູນກາງລົງຮອດທ້ອງຖິ່ນຕາມພາລະບົດບາດໃຫມ່ຕາມທິດກະທັດຮັດ, ບໍ່ໃຫຍ່ໂຕ, ມີປະສິດທິຜົນ, ປັບປຸງແກ້ໄຂການກ້າວກ່າຍຫນ້າທີ່ ຫລື ວຽກຊໍ້າຊ້ອນກັນໃຫ້ໄດ້ຢ່າງຂາດຕົວ, ແບ່ງຂັ້ນຄຸ້ມຄອງລະຫວ່າງຂັ້ນສູນກາງ ແລະ ທ້ອງຖິ່ນໃຫ້ຈະແຈ້ງ, ພ້ອມທັງຮັບປະກັນການຈັດຕັ້ງປະຕິບັດໄດ້. ສຸມໃສ່ການສ້າງແຜນກໍານົດພະນັກງານນໍາພາ-ຄຸ້ມຄອງ, ການກໍານົດຕໍາແຫນ່ງງານໃຫ້ຖືກຕ້ອງແລະ ສອດຄ່ອງກັບສະພາບເປັນຈິງຫລາຍຂຶ້ນກວ່າເກົ່າ, ສັບຊ້ອນຈັດວາງ ແລະ ບໍາລຸງກໍ່ສ້າງພະນັກງານໄປຕາມແຜນກໍານົດ, ການບັນຈຸເຂົ້າໃນຕໍາແຫນ່ງນໍາພາຄຸ້ມຄອງແຕ່ລະຂັ້ນຕ້ອງຮັບປະກັນມາດຕະຖານ-ເງື່ອນໄຂ, ຄວາມສະເຫມີພາບຍິງ-ຊາຍ ແລະ ສົມ ຄູ່ກັບວິຊາສະເພາະທີ່ໄດ້ຮຽມາ, ເອົາໃຈໃສ່ຈັດຕັ້ງຜັນຂະຫຍາຍ ແລະປະຕິບັດແຜນຍຸດທະສາດພັດທະນາ ແລະ ຄຸ້ມຄອງພະນັກງານ-ລັດຖະກອນຂອງຂະແຫນງຊັບພະຍາກອນທໍາມະຊາດ ແລະສິ່ງແວດລ້ອມຮອດປີ 2025 ໃຫ້ໄດ້ດີ, ເພີ່ມທະວີການກໍ່ສ້າງບໍາລຸງພະນັກງານກັບທີ່ ແລະ ສົ່ງໄປສ້າງນໍາຂະບວນການວຽກງານຕົວຈິງຢູ່ທ້ອງຖິ່ນຮາກຖານຖືເປັນມາດຕະການຫນຶ່ງໃນການສ້າງພະນັກງານສືບທອດ ແລະເອົາໃຈໃສ່ປະຕິບັດນະໂຍບາຍສະມາຊິກພັກ, ພະນັກງານຢ່າງຖືກຕ້ອງ ແລະ ເຫມາະສົມ. ເອົາໃຈໃສ່ຍົກສູງຄຸນນະພາບຂອງວຽກງານກວດກາພັກ, ກວດກາລັດ ແລະ ໃຫ້ດໍາເນີນເປັນປົກກະຕິ, ເພີ່ມທະວີການຕິດຕາມກວດກາການເຄື່ອນໄຫວປະຕິບັດຫນ້າທີ່ການເມືອງຂອງບັນດາກົມກອງກໍຄືການປະຕິບັດນະໂຍບາຍ, ກົດລະບຽບພັກ, ມະຕິ, ຄໍາສັ່ງຂອງພັກ, ຕິດຕາມກວດກາຄຸນທາດການເມືອງ ແລະ ຄຸມສົມບັດສິນທໍາປະຕິວັດ, ແບບແຜນດໍາລົງຊີວິດຂອງສະມາຊິກພັກ-ພະນັກງານ, ຖືເອົາການກວດກາການສ້າງຫນ່ວຍພັກປອດໃສ, ເຂັ້ມແຂງ, ຫນັກແຫນ້ນເປັນປັດໄຈໃນການກວດກາ ແລະ ນໍາພາພາຍໃນພັກ, ຖ້າພົບເຫັນບັນຫາປະກົດການຫຍໍ້ທໍ້ກໍຕ້ອງໄດ້ຮີບຮ້ອນຄົ້ນຄວ້າແກ້ໄຂໃຫ້ທັນການຕາມທິດຊີ້ນໍາທີ່ວ່າ: ບັນຫາເກີດຂຶ້ນຢູ່ບ່ອນໃດຄະນະພັກຢູ່ບ່ອນນັ້ນຕ້ອງເປັນເຈົ້າການແກ້ໄຂ, ຊຶ່ງໃນນີ້ຕ້ອງຮີບຮ້ອນແກ້ໄຂສະພາບພະນັກງານທີ່ລະເມີດກົດລະບຽບຂອງພັກ, ະບຽບກົດຫມາຍຂອງລັດ, ຜູ້ທີ່ເສື່ອມທາດຂາດຄຸນໃຫ້ໄດ້ໂດຍໄວ ແລະ ເດັດຂາດທັນການ. ໃຫ້ເພີ່ມທະວີຊີ້ນໍາ-ນໍາພາ3 ອົງການຈັດຕັ້ງມະຫາຊົນປະຕິບັດພາລະບົດບາດຂອງຕົນໃຫ້ຫນັກແຫນ້ນຂຶ້ນຕື່ມ ເພື່ອເສີມຂະຫຍາຍກໍາລັງແຮງສັງລວມໃນທົ່ວກະຊວງ, ເປັນເຈົ້າການເຂົ້າຮ່ວມການຈັດຕັ້ງຜັນຂະຫຍາຍແນວທາງຂອງພັກ, ແຜນພັດທະນາເສດຖະກິດ-ສັງຄົມຂອງລັດແລະ ແຜນຍຸດທະສາດຂອງກະຊວງໃຫ້ຟົດຟື້ນຫລາຍຂຶ້ນກວ່າເກົ່າ. ເອົາໃຈໃສ່ການສ້າງ ແລະປັບປຸງນະໂຍບາຍຍຸດທະສາດແລະ ນິຕິກໍາທີ່ຕິດພັນກັບວຽກງານຊັບພະຍາກອນທໍາມະຊາດແລະ ສິ່ງແວດລ້ອມໃຫ້ເປັນລະບົບຄົບຊຸດ, ໃຫ້ສໍາເລັດໄປຕາມແຜນການວາງໄວ້, ພ້ອມທັງປະຕິບັດບັນດາກົດຫມາຍ ແລະ ນິຕິກໍາລຸ່ມກົດຫມາຍໃນຂົງເຂດຊັບພະຍາກອນທໍາມະຊາດ ແລະ ສິ່ງແວດລ້ອມ ທີ່ມີແລ້ວໃຫ້ເຄັ່ງຄັດແລະ ເຂັ້ມງວດຫລາຍຂຶ້ນກວ່າເກົ່າ. ເອົາໃຈໃສ່ເຜີຍແຜ່ ແລະຈັດຕັ້ງຜັນຂະຫຍາຍມະຕິຂອງຄະນະບໍລິຫານງານສູນກາງພັກວ່າດ້ວຍການເພີ່ມທະວີວຽກງານຄຸ້ມຄອງ ແລະ ພັດທະນາທີ່ດິນໃນໄລຍະໃຫມ່ ສະບັບເລກທີ026/ຄບສພ ລົງວັນທີ 3 ສິງຫາ2017 ໃຫ້ເຂົ້າສູ່ລວງເລິກ ແລະປະຕິບັດໄດ້ຢ່າງມີປະສິດທິຜົນ,ພ້ອມທັງເອົາໃຈໃສ່ແກ້ໄຂບັນຫາທີ່ດິນທີ່ເກີດຂຶ້ນໃຫ້ໄດ້ໂດຍໄວແລະ ແກ້ໄຂໃຫ້ໄດ້ຂາດຕົວທັງໃຫ້ຖືກຕ້ອງ ແລະ ສອດຄ່ອງກັບລະບຽບກົດຫມາຍ, ສຸມໃສ່ຈັດສັນທີ່ດິນໃຫ້ໄດ້ຮັບຜົນດີຕາມແຜນແມ່ບົດຈັດສັນທີ່ດິນແຫ່ງຊາດທີ່ສະພາແຫ່ງຊາດໄດ້ຮັບຮອງມາແລ້ວ, ອອກສິດນໍາໃຊ້ທີ່ດິນໃຫ້ໄດ້ຕາມແຜນການກໍານົດໄວ້, ສ້າງແຜນພັດທະນາ ແລະ ນໍາໃຊ້ທີ່ດິນໃຫ້ແທດເຫມາະກັບສະພາບຄວາມເປັນຈິງ, ຄົ້ນຄວ້ານໍາໃຊ້ທີ່ດິນສ້າງເປັນແຫຼ່ງລາຍຮັບສໍາຄັນຂອງຊາດ. ເອົາໃຈໃສ່ແກ້ໄຂບັນຫາສິ່ງແວດລ້ອມໃຫ້ຈິງຈັງຫລາຍຂຶ້ນກວ່າເກົ່າ, ໂດຍສະເພາະບັນຫາມົນລະພິດທາງອາກາດ, ການກໍາຈັດສິ່ງເສດເຫລືອໃນຕົວເມືອງ, ເອົາໃຈໃສ່ການຄຸ້ມຄອງຊັບພະຍາກອນນ້ໍາໃຫ້ເປັນລະບົບ ແລະ ມີຄຸນນະພາບດີ, ພ້ອມທັງກຽມພ້ອມຮັບມືກັບຜົນກະທົບຈາກສະພາບການປ່ຽນແປງດິນຟ້າອາກາດໃຫ້ທັນການ, ເພີ່ມທະວີວຽກງານສ້າງຈິດສໍານຶກກ່ຽວກັບການປົກປັກຮັກສາສິ່ງແວດລ້ອມ, ການປ້ອງກັນໄພພິບັດ ແລະ ການປ່ຽນແປງດິນຟ້າອາກາດໃຫ້ແກ່ມວນຊົນ ແລະ ກຸ່ມເປົ້າຫມາຍທີ່ສໍາຄັນໃນຂອບເຂດທົ່ວປະເທດ,ເອົາໃຈໃສ່ປັບປຸງຂອດປະສານງານປະສານສົມທົບກັບຂະແຫນງການ ແລະ ອົງການປົກຄອງທ້ອງຖິ່ນໃຫ້ແຫນ້ນແຟ້ນຫລາຍຂຶ້ນ, ພ້ອມທັງເພີ່ມທະວີການຮ່ວມມື ແລະ ເຊື່ອມໂຍງກັບພາກພື້ນ ແລະ ສາກົນ.

- WhatsApp Image 2020 05 27 at 5 - ຫົວຫນ້າ​ຄະນະ​ຈັດຕັ້ງສູນ​ກາງ​ພັກ​ເນັ້ນຫລາຍ​ບັນຫາ​ໃຫ້​ຄະນະ​ພັກ ກຊສ ​ເອົາ​ໃຈ​ໃສ່​ປັບປຸງ​​ແກ້​ໄຂ
- WhatsApp Image 2020 05 27 at 5 - ຫົວຫນ້າ​ຄະນະ​ຈັດຕັ້ງສູນ​ກາງ​ພັກ​ເນັ້ນຫລາຍ​ບັນຫາ​ໃຫ້​ຄະນະ​ພັກ ກຊສ ​ເອົາ​ໃຈ​ໃສ່​ປັບປຸງ​​ແກ້​ໄຂ
error: Alert: ເນື້ອຫາຂ່າວມີລິຂະສິດ !!