ກອງປະຊຸມອົງການພຸດທະສາສໜາ 3 ປະເທດ ຈະຈັດຂຶ້ນໃນເດືອນພະຈິກນີ້ ຢູ່ນະຄອນຫລວງວຽງຈັນ
ເມື່ອທ້າຍອາທິດຜ່ານມານີ້, ທີ່ຫໍທໍາມະສະພາ ວັດທາດຫລວງເໜືອ ນະຄອນ ຫລວງວຽງຈັນ ພະອາຈານໃຫ່ຍມະຫາເວດ ມະເສໄນ ຄະນະບໍລິຫານງານ ປະຈໍາການ ຮອງປະທານສູນກາງອົງການພຸດທະສາສະໜາສໍາພັນລາວ ໄດ້ຖະແຫລງຂ່າວຕໍ່ສື່ມວນຊົນ ກ່ຽວກັບການກະກຽມເປັນເຈົ້າພາບກອງປະຊຸມ ປະທານອົງການພຸດທະສາສະໜາ ກໍາປູເຈຍ-ລາວ ແລະຫວຽດນາມ ຄັ້ງທີ 1 ຂື້ນໃນວັນທີ 12 ພະຈິກ ນີ້, ພາຍໃຕ້ຫົວຂໍ້ “ເພີ່ມທະວີມູນເຊື້ອສາຍພົວພັນຄວາມສາມັກຄີແລະການຮ່ວມມື ລະຫວ່າງອົງການພຸດທະສາສະໜາ 3 ປະເທດ ກໍາປູເຈຍ-ລາວ-ຫວຽດນາມ ໃນເງື່ອນໄຂເຊື່ອມໂຍງພາກພື້ນແລະສາກົນ” ຄາດວ່າຈະມີການນໍາຂັ້ນສູງຂອງອົງການພຸດທະສາສະ ໜາ, ແນວໂຮມຄະນະກໍາມະການສາສະໜາລັດຖະບານ ແລະ ບັນດາການຳກະຊວງ-ອົງການຂັ້ນສູນກາງແລະທ້ອງຖິ່ນຂອງ 3 ປະເທດກຳປູເຈຍ, ລາວ ແລະ ຫວຽດນາມ.
ກອງປະຊຸມຄັ້ງນີ້ແມ່ນເພື່ອຍົກສູງບົດບາດຂອງອົງການພຸດທະສາສະໜາສໍາພັນລາວ ໃນເວທີພາກພື້ນແລະສາກົນ, ທັງເປັນການປະກອບສ່ວນຍົກສູງບົດບາດການນໍາພາ ຂອງພັກ-ລັດຖະບານ ລາວ ແລະເປັນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີທີ່ເປັນມູນເຊືອຂອງປະຊາຊົນທັງ 3 ຊາດ ໂດຍສະເພາະສາມອົງການພຸດທະສາສະໜາ ກໍາປູເຈບ-ລາວ-ຫວຽດນາມ ແລະຍັງເປັນການປະກອບສ່ວນໃນການຮັດແໜ້ນສາຍພົວພັນອັນເປັນມູນເຊື້ອຂອງປະຊາຊົນສາມຊາດ ໃຫ້ມີຄວາມໜັກແໜ້ນແລະຍົກສູງຂຶ້ນເລືອຍໆ.
ກອງປະຊຸມຄັ້ງນີ້ຈະໄດ້ຮັບຟັງການປະກອບຄໍາຄິດຄໍາເຫັນຂອງຜູ້ແທນ ສາມປະເທດກ່ຽວກັບການພົວພັນຮ່ວມມືໃນວຽກງານພຸດທະສາສະໜາໃນໄລຍະຜ່ານມາ ແລະແລກປ່ຽນຄໍາຄິດຄໍາເຫັນເພື່ອກໍານົດທິດທາງໃນຕໍ່ໜ້າ, ຮັບຮອງເອົາບົດບັນທຶກຊ່ວຍຈໍາວ່າດ້ວຍການຮ່ວມມືລະຫວ່າງອົງການພຸດທະສາສະໜາ ລາວກັບ ສສ ຫວຽດນາມ ແລະ ລາວ ກັບ ກໍາປູເຈຍ ແລະຮັບຮອງເອົາບົດບັນທຶກກອງປະຊຸມ ວ່າດ້ວຍການຮ່ວມມືຂອງປະທານອົງການພຸດທະສາສະໜາລະຫວ່າງ 3 ປະເທດ ສະບັບທໍາອິດ.
ພຣະອາຈານໃຫ່ຍມະຫາເວດ ມະເສໄນ ຄະນະບໍລິຫານງານ ປະຈໍາການ ຮອງປະທານສູນກາງອົງການພຸດທະສາສະໜາສໍາພັນລາວ ໃຫ້ຮູ້ວ່າ: ປັດຈຸບັນນີ້, ການກະກຽມດ້ານຕ່າງໆແມ່ນມີຄວາມພ້ອມແລ້ວ ຍ້ອນໄດ້ຮັບການຊີ້ນໍາຢ່າງໃກ້ຊິດ ຈາກພັກ-ລັດຖະບານທີ່ເຫັນຄວາມສໍາຄັນໃນວຽກງານພຸດທະສາສະໜາ ຈະເປັນຂີດໝາຍໃໝ່ແຫ່ງການເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ແລະການຮ່ວມມື ສະໜັບສະໜູນຊ່ວຍເຫລືອເຊິ່ງກັນແລະກັນຫລາຍຂຶ້ນ ລະຫວ່າງອົງການພຸດທະສາສະໜາກໍາປູເຈຍ-ລາວ ແລະຫວຽດນາມ ທີ່ມີມາແຕ່ດົນນານແລ້ວນັ້ນໄດ້ແຕກດອກອອກຜົນ ຫງອກງາມຍິ່ງຂຶ້ນ.
