7 ວິທີທີ່ຈະຊ່ວຍເພີ່ມພະລັງໃຈໃນການເຮັດວຽກໃຫ້ແກ່ທ່ານ

- advert banner 728 90 728x90 - 7 ວິທີທີ່ຈະຊ່ວຍເພີ່ມພະລັງໃຈໃນການເຮັດວຽກໃຫ້ແກ່ທ່ານ


      ເຮົາຢູ່ໃນຍຸກສະໄໝທີ່ຂໍ້ມູນຂ່າວສານຢູ່ໃກ້ໂຕ ຂໍໍ້ມູນຂ່າວສານດີໆກໍຊ່ວຍແນະນຳໃຫ້ເຮົາປະສົບຄວາມສຳເລັດຕາມເປົ້າໝາຍທີ່ໄດ້ວາງໄວ້ໄດ້ງ່າຍຫລາຍຂຶ້ນ ລວມເຖິງຊ່ວຍສ້າງແຮງບັນດານໃຈໄດ້ຄືກັນ, ແຕ່ໃນທາງກົງກັນຂ້າມ  ການເຂົ້າເຖິງຂໍ້ມູນໄດ້ງ່າຍດາຍຫລາຍຂຶ້ນ ບາງເທື່ອກໍລົບກວນສະມາທິຂອງເຮົາເມື່ອຕ້ອງຈົດຈໍ່ຢູ່ກັບວຽກ. ສະເພາະແຕ່ການເຮັດວຽກຕາມເປົ້າໝາຍ ແລະ ການສ້າງຄວາມປ່ຽນແປງໃໝ່ໆກໍເປັນເລື່ອງທີ່ຍາກຢູ່ແລ້ວ ເພາະເຮົາຕ້ອງອາໄສແຮງບັນດານໃຈທີ່ຕໍ່ເນື່ອງ ແລະ ຈຳນວນມະຫາສານທີ່ຈະຊ່ວຍຊຸກຍູ້ໃຫ້ເຮົາໄປເຖິງເປົ້າໝາຍ. ສະນັ້ນ, ການສ້າງແຮງຈູງໃຈ ແລະ ແຮງບັນດານໃຈເປັນປະຈຳຈຶ່ງເປັນເລື່ອງທີ່ສຳຄັນບໍ່ໜ້ອຍ.

     1. ຕັ້ງເປົ້າໝາຍໃຫ້ຈະແຈ້ງ : ຄວາມສຳເລັດຈະເກີດຂຶ້ນໄດ້ນັ້ນຕ້ອງເລີ່ມຈາກການມີແຜນການເຮັດວຽກທີ່ຈະແຈ້ງ ເຊິ່ງແຜນ ການເຮັດວຽກນັ້ນຈະເກີດຂຶ້ນໄດ້ກໍຕ້ອງມີເປົ້າໝາຍທີ່ວາງໄວ້ ເປົ້າໝາຍແມ່ນເຫດຜົນທ່ີທ່ານເດີນທາງເຂົ້າມາໃນເສັ້ນທາງເສັ້ນນີ້. ສະນັ້ນ ມັນຈຶ່ງຕ້ອງຈະແຈ້ງ ເຮັດໄດ້ແທ້ ແລະ ມີການກຳໜົດໄລຍະເວລາໄວ້ແນ່ນອນ ໂດຍສາມາດບັນທຶກໄດ້ທັງໃນໂທລະສັບ, ຄອມພິວເຕີ, ປື້ມບັນທຶກ ຫລື ອັນໃດກໍໄດ້ ທ່ານຈະໄປຮອດຝັນໄດ້ ທ່ານຈະຕ້ອງຮູ້ວ່າຊີວິດນີ້ທ່ານຕ້ອງການຫຍັງ ແລະ ເປົ້າໝາຍທີ່ວາງໄວ້ຈະຊ່ວຍພາໄປຮອດຈຸດນັ້ນໄດ້ແນວໃດ.

     2. ຂຽນແຜນການລ່ວງໜ້າກ່ອນນອນ : ນອກຈາກການວາງເປົ້າໝາຍໃຫ້ຈະແຈ້ງແລ້ວ ການຈັດສັນແຜນການສ່ວນຕ່າງໆໃຫ້ຈະແຈ້ງກໍເປັນອີກເລື່ອງສຳຄັນຄືກັນ ທ່ານຄວນໃຊ້ເວລາກ່ອນຈະນອນຈັກນ້ອຍໃນການວາງແຜນການຂອງມື້ອື່ນ ໂດຍລຽງລຳດັບຄວາມສຳຄັນໃນເລື່ອງຕ່າງໆ ພ້ອມກັບມີແຜນສຳຮອງ ເພື່ອຈະໄດ້ເຮັດທຸກຢ່າງໃຫ້ເປັນໄປຕາມເປົ້າໝາຍ.

     3. ນອນຫລັບໃຫ້ພຽງພໍ : ສາເຫດໃຫຍ່ໆອີກຢ່າງໜຶ່ງທີ່ເຮັດໃຫ້ທ່ານຂາດແຮງຈູງໃຈນັ້ນກໍແມ່ນການນອນຫລັບພັກຜ່ອນບໍ່ພຽງພໍ. ເວລາຂອງການນອນນັ້ນແຕກຕ່າງກັນຕາມຄວາມຕ້ອງການຂອງແຕ່ລະຄົນ ລອງສັງເກດເບິ່ງວ່າຮ່າງກາຍຂອງທ່ານຕ້ອງການນອນຈັກຊົ່ວໂມງ ຫລື ນອນຕອນໃດທ່ານຈຶ່ງຈະຕື່ນມາຢ່າງສົດຊື່ນ ແລະ ມີປະສິດທິພາບໃນການເຮັດວຽກໄດ້ໝົດມື້. ການນອນຖືເປັນສ່ວນທີ່ສຳຄັນຢ່າງຍິ່ງ ຫາກຢາກໄປເຖິງຄວາມສຳເລັດດັ່ງທີ່ຫວັງ ທ່ານຕ້ອງເສຍສະຫລະເວລາເພື່ອນອນຫລັບໃຫ້ເຕັມອີ່ມ ເພາະການນອນກໍສຳຄັນບໍ່ໜ້ອຍກ່ວາເປົ້າໝາຍຂອງທ່ານເລີຍ.

- 1 1 - 7 ວິທີທີ່ຈະຊ່ວຍເພີ່ມພະລັງໃຈໃນການເຮັດວຽກໃຫ້ແກ່ທ່ານ
- lattana 1 - 7 ວິທີທີ່ຈະຊ່ວຍເພີ່ມພະລັງໃຈໃນການເຮັດວຽກໃຫ້ແກ່ທ່ານ

     4. ມີເວລາສຳລັບຕົນເອງໃນຕອນເຊົ້າ : ເຕັກໂນໂລຊີເຮັດໜ້າທີ່ຊ່ວຍເຮົາສ້າງສັນຄວາມສຳເລັດໃນຊີວິດໄດ້ຢ່າງມະຫະສະຈັນກໍແທ້, ແຕ່ບາງເທື່ອກໍຕ້ອງວາງມັນລົງແດ່ ໃນຕອນເຊົ້າຄວນຈະເປັນຊ່ວງເວລາຂອງທ່ານ ທ່ານຄວນຫ່າງໄກຈາກອຸປະກອນເຕັກໂນໂລຊີຕ່າງໆເພື່ອຈະສະສາງລວບລວມຄວາມຄິດ ລອງນັ່ງສະມາທິ ຫລື ຫລັບຕາລົງ ປ່ອຍວາງຕົນເອງຈາກຕາຕະລາງຊີວິດທີ່ຫຍຸ້ງຍາກຈັກໄລຍະໜຶ່ງ ເພື່ອໃຫ້ຈິດໃຈພ້ອມຮັບກັບເລື່ອງລາວໝົດມື້ທີ່ກຳລັງຈະມາເຖິງ.

     5. ຫລີກເວັ້ນສິ່ງລົບກວນຈິດໃຈ : ນອກຈາກເຕັກໂນໂລຊີ ແລະ ອິນເຕີເນັດແລ້ວ ເພື່ອທີ່ຈະຈົດຈໍ່ ແລະ ສ້າງແຮງຈູງໃຈໃນການເຮັດວຽກນັນ ທ່ານຈະຕ້ອງຫລີກເວັ້ນສິ່ງລົບກວນຈິດໃຈ ເຊັ່ນ :ຫລີກເວັ້ນຄົນທີ່ຄິດໃນແງ່ລົບ  ເພາະຄຳເວົ້າ ແລະ ການກະທຳແງ່ລົບຂອງພວກເຂົາມີແຕ່ຈະສົ່ງຜົນເສຍກັບຄວາມເຊື່ອໝັ້ນໃນຕົນເອງຂອງທ່ານ ເຊິ່ງສາມາດທຳລາຍແຮງຈູງໃຈໃນຊີວິດຂອງທ່ານໄດ້ເລີຍ. ສະນັ້ນ ຢູ່ອ້ອມໆຄົນທີ່ໃຫ້ແຮງບັນດານໃຈໄວ້ຈະດີກ່ວາ.

     6. ຈັດຕາຕະລາງເວລາໃຫ້ມີຊ່ວງເວລາຂອງການສ້າງແຮງບັນດານໃຈ : ການຈັດຕາຕະລາງເວລາໃນຊີວິດປະຈຳວັນນັ້ນ ທ່ານຄວນເຜື່ອເວລາສ່ວນໜຶ່ງໃຫ້ກັບການສ້າງແຮງບັນດານໃຈນຳ ບໍ່ວ່າຈະເປັນການອ່ານໜັງສືດີໆຈັກເຫລັ້ມ, ອ່ານບົດສຳພາດເພີ່ມພະລັງໃຈຂອງຄົນທີ່ທ່ານຍົກຍ້ອງ, ເບິ່ງວີດີໂອທີ່ເປີດມຸມມອງຕໍ່ໍຊີວິດ ຫລື ເປົ້າໝາຍໃໝ່ໆ ແຮງບັນດານໃຈລາຍມື້ແບບນີ້ຈະຊ່ວຍໃຫ້ທ່ານເຊື່ອໝັ້ນໃຈໂຕເອງຫລາຍຂຶ້ນ.

     7. ເຕືອນຕົນເອງສະເໝີວ່າເວລາເປັນສິ່ງມີຄ່າ : ເຮົາທຸກຄົນລ້ວນແຕ່ຮູ້ດີວ່າ ຊີວິດນັ້ນແສນສັ້ນ ແຕ່ຫລາຍເທື່ອທີ່ເຮົາຊຳ້ພັດໃຊ້ເວລາໄປແບບເສຍລ້າ. ແນວໃດກໍຕາມ ຫາກທ່ານເບິ່ງວ່າຊີວິດ ແລະ ເວລາເປັນສິ່ງມີຄ່າ ທ່ານຈະບໍ່ຢາກໃຊ້ມັນຢ່າງສິ້ນເປືອງຢ່າງແນ່ນອນ. ສະນັ້ນ ຈົ່ງເຕືອນໂຕເອງເຖິງເຫດຜົນທີ່ທ່ານຢາກປະສົບຄວາມສຳເລັດຕາມເປົ້າໝາຍທີ່ວາງໄວ້ສະເໝີ ເພື່ອຈະໄດ້ສ້າງອິດສະຫລະພາບໃຫ້ກັບຊີວິດຂອງທ່ານ. ວິທີທີ່ດີສຸດໃນການບັນລຸເປົ້າໝາຍໃດກໍຕາມ ການມີເປົ້າໝາຍໃຫຍ່ ແລະ ມີເປົ້າໝາຍຍ່ອຍໃນແຕ່ລະມື້ ທີ່ຈະຊ່ວຍໃຫ້ທ່ານມີແຮງຈູງໃຈ ແລະ ຈົດຈໍ່ຢູ່ກັບວຽກໄດ້ຢ່າງມີປະສິດທິພາບ.

error: Content is protected !!