ສະພາແຫ່ງຊາດຈັດກອງປະຊຸມເຊື່ອມຊຶມຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 7 ສະໄຫມທີ X

  ໃນວັນທີ 22-23 ມັງກອນນີ້, ສະພາແຫ່ງຊາດໄດ້ຈັດກອງປະຊຸມເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 7 ສະໄໝທີ X ສໍາລັບສະພາແຫ່ງຊາດ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ ແລະ ກະຊວງຍຸຕິທຳຂຶ້ນທີ່ນະຄອນຫລວງວຽງຈັນ, ໂດຍການເປັນປະທານຂອງທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ, ມີບັນ ດາການນຳຈາກ 4 ພາກສ່ວນດັ່ງກ່າວເຂົ້າຮ່ວມ.

  ໃນກອງປະຊຸມ, ທ່ານນາງ ປານີ ຢາທໍ່ຕູ້ ກ່າວວ່າ: ການຈັດກອງປະຊຸມດັ່ງກ່າວກໍເພື່ອເຮັດໃຫ້ການຈັດຕັ້ງເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 7 ສະໄໝທີ X ໃຫ້ບັນລຸຕາມຈຸດປະສົງ ແລະ ຄາດໝາຍທີ່ວາງໄວ້, ທັງເປັນການຜັນຂະຫຍາຍເຂົ້າສູ່ວຽກງານຕົວຈິງມີປະສິດທິຜົນ ແລະ ກວ້າງຂວາງທົ່ວເຖິງທຸກເປົ້າໝາຍຄື: ມະຕິວ່າດ້ວຍເພີ່ມທະວີການນຳພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງຂອງການຄຸ້ມຄອງມະຫາພາກ, ແລະ ມະຕິວ່າດ້ວຍການປັບປຸງຮາກຖານການເມືອງຂອງລະບອບປະຊາທິປະໄຕປະຊາຊົນໃຫ້ເຂັ້ມແຂງໜັກແໜ້ນ.