ທຳລາຍສວນຝິ່ນຫລາຍເຮັກຕາຢູ່ເມືອງຄູນ
ພາຍຫລັງມີພົນລະເມືອງດີລາຍງານໃຫ້ຮູ້ວ່າ: ມີປະຊາຊົນຈຳນວນໜຶ່ງລັກລອບປູກຝິ່ນຢູ່ເຂດພູຜາແດງ ເມືອງຄູນ ແຂວງຊຽງຂວາງ ເປັນບໍລິເວນກວ້າງ, ຈາກນັ້ນເຈົ້າໜ້າທີ່ ປກສ-ປກຊ ໄດ້ສົມທົບກັບອຳນາດການປົກຄອງເມືອງ ນຳກຳລັງລົງທຳລາຍສວນຝິ່ນທັງໝົດທີ່ກຳລັງອອກດອກມີ 17 ຈຸດ ລວມມີເນື້ອທີ່ຫລາຍກວ່າ 8 ເຮັກຕາ, ພ້ອມທັງໄດ້ເອົາຕົວຜູ້ກະທຳຜິດມາສຶກສາອົບຮົມກ່າວເຕືອນ ເພື່ອບໍ່ໃຫ້ກັບມາປູກພືດທີ່ຜິດກົດໝາຍນີ້ອີກ.
ຮອງຫົວໜ້າຕຳຫລວດກວດກາ ແລະ ຄວບຄຸມຢາເສບຕິດແຂວງຊຽງຂວາງ ໃຫ້ຮູ້ວ່າ: ຈຸດທີ່ມີການລັກລອບປູກຝິ່ນນີ້ເປັນເຂດຮ່ອມພູທຸລະກັນດານ ເຊິ່ງເຮັດໃຫ້ມີຄວາມຫຍຸ້ງຍາກໃນການຕິດຕາມກວດກາຂອງເຈົ້າໜ້າທີ່ ແລະ ນັບແຕ່ຕົ້ນປີ 2019 ມານີ້, ເຈົ້າໜ້າທີ່ໄດ້ລົງທຳລາຍສວນຝິ່ນຫລາຍກວ່າ 21 ເຮັກຕາ ຢູ່ບ້ານບົງ ເມືອງພູກູດ, ບ້ານຍອດສ້າງ ເມືອງຄຳ ແລະ ຢູ່ເຂດພູຜາແດງ ເມືອງຄູນ.
ສປປ ລາວ ໄດ້ປະກາດຢຸດຕິການປູກຝິ່ນມາຫລາຍປີແລ້ວ ໂດຍໄດ້ຊຸກຍູ້ສົ່ງເສີມປະຊາຊົນທີ່ເຄີຍປູກຝິ່ນຫັນໄປປູກພືດຊະນິດອື່ນທົດແທນ ເພື່ອເປັນສິນຄ້າ ແລະ ສ້າງອາຊີບໝັ້ນຄົງ. ນອກນີ້ ລັດຖະບານໄດ້ມີນະໂຍບາຍໃຫ້ນັກລົງທຶນຕ່າງປະເທດເຂົ້າມາມີສ່ວນຮ່ວມໃນການແກ້ໄຂບັນຫາການປູກຝິ່ນຢູ່ເຂດພາກເໜືອ ໂດຍການລົງທຶນປູກຢາງພາລາ ເພື່ອໃຫ້ປະຊາຊົນທີ່ເຄີຍປູກຝິ່ນຫັນມາປູກຢາງພາລາແທນ ເພື່ອສ້າງລາຍຮັບ ແລະ ມີວຽກເຮັດງານທຳດີຂຶ້ນ.
