ກວດພົບນ້ຳມັນບໍ່ໄດ້ຄຸນນະພາບຫລາຍກວ່າໝູ່ຢູ່ເຂດຊານເມືອງນະຄອນຫລວງວຽງຈັນ

ກວດພົບນ້ຳມັນບໍ່ໄດ້ຄຸນນະພາບຫລາຍກວ່າໝູ່ຢູ່ເຂດຊານເມືອງນະຄອນຫລວງວຽງຈັນ - advert banner 728 90 728x90 - ກວດພົບນ້ຳມັນບໍ່ໄດ້ຄຸນນະພາບຫລາຍກວ່າໝູ່ຢູ່ເຂດຊານເມືອງນະຄອນຫລວງວຽງຈັນ

     ຜ່ານ​ມາ​ນີ້, ກົມມາດຕະຖານ ແລະ ວັດແທກ ກະຊວງວິທະຍາສາດ ແລະ ເຕັກໂນໂລຊີ ກວດກາພົບເຫັນນ້ຳມັນຢູ່ຫລາຍປ້ຳ​ໃນ​ຂອບ​ເຂດທົ່ວປະເທດບໍ່ໄດ້ຄຸນນະພາບ, ໃນນີ້ພົບເຫັນຫລາຍກວ່າໝູ່ແມ່ນບັນດາປ້ຳທີ່ຢູ່ເຂດນອກຕົວເມືອງນະຄອນຫລວງວຽງຈັນ ແລະ ຢູ່ຕາມລຽບເສັ້ນທາງ 13 ໃຕ້, ແຕ່ທຽບ​ໃສ່​ປີ 2017 ຜ່ານ​ມາ ​ແມ່ນມີທ່າອ່ຽງຫລຸດລົງ.

ກວດພົບນ້ຳມັນບໍ່ໄດ້ຄຸນນະພາບຫລາຍກວ່າໝູ່ຢູ່ເຂດຊານເມືອງນະຄອນຫລວງວຽງຈັນ - lattana 1 - ກວດພົບນ້ຳມັນບໍ່ໄດ້ຄຸນນະພາບຫລາຍກວ່າໝູ່ຢູ່ເຂດຊານເມືອງນະຄອນຫລວງວຽງຈັນ
ກວດພົບນ້ຳມັນບໍ່ໄດ້ຄຸນນະພາບຫລາຍກວ່າໝູ່ຢູ່ເຂດຊານເມືອງນະຄອນຫລວງວຽງຈັນ - OIL - ກວດພົບນ້ຳມັນບໍ່ໄດ້ຄຸນນະພາບຫລາຍກວ່າໝູ່ຢູ່ເຂດຊານເມືອງນະຄອນຫລວງວຽງຈັນ

     ທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ ໃຫ້ສໍາພາດວ່າ: ກົມມາດຕະຖານ ແລະ ວັດແທກ ເລີ່ມຕົ້ນກວດກາຄຸນນະພາບນ້ຳມັນ​ເຊື້ອ​ໄຟຢູ່ຕາມປ້ຳຕ່າງໆໃນທົ່ວປະເທດ ນັບແຕ່ຕົ້ນ​ເດືອນສິງຫາ 2016 ເປັນຕົ້ນມາ ໂດຍຜ່ານ 2 ຮູບແບບຄື: ກວດກາປົກກະຕິປີລະ 2 ຄັ້ງ ແລະ ກວດກາຕາມການຮ້ອງຮຽນຂອງຜູ້ບໍລິໂພກ ກໍຄືຜູ້ຊົມໃຊ້ນ້ຳມັນຜ່ານສາຍດ່ວນ 1513 ​ແລະ ຜ່ານການກວດກາຕົວ​ຈິງເຫັນວ່າ: ສະເພາະໃນປີ 2017 ພົບເຫັນນ້ຳມັນ ແອັດຊັງ ແລະ ກາຊວນຢູ່ຫລາຍປ້ຳໃນທົ່ວປະເທດບໍ່ໄດ້ຄຸນນະພາບ ຍ້ອນມີທາດເຫຼົ້າເຈືອນປົນ, ກົດໄຂມັນ ແລະ ນ້ຳມັນກາສເຈືອນປົນຢູ່ ໂດຍກວດພົບປະມານ 30% ຂອງຈຳນວນປ້ຳທີ່ລົງກວດກາທັງໝົດ. ແຕ່ມາໃນປີ 2018 ຜ່ານມາ ກວດພົບເຫັນນ້ຳມັນຢູ່ບັນດາປ້ຳທີ່ລົງກວດກາບໍ່ໄດ້ຄຸນນະພາບຫລຸດລົງເຫລືອ 10% ຂອງຈໍານວນເປົ້າໝາຍທີ່ຖືກກວດກາທັງໝົດ. ສ່ວນເຂດທີ່ພົບເຫັນປ້ຳນ້ຳມັນບໍ່ໄດ້ຄຸນນະພາບຫລາຍກວ່າໝູ່ແມ່ນຢູ່ນອກຕົວເມືອງຂອງນະຄອນຫລວງວຽງຈັນ ແລະ ຕາມເສັ້ນທາງເລກທີ 13 ໃຕ້ ​ເຊິ່ງມາ​ຈາກ 2 ສາເຫດຄື: ຜູ້ປະ ກອບການຈຳນວນໜຶ່ງລັກລອບເອົານ້ຳມັນທີ່ຕ້ອງຫ້າມມາປະສົມກັບນ້ຳມັນແອັດຊັງ ແລະ ກາຊວນເອງ ເພື່ອປະຢັດຕົ້ນທຶນ ແລະ ອີກສາເຫດໜຶ່ງແມ່ນຍ້ອນຜູ້ປະກອບການຂາຍນ້ຳມັນບໍ່ຮູ້ວ່ານ້ຳມັນມີສານເຈືອປົນ ແລະ ບໍ່ໄດ້ຄຸນນະພາບ ຍ້ອນຊື້ນ້ຳມັນຈາກຜູ້ປະກອບການອື່ນ.

     ຫົວໜ້າກົມມາດຕະຖານ ແລະ ວັດແທກ ກະຊວງດັ່ງກ່າວ ໃຫ້ຮູ້ຕື່ມວ່າ: ປັດຈຸບັນ ລັດຖະບານໄດ້ອະນຸຍາດໃຫ້ນໍາເຂົ້ານ້ຳມັນຜ່ານດ່ານສາກົນໃນທົ່ວປະເທດທັງໝົດ 16 ແຫ່ງ ແຕ່ບໍ່ອະນຸຍາດໃຫ້ນຳເຂົ້ານ້ຳມັນຜ່ານດ່ານທ້ອງຖິ່ນທຸກປະເພດ. ໃນຈຳນວນດ່ານສາກົນທັງໝົດ​ດັ່ງກ່າວ ໄດ້ມີເຈົ້າໜ້າທີ່ກ່ຽວຂ້ອງໄປປະຈໍາເພື່ອກວດ ກາຄຸນນະພາບນ້ຳມັນທີ່ນຳເຂົ້າຈາກຕ່າງປະເທດທັງໝົດແລ້ວ ​ແລະ ຜ່ານການກວດ ກາສະເພາະການນຳເຂົ້ານ້ຳມັນແມ່ນບໍ່ພົບບັນຫາຫຍັງ ແຕ່ບັນຫາທີ່ພົບຄືຫລັງຈາກນຳ​ເຂົ້າມາໃນປະເທດແລ້ວ ຜູ້ປະກອບການລັກລອບເອົານ້ຳມັນຊະນິດອື່ນທີ່ຕ້ອງຫ້າມມາປະສົມເຂົ້າຕື່ມເພື່ອປະຢັດຕົ້ນທຶນ ແລະ ໃຫ້ໄດ້ກຳໄລຫລາຍ. ຢ່າງໃດກໍຕາມ ສຳລັບບັນດາປ້ຳທີ່ໄດ້ຜ່ານການກວດກາຄຸນນະພາບນ້ຳມັນຮຽບຮ້ອຍແລ້ວ ກົມມາດຕະຖານ ແລະ ວັດແທກ ໄດ້ອອກສະຕິກເກີ້ໃຫ້ ໂດຍມີທັງໝົດ 3 ສີຄື: ສີຂາວ: ໝາຍເຖິງປ້ຳທີ່ກວດກາແລ້ວບໍ່ມີບັນຫາຫຍັງ. ສີຂຽວ: ແມ່ນປ້ຳທີ່ມີບັນຫາ ແລະ ໄດ້ຮັບການກ່າວເຕືອນເພື່ອສຶກສາອົບຮົມແລ້ວນຳເອົານ້ຳມັນໄປປັບປຸງໃໝ່ໃຫ້ໄດ້ຄຸນນະພາບ ແລະ ສີຟ້າ: ແມ່ນປໍ້າທີ່ມີບັນຫາ, ຖືກປັບໄໝ ແລະ ຖືກຢຶດເອົານ້ຳມັນທີ່ບໍ່ໄດ້ມາດຕະ ຖານທັງໝົດແລ້ວ. ດັ່ງນັ້ນ ຖ້າຫາກເຫັນວ່ານໍ້າມັນຢູ່ປໍ້າທີ່ທ່ານໄປໃຊ້ບໍລິການຫາກບໍ່ມີຄຸນນະພາບ ຫຼື ມີຄວາມຜິດປົກກະຕິ ໃຫ້ແຈ້ງມາຍັງສາຍດ່ວນ 1513 ເພື່ອໃຫ້ເຈົ້າໜ້າທີ່ລົງໄປກວດກາຕົວຈິງ​ໄດ້​ທັນ​ເວລາ.

ກວດພົບນ້ຳມັນບໍ່ໄດ້ຄຸນນະພາບຫລາຍກວ່າໝູ່ຢູ່ເຂດຊານເມືອງນະຄອນຫລວງວຽງຈັນ - 1 1 - ກວດພົບນ້ຳມັນບໍ່ໄດ້ຄຸນນະພາບຫລາຍກວ່າໝູ່ຢູ່ເຂດຊານເມືອງນະຄອນຫລວງວຽງຈັນ
ກວດພົບນ້ຳມັນບໍ່ໄດ້ຄຸນນະພາບຫລາຍກວ່າໝູ່ຢູ່ເຂດຊານເມືອງນະຄອນຫລວງວຽງຈັນ - Tiger Head 728x90 - ກວດພົບນ້ຳມັນບໍ່ໄດ້ຄຸນນະພາບຫລາຍກວ່າໝູ່ຢູ່ເຂດຊານເມືອງນະຄອນຫລວງວຽງຈັນ
error: Content is protected !!