ກວ້າງ ແຕ່ຢ່າຂວາງ

ກວ້າງ ແຕ່ຢ່າຂວາງ - advert banner 728 90 728x90 - ກວ້າງ ແຕ່ຢ່າຂວາງ
ກວ້າງ ແຕ່ຢ່າຂວາງ - disadvantages of drinking beer 1 1110x550 1024x507 - ກວ້າງ ແຕ່ຢ່າຂວາງ

ໂດຍ : ມຶກ​ບໍ່​ແຫ້ງ

ເວົ້າກັນວ່າຄົນລາວພວກເຮົາ ມີຈິດໃຈກວ້າງຂວາງ ເອື້ອເຟື້ອເພື່ອແຜ່ ແຕ່ສິ່ງໜຶ່ງທີ່ພວກເຮົາ ຍັງນິຍົມກັນ ກໍຄື ວັດທະນະທຳ ການດຶ່ມ (ສຸລາ) ທີ່ກາຍຈາກກວ້າງ ໄປເປັນຂວງກໍມີ.

ໂດຍພື້ນຖານແລ້ວ ພວກເຮົາຮັບຮູ້ ແລະບໍ່ໄດ້ຍໍຫາງຕົວເອງວ່າ ຄົນລາວມີຈິດໃຈ ກວ້າງຂວາງ ໂດຍສະເພາະການ ຮັບຕ້ອນແຂກຄົນ ທີ່ມາຢາມຮອດ ບ້ານ ຮອດເຮືອນ ຕ້ອງມີ ອາຫານ ແລະສຸລາ (ເຫຼົ້າໄຫ ໄກ່ໂຕ) ທຳນອງນັ້ນລະ ເພື່ອສ້າງຄວາມເພິ່ງພໍໃຈ ຫຼື ສະແດງໃຫ້ເພິ່ນຮູ້ວ່າ ພວກເຮົາບໍ່ມີໃຈຄັບແຄບ.

ຄົນລາວພວກເຮົາແມ່ນມີວັດທະນະທຳການດຶ່ມທີ່ມີລັກສະນະພິເສດອັນໜຶ່ງ ຄືການດຶ່ມທາດເຫຼົ້າທີ່ມີປະລິມານ ຫຼວງຫຼາຍ ເຊິ່ງສະຖິຕິຂອງ ອົງການອະນາໄມໂລກ ຫລຸ້າສຸດສະແດງໃຫ້ເຫັນວ່າ ຄົນລາວດຶ່ມທາດເຫຼົ້າຫຼາຍກວ່າໝູ່ໃນ ອາຊຽນ ໂດຍສະເລ່ຍຕໍ່ຫົວຄົນ ເຊິ່ງຈາກສະຖິຕິດັ່ງກ່າວ ປີໜຶ່ງ ຄົນລາວຄົນໜຶ່ງຈະດຶ່ມເຫຼົ້າ  7 ກວ່າລິດ ຖືວ່າຫຼາຍກວ່າໝູ່ໃນບັນດາປະເທດອາຊຽນ.

ສາເຫດອັນໜຶ່ງທີ່ພວກເຮົາເຫັນວ່າການດຶ່ມທາດເຫຼົ້າຂອງຄົນລາວມີປະລິມານຫຼວງຫຼາຍ ແມ່ນການສະແດງ ເປັນຜູ້ມີຈິດໃຈກວ້າງຂວາງ ເກີນຂອບເຂດ ຈົນກາຍເປັນການບັງຄັບກໍວ່າແມ່ນ ເຊິ່ງຫຼາຍກໍລະນີ ຜູ້ທີ່ ຈະຂັບຂີ່ ກໍຖືກບັງຄັບການ ດຶ່ມຈົນເມົາ ບໍ່ຮູ້ສະຕິ ເຊິ່ງກາຍເປັນຄວາມສ່ຽງທີ່ອັນຕະລາຍ ຕໍ່ຊີວິດນັ້ນກໍ ການເກີດອຸບັດເຫດ ເທິງທ້ອງຖະໜົນ ທີ່ພວກເຮົາເຫັນມາແລ້ວຫຼາຍລາຍ.

ໃນເວລາຮ່ວມວົງເຫຼົ້າ, ພວກເຮົາພະຍາຍາມສະແດງວ່າ ຕົນເອງໃຈກວ້າງ ແລະຮັກແພງໝູ່ຄູ່ສໍ່າໃດ ໂດຍການເສີບ ຈອກເຫຼົ້າຈອກເບຍ ໃຫ້ໝູ່ບໍ່ອັ້ນ ໂດຍບໍ່ຫ່ວງວ່າ ມຶນເມົາ ແລ້ວຂັບຂີ່ຈະເປັນຄວາມສ່ຽງ ເຖິງຊີວິດ, ແລະສົມມຸດວ່າ ໝູ່ຜູ້ນັ້ນຫາກ ເກີດອຸບັດເຫດຍ້ອນການມຶນເມົາ ແລະ ການມຶນເມົານັ້ນ ມາຈາກການບັງຄັບ ຂອງໝູ່ຮ່ວມວົງເຫຼົ້າແລ້ວ ມັນກໍເປັນເລື່ອງທີ່ໜ້າເສົ້າໃຈແທ້.  

ກວ້າງ ແຕ່ຢ່າຂວາງ - 1 1 - ກວ້າງ ແຕ່ຢ່າຂວາງ
ກວ້າງ ແຕ່ຢ່າຂວາງ - lattana 1 - ກວ້າງ ແຕ່ຢ່າຂວາງ

ດັ່ງນັ້ນ ຈຶ່ງບໍ່ແປກໃຈທີ່ ຄວາມພະຍາຍາມ ຂອງເຈົ້າໜ້າທີ່ ໃນການຄວບຄຸມຜູ້ມຶນເມົາ ແລ້ວຂັບຂີ່ ກາຍເປັນສິ່ງທ້າທາຍພິເສດ ຢູ່ ສປປລາວ ເພາະມັນຫຼາຍໂພດ ແຕ່ກຳລັງຂອງເຈົ້າໜ້າທີ່ ເພິ່ນອາດບໍ່ພຽງພໍ ແລະ ກໍເປັນຄວາມຈິງທີ່ເຈັບປວດ ຢູ່ວ່າ ການມຶນເມົາ ແລ້ວຂັບຂີ່ ກາຍເປັນສາເຫດອັນດັບໜຶ່ງ ຂອງ ອຸບັດເຫດເທິງທ້ອງຖະໜົນ ໃນ ສປປລາວ.

ມາຮອດປັດຈຸບັນ ເຈົ້າໜ້າທີ່ເພິ່ນກໍໄດ້ປະກາດຈະແຈ້ງວ່າ ຖ້າກວດພົບຜູ້ໃດມຶນເມົາ ແລ້ວຂັບຂີ່ຈະຖືກປັບໄໝ ຢ່າງໜັກ ເພື່ອເປັນການພັກດັນໃຫ້ພວກເຮົາ ເກງຂາມ ແລະພ້ອມພາກັນ ມີສະຕິຮັບຜິດຊອບສັງຄົມຮ່ວມກັນ ຫຼາຍຂຶ້ນ.

ແຕ່ຈະເຮັດໄດ້ແນວນັ້ນ, ອີກອັນໜຶ່ງທີ່ພວກເຮົາຄວນ ປັບປ່ຽນ ກໍຄື ການບັງຄັບກັນດຶ່ມ ຫຼື ຊ່ວງເສັງ ກັນດຶ່ມຈົນເກີນຂອບເຂດ ແລ້ວຂັບຂີ່ນັ້ນຖືວ່າເປັນຂອດສຳຄັນ ທີ່ຈະສາມາດປະກອບສ່ວນໃຫ້ ອຸບັດເຫດ ເທິງທ້ອງຖະໜົນຫຼຸດຜ່ອນລົງແດ່ ແລະ ເຈົ້າໜ້າທີ່ ເພິ່ນກໍຈະບໍ່ໄດ້ເຮັດວຽກໜັກອີກ.

ເພາະສະນັ້ນ, ຈາກວັດທະນະທຳ ທີທຳທ່າວ່າໃຈກວ້າງບໍ່ເປັນຫ່ວງຄວາມອັນຕະລາຍນັ້ນ ຈົ່ງຫັນມາຮັບຜິດຊອບ ຊ່ວຍກັນຫຼາຍຂຶ້ນ, ພວກເຮົາບໍ່ຄວນໃຈກວ້າງ ເຮັດແບບບໍ່ຮູ້ບໍ່ເຫັນ ມັນຈະເປັນເວນແກ່ຜູ້ອື່ນ ແລະສັງຄົມ.

error: Content is protected !!