ຜົນກະທົບຕໍ່ສຸຂະພາບ ແລະ ການຮັບມືສຳລັບຄົນເຮັດວຽກເປັນກະ
ມີຫລາກຫລາຍອາຊີບທີ່ຍັງຕ້ອງເຂົ້າເຮັດວຽກເປັນກະ ແລ້ວສະລັບສັບປ່ຽນໝູນວຽນເວລາເຮັດວຽກກັນໄປເລື້ອຍໆ, ມື້ນີ້ເຮັດ ວຽກຕອນເຊົ້າ ອີກມື້ໜຶ່ງເຮັດວຽກຕອນບ່າຍ, ອາທິດເຮັດວຽກຕອນເດິກ ອາດຈະແມ່ນຜູ້ຮັກສາຄວາມປອດໄພ, ນັກຂ່າວ, ທ່ານໝໍ, ພະຍາບານ, ພະນັກງານໃນໂຮງງານທີ່ເຮັດການຜະລິດຕະຫລອດ 24 ຊົ່ວໂມງ, ຕຳຫລວດ, ທະຫານບາງຕຳແໜ່ງ, ນັກບິນ, ພະນັກງານຕ້ອນຮັບເທິງເຮືອບິນ, ພະນັກງານເສີບ ຫລື ພໍ່ຄົວແມ່ຄົວທີ່ເຮັດວຽກໃນຮ້ານອາຫານທີ່ເປີດ 24ຊົ່ວໂມງ ເປັນຕົ້ນ. ການພັກຜ່ອນທີ່ບໍ່ກົງເວລາໃນແຕ່ລະມື້ ເຮັດໃຫ້ໂມງຮ່າງກາຍຜິດປົກກະຕິ ຈົນອາດສົ່ງຜົນຮ້າຍຕໍ່ຮ່າງກາຍໄດ້.
ຈາກການສຶກສາການເຮັດວຽກຂອງຮ່າງກາຍມະນຸດ ເຊັ່ນ : ອຸນຫະພູມຮ່າງກາຍ, ການຜະລິດຮໍໂມນ, ການເຕັ້ນຂອງຫົວໃຈ, ຄວາມດັນເລືອດສູງ, ການເຮັດວຽກຂອງກະເພາະອາຫານ ເປັນແບບ 24 ຊົ່ວໂມງ ໂດຍວົງອ້ອມການເຮັດວຽກຕ່າງໆຈະປະສານສອດຄ່ອງກັນ ໂດຍມີສະໝອງ, ປັດໄຈພາຍນອກ ແລະ ສິ່ງແວດລ້ອມເປັນໂຕຄວບຄຸມ ດັ່ງນັ້ນເມື່ອຕ້ອງເຮັດວຽກເປັນກະ ຮ່າງກາຍຈະມີການປັບວົງຈອນການນອນໃຫ້ສອດຄ່ອງກັບກະທີ່ເຮັດວຽກ, ແຕ່ວົງຈອນອື່ນໆຈະຕ້ອງໃຊ້ເວລາໃນການປັບ ເຊິ່ງໂດຍທົ່ວໄປປະມານ 1 ອາທິດ ຫລື ຫລາຍກ່ວານັ້ນ ຜົນກະທົບທີ່ຕາມມາຄືນອນບໍ່ພຽງພໍ ເຮັດໃຫ້ອິດເມື່ອຍອ່ອນເພຍ, ສູນເສຍສະມາທິ ແລະ ການຕັດສິນໃຈຊ້າລົງ. ນອກຈາກນີ້ຍັງເພີ່ມຄວາມສ່ຽງຂອງຄວາມຜິດພາດ ແລະ ອາດເປັນອັນຕະລາຍຕໍ່ຊີວິດ. ໂດຍຜົນກະທົບດ້ານສຸຂະພາບນັ້ນມີ 2 ໄລຍະ ຄື :
1. ໄລຍະສັ້ນ : ຜູ້ທີ່ຕ້ອງເຮັດວຽກກະເດິກຈະໄດ້ຮັບຜົນກະທົບທັນທີໃນຄືນທຳອິດ ເຮັດໃຫ້ນອນຫລັບບໍ່ພຽງພໍ (ປະລິມານຊົ່ວ ໂມງການນອນ) ແລະ ຄຸນນະພາບຂອງການນອນ (ຫລັບບໍ່ສະໜິດ) ຜົນທີ່ຕາມມາຄື ຄວາມອິດເມື່ອຍອ່ອນເພຍ, ເຄັ່ງຄຽດ, ປະ ສິດທິພາບການຕັດສິນໃຈຫລຸດລົງ.
2. ໄລຍະຍາວ : ຈະມີອາການເຄັ່ງຄຽດຈາກການນອນຫລັບບໍ່ພຽງພໍ ມັກເປັນສາເຫດທີ່ນຳມາເຊິ່ງບັນຫາສຸຂະພາບຕ່າງໆ ໃນໄລຍະຍາວ ໄດ້ແກ່ : ພະຍາດຫົວໃຈ ແລະ ຫລອດເລືອດຫົວໃຈອັດຕັນ, ຄວາມດັນເລືອດສູງ ແລະ ກ້າມຊີ້ນຫົວໃຈຂາດເລືອດ ເຖິງ 40%, ພະຍາດກະເພາະອາຫານຫລາຍກ່ວາ 5 ເທົ່າຂອງຄົນປົກກະຕິ, ພະຍາດມະເຮັງເຕົ້ານົມໃນແມ່ຍິງ 30%, ພະຍາດລະບົບອາຫານ, ເບົາຫວານ, ຕຸ້ຍ, ຈິດ – ປະສາດກັງວົນ, ຊຶມເສົ້າ, ບັນຫາຄອບຄົວ ແລະ ສັງຄົມ. ສຳລັບໃນແມ່ຍິງອາດມີຜົນຕໍ່ຮໍໂມນ ແລະ ລະບົບການສືບພັນ ເຮັດໃຫ້ມີລູກຍາກ, ເກີດລູກກ່ອນກຳນົດ ຫລື ຫລຸລູກໄດ້ງ່າຍ.
– ຂໍ້ແນະນຳສຳລັບຜູ້ທີ່ຕ້ອງເຮັດວຽກເປັນກະ :
1. ການນອນ : ພະຍາຍາມນອນໃນຕອນແລງໃຫ້ໄດ້ປະມານ 2 – 3 ຊົ່ວໂມງ, ໃຊ້ເຄື່ອງປ້ອງກັນສຽງເພື່ອຕັດສຽງລົບກວນ, ງົດຊາ, ກາເຟ ຫລື ສານກະຕຸ້ນປະສາດກ່ອນນອນ 2 – 3 ຊົ່ວໂມງ.
2. ການກິນອາຫານ : ບໍ່ຄວນກິນອາຫານຫລາຍໆໃນຕອນແລງ ຫລື ຫລັງທ່ຽງຄືນໄປແລ້ວ ໃຫ້ກິນອາຫານເບົາໆ, ແຕ່ອຸດົມໄປດ້ວຍຄຸນຄ່າທາງສານອາຫານ ເຊິ່ງນົມຖືເປັນອາຫານທີ່ເໝາະສົມທີ່ສຸດ ເນື່ອງຈາກມີຄຸນຄ່າທາງອາຫານສູງ, ຍ່ອຍງ່າຍ ແລະ ເປັນສານເຄືອບກະເພາະອາຫານ.
3. ອອກກຳລັງກາຍ : ຄວນອອກກຳລັງກາຍຫລັງຕື່ນນອນຈະຊ່ວຍເພີ່ມອຸນຫະພູມໃນຮ່າງກາຍ ເຮັດໃຫ້ສົດຊື່ນ ແລະ ຫ້າວຫັນຂຶ້ນ ຫາກປະຕິບັດໄດ້ຕາມຄຳແນະນຳຈະເຮັດໃຫ້ສຸຂະພາບແຂງແຮງ ແລະ ພ້ອມທີ່ຈະເຮັດວຽກເປັນກະຕໍ່ໄປໄດ້ຢ່າງມີປະສິດທິພາບ.
