5 ເຄັດລັບທີ່ຊ່ວຍໃຫ້ທ່ານອ່ານໜັງສືໄດ້ຫລາຍຂຶ້ນ

    ຍິ່ງອ່ານຫລາຍ ຍິ່ງຮູ້ຫລາຍ, ການມີສະຖານທີ່ປະຈຳ ຫລື ມຸມປະຈຳພ້ອມກັບໜັງສືເຫລັ້ມມັກ ຍ່ອມເປັນຄວາມຄິດທີ່ດີ ເພາະມັນຊ່ວຍໃຫ້ທ່ານອ່ານໜັງສືໄດ້ຫລາຍຂຶ້ນ. ການອ່ານມີປະໂຫຍດຫລວງຫລາຍກັບຊີວິດຄົນເຮົາໃນຫລາຍດ້ານ ຈາກການສຶກສາຂອງມະຫາວິທະຍາໄລສະແຕນຟອດ ພົບວ່າການອ່ານຊ່ວຍເພີ່ມອັດຕາໃນການໄຫລວຽນເລືອດໄປລ້ຽງສະໝອງ ເຊິ່ງສົ່ງຜົນໃຫ້ປະສິດທິພາບໃນການຮຽນຮູ້ເພີ່ມຂຶ້ນໄປນຳ. ນອກຈາກນີ້ ການອ່ານໜັງສືເປັນປະຈຳຍັງຊ່ວຍເພີ່ມສະມາທິ ແລະ ຄວາມເຂົ້າໃຈໂລກອ້ອມໂຕໃຫ້ຫລາຍຂຶ້ນນຳ. ມື້ນີ້ພວກເຮົາມີ 5 ວິທີງ່າຍໆທີ່ຈະຊ່ວຍໃຫ້ທ່ານອ່ານໄດ້ຫລາຍຂຶ້ນຕັ້ງແຕ່ຕອນນີ້.

     1. ຕັ້ງເປົ້າໝາຍໃນການອ່ານໃຫ້ຈະແຈ້ງ : ທ່ານຈະອ່ານໜັງສືໃຫ້ໄດ້ຈັກເຫລັ້ມ ? ແລ້ວຈະອ່ານໃຫ້ຈົບຕອນໃດ ? ການລະບຸເປັນໂຕເລກທີ່ຈະແຈ້ງຈະຊ່ວຍໃຫ້ທ່ານຕິດຕາມຄວາມກ້າວໜ້າແລະ ໃຫ້ລາງວັນໂຕເອງໄດ້ງ່າຍຂຶ້ນ Goodreads ເປັນອີກໜຶ່ງທາງເລືອກທີ່ໃຊ້ໃນການຕິດຕາມລາຍການໜັງສື ແລະ ຕັ້ງເປົ້າໝາຍການອ່ານໜັງສືໝົດປີຂອງທ່ານ. ນອກຈາກນີ້, ໝູ່ໃນເຟສບຸກຍັງສາມາດເຂົ້າມາຕິດຕາມຄວາມກ້າວໜ້າ ແລະ ໃຫ້ກຳລັງໃຈທ່ານໄດ້ຜ່ານທາງແອັບດັ່ງກ່າວໄດ້ນຳ.

     2. ກຳນົດເວລາອ່ານທີ່ແນ່ນອນ :  ລະບຸເວລາທີ່ຈະແຈ້ງສຳລັບການອ່ານໜັງສື, ຂຽນລົງໄປໃນປື້ມວາງແຜນ ແລະ ຈົ່ງໃຫ້ ຄວາມສຳຄັນກັບມັນເທົ່າໆກັບທີ່ທ່ານໃຫ້ຄວາມສຳຄັນກັບການກິນ ແລະ ການນອນ. ທ່ານອາດຫາແອັບເພື່ອອຳນວຍຄວາມສະດວກ ເຊັ່ນ : Evernote ຫລື  ຖ້າມັນຫຍຸ້ງຍາກເກີນໄປ ໂມງປຸກກໍເປັນອີກທາງເລືອກທີ່ດີເພື່ອເຕືອນທ່ານວ່າເຖິງເວລາທີ່ຕ້ອງອ່ານໜັງສືແລ້ວ. ແນວໃດກໍຕາມ ທ່ານຕ້ອງເລືອກເວລາທີ່ທ່ານຄິດວ່າຮ່າງກາຍ ແລະ ຈິດໃຈຂອງທ່ານພ້ອມແທ້ໆ ເປັນຕົ້ນໃນຕອນເຊົ້າ ຍ້ອນໃນຕອນເຊົ້າຮ່າງກາຍ ແລະ ຈິດໃຈຂອງເຮົາຈະປອດໂປ່ງຫລາຍກ່ວາຊ່ວງເວລາອື່ນ ຈຶ່ງເໝາະສົມຢ່າງຍິ່ງກັບການອ່ານໜັງສື.

     3. ຈັດພື້ນທີ່ອ່ານໃຫ້ແສນສະບາຍ : ສະຖານທີ່ກໍເປັນອີກໜຶ່ງປັດໄຈສຳຄັນ ເລືອກບ່ອນທີ່ມິດງຽບສະຫງົບ ປາສະຈາກສຽງລົບກວນ ແລະ ເຮັດໃຫ້ເປັນບ່ອນອ່ານໜັງສືສຳລັບທ່ານໂດຍສະເພາະ, ເລືອກຕັ່ງທີ່ນຸ້ມສະບາຍ ແລະ ອາດແນມຫາໂຄມໄຟ ແລະ ໂຕະນ້ອຍໆໄວ້ໃກ້ໆກໍຖືເປັນຄວາມຄິດທີ່ດີ ແລະ ສຳຄັນທີ່ສຸດເພື່ອໃຫ້ການອ່ານຂອງທ່ານເປັນໄປຢ່າງສະໝໍ່າສະເໝີ ຢ່າເອົາໜັງສືທີ່ຍັງອ່ານບໍ່ຈົບໄປເກັບມ້ຽນໄວ້ໃນຊັ້ນວາງປື້ມເດັດຂາດ, ແຕ່ໃຫ້ເອົາມາວາງບ່ອນທີ່ສາມາດແນມເຫັນໄດ້ງ່າຍ.

     4. ເລືອກຮູບແບບໜັງສືທີ່ມັກ: ຫາກທ່ານກຳລັງສັບສົນວ່າຈະອ່ານໜັງສືຮູບແບບໃດດີລະຫ່ວາງໜັງສືແບບອີເລັກໂຕຣນິກບຸ໊ກແລະ ໜັງສືທີ່ເປັນເຫລັ້ມແທ້ໆ ລອງພິຈາລະນາຂໍ້ມູນຕໍ່ໄປນີ້ເຊິ່ງຈະຊ່ວຍໃຫ້ທ່ານຕັດສິນໃຈໄດ້ງ່າຍຂຶ້ນ ຂໍ້ດີຂອງໜັງສືໃນຮູບແບບອີເລັກໂຕຣນິກແມ່ນສະດວກ, ໃຊ້ງານງ່າຍ ແລະ ມີຮູບແບບການຫລິ້ນທີ່ຫລາກຫລາຍກ່ວາ ຍິ່ງໄປກ່ວານັ້ນທ່ານຍັງຈະຫາເລກໜ້າ ແລະຕອນທີ່ທ່ານຕ້ອງການອ່ານໄດ້ຢ່າງງ່າຍດາຍພຽງແຕ່ເອົາປາຍນິ້ວມືສຳຜັດ, ໂຕໜັງສື ແລະ ໜ້າກໍຍັງສາມາດປັບແຕ່ງໄດ້ຕາມໃຈທ່ານນຳອີກເຊິ່ງຈະເປັນປະໂຫຍດຫລາຍຫາກທ່ານມີບັນຫາໃນການອ່ານໜັງສືໂຕນ້ອຍໆ, ແຕ່ຫາກຂໍ້ດີເຫລົ່ານີ້ຍັງບໍ່ກົງຕາມໃຈທ່ານ ໃຫ້ລອງພິຈາລະນາໜັງສືເປັນເຫລັ້ມເບິ່ງ ແນ່ນອນວ່າໜັງສືທີ່ເປັນເຫລັ້ມນັ້ນບໍ່ຈຳເປັນຕ້ອງສຽບ ສາຍສາກໃຫ້ຫຍຸ້ງຍາກ ແລະ ຍັງສະດວກຫາກໝູ່ຂອງທ່ານຢາກຢືມຂອງທ່ານໄປອ່ານ ແລະ ແນ່ນອນໜັງສືເປັນເຫລັ້ມຍັງຊ່ວຍໃຫ້ທ່ານໄດ້ພັກສາຍຕາຈາກການຈ້ອງອຸປະກອນອີເລັກໂຕຣນິກດົນໆໄດ້, ແຕ່ສິ່ງທີ່ເປັນສະເໜ່ຂອງໜັງສືເປັນເຫລັ້ມແທ້ໆແມ່ນ ຄວາມຮູ້ສຶກຈາກການໄດ້ສຳຜັດເຈ້ຍໃນແຕ່ລະໜ້ານັ້ນເອງ, ແຕ່ທັງ ນີ້ການຈະເລືອກໜັງສືໃນຮູບແບບໃດໆກໍຕາມຍ່ອມຂຶ້ນກັບ ຄວາມມັກສ່ວນບຸກຄົນເປັນສຳຄັນ ເພາະສະນັ້ນເລືອກໃນແບບທີ່ມັນເໝາະສົມກັບໂຕທ່ານຈະດີທີ່ສຸດ.

      5. ໝັ່ນເຂົ້າຫ້ອງສະໝຸດ : ນອກຈາກຫ້ອງສະໝຸດຈະເຕັມໄປດ້ວຍໜັງສືໃໝ່ໆທີ່ຫລາກຫລາຍ ແລະ ໜ້າສົນໃຈແລ້ວ ຍັງມີໜັງສືສຽງນຳອີກ ແລະ ຍ້ອນການອ່ານໜັງສືໃນຫ້ອງສະໝຸດນັ້ນທ່ານເກືອບຈະບໍ່ຕ້ອງເສຍເງິນຈັກກີບ ທ່ານຈຶ່ງມີໂອກາດໄດ້ອ່ານໜັງສືໄດ້ຢ່າງຫລາກຫລາຍປະເພດແລະ ຫາກທ່ານເປັນຄົນໜຶ່ງທີ່ມັກອ່ານໜັງສືອີເລັກໂຕຣນິກ ແອັບຊື່ວ່າ Overdrive ກໍຖືເປັນໜຶ່ງແອັບທີ່ດີ ເພາະມັນຊ່ວຍທ່ານກວດສອບໜັງສືອີເລັກໂຕຣນິກ ແລະ ໜັງສືສຽງຈາກຫ້ອງສະໝຸດທ້ອງຖິ່ນໂດຍບໍ່ຄິດຄ່າບໍລິການ. ຈົ່ງອ່ານໃຫ້ຫລາຍ ທັງກ່ອນນອນ ແລະ ຫລັງຕື່ນນອນ ເພາະຂະນະທີ່ທ່ານອ່ານຈະເປັນຊ່ວງເວລາທີ່ທ່ານມີສະມາທິຫລາຍທີ່ສຸດ – Theo James.