ນີລ ໂຣເບີດສັນ ທ໊ອບຟອມຖືກເວລາ ກ່ອນສູ້ເສິກຊີງແຊ້ມໂລກ
ຖ້າບໍ່ນັບ ຣອນນີ້ ໂອຊຸນລີແວນ ນັກສະນຸກເກີມື 1 ຂອງໂລກຊາວອັງກິດ ຕ້ອງບອກວ່າ ນີລ ໂຣເບີດສັນ ນັກສະນຸກເກີໄວ 37 ປີ ຈາກອົດສະຕຣາລີ ມີຜົນງານດີທີ່ສຸດໃນຊ່ວງນີ້.
ຫລ້າສຸດ ໃນວັນທີ 7 ເມສາຜ່ານມາ ນັກສະນຸກເກີຈາກນະຄອນເມລເບິນຄົນນີ້ ສາມາດສ້າງຜົນງານໄດ້ຢ່າງດີສຸດ ກັບການຄວ້າແຊ້ມລາຍການຊີງໄຜ່ ໄຊນາ ໂອເພັນ 2019 ຢູ່ນະຄອນຫລວງປັກກິ່ງ ສປ ຈີນ ຫລັງຈາກຮອບຊີງຊະນະເລີດ ເອົາຊະນະ ແຈ໊ກ ລິຊໍສະກີ ນັກສະນຸກເກີມື 15 ຂອງໂລກຈາກອັງກິດໄປຢ່າງຂາດລອຍ 11-4 ເຟມ ຄວ້າແຊ້ມລາຍການນີ້ໄປຄອງເປັນສະໄໝທີ 2 ຕໍ່ຈາກປີ 2013 ແລະ ຖືເປັນແຊ້ມລາຍການທີ 3 ໃນລະດູການນີ້ ຕໍ່ຈາກ ຣິກ້າ ມາສເຕີ 2018 ແລະ ເວລ ໂອເພັນ 2019.
ຈາກການທີ່ລາຍການໄຊນາ ໂອເພັນ 2019 ເປັນລາຍການທີ່ມີເງິນລາງວັນ ແລະ ຄະແນນສະສົມສູງທີ່ສຸດເປັນອັນດັບ 2 ຮອງຈາກການແຂ່ງຂັນຊີງແຊ້ມໂລກພຽງລາຍການດຽວ ນອກຈາກຈະເຮັດໃຫ້ ນີລ ໂຣເບີດສັນ ຄວ້າເງິນລາງວັນ 225.000 ປອນແລ້ວ ຍັງໄດ້ຮັບຄະແນນສະສົມເຖິງ 225.000 ຄະແນນ ເລື່ອນຈາກອັນດັບ 8 ຂຶ້ນມາຢູ່ອັນດັບ 4 ຂອງໂລກ ພ້ອມມີຄະແນນສະສົມໃນເວລານີ້ເຖິງ 817.500 ຄະແນນ.
ບໍ່ພຽງແຕ່ຄວ້າແຊ້ມລາຍການນີ້ເທົ່ານັ້ນ ໃນລະດູການປັດຈຸບັນ (2018-19) ນັກສະນຸກເກີຊາວອົດສະຕຣາລີ ສ້າງຜົນງານໄດ້ດີຢ່າງຕໍ່ເນື່ອງ ຈົນເຂົ້າຮອບກ່ອນຮອງຊະນະເລີດເປັນຢ່າງໜ້ອຍ 10 ລາຍການ ແລະ ເປັນການເຂົ້າຊີງເຖິງ 6 ລາຍການ ພ້ອມຄວ້າແຊ້ມໄປຄອງເຖິງ 3 ລາຍການ ໂດຍ 3 ລາຍການທີ່ພາດໄດ້ພຽງຮອງແຊ້ມ ທັງອິນເຕີເນຊັນແນລ ແຊມປ້ຽນຊິບ 2018, ເພລເຍີສ ແຊມປ້ຽນຊິບ 2019 ແລະ ທົວ ແຊມປ້ຽນຊິບ 2019 ລ້ວນແລ້ວແຕ່ເສຍໃນຮອບຊີງຊະນະເລີດ. ຖ້ານັບຄະແນນສະສົມສະເພາະລະດູການນີ້ (2018-19) ຫລື one-year ranking ລາວຢູ່ອັນດັບ 3 ໂດຍເປັນຮອງພຽງ ຣອນນີ້ ໂອຊຸນລີແວນ ກັບ ມາກ ອັລເລນ ເທົ່ານັ້ນ.
ຈາກຜົນງານທີ່ໂດດເດັ່ນໃນຊ່ວງນີ້ ເຮັດໃຫ້ ນີລ ໂຣເບີດສັນ ກັບມາຢູ່ໃນຊ່ວງທ໊ອບຟອມອີກ ຫລັງຈາກລະດູການຜ່ານມາ (2017-18) ຜົນງານບໍ່ດີ ຈົນຫລຸດຈາກອັນດັບທ໊ອບ 10 ຂອງໂລກ. ຖ້າໃນການແຂ່ງຂັນຊີງແຊ້ມໂລກ 2019 ນີລ ໂຣເບີດສັນ ຍັງຢູ່ໃນຊ່ວງທ໊ອບຟອມແບບນີ້ ມີໂອກາດສູງທີ່ຈະຄວ້າແຊ້ມໂລກສະໄໝທີ 2 ມາຄອງ ເຖິງວ່າລາຍການນີ້ຈະມີນັກສະນຸກເກີລະດັບໂລກລົງແຂ່ງຂັນຫລາຍກໍຕາມ.
