ສະພາບເສັ້ນທາງໃນຕົວເມືອງຫລວງ

ໂດຍ: ທ່ຽງທຳ

ສະບາຍດີ, ເພື່ອນຜູ້ອ່ານທີ່ ຮັກແພງ, ກໍໜ້າເປັນຫວ່ງຕໍ່ສະພາບເສັ້ນທາງໃນນະຄອນຫລວງວຽງຈັນເຮົາເບິ່ງຄືວ່າ ນັບມື້ນັບຢ້ຳແຍ່ ແລະ ເປ່ເພ ຮ້າຍແຮງລົງທຸກຂະນະ, ໄປທາງໃດກໍຈະເຫັນແຕ່ເປັນບວກເປັນຂູມຝົນມາເປັນຂີ້ຕົມແດດມາເປັນຂີ້ຝຸ່ນເບິ່ງ ຢ່າງໜຶ່ງຄືເຮົາບໍ່ໄດ້ເອົາໃຈ ໃສ່ຕໍ່ການປົວແປງໃດໆ.

ໂດຍສະເພາະໃນປັດຈຸບັນນີ້ ຮ້າຍແຮງທີ່ສຸດແມ່ນເສັ້ນທາງຕະຫລາດແລງໜອງດ້ວງນັບແຕ່ເຂດ 3 ແຍກໂອດຽນ (ໂຮງສາຍຮູບເງົາເກົ່າ) ລົງມາຈົນສຸດເຂດຕະຫລາດແລງ ເຊິ່ງເຄີຍເປັນສູນການຄ້າທີ່ມີເສັນທາງ ໄປມາຢ່າງສະດວກສະບາຍ ຢູ່ນັ້ນໄດ້ກັບກາຍມາ ເປັນເສັນ ທາງຈົນເກືອບຈະສັນຈອນໄປມາບໍ່ໄດ້ອີກແລ້ວ, ຍ້ອນເຂດດັ່ງກ່າວມີການກໍ່ສ້າງ ຕຶກອາຄານສູນການຄ້າຂະ ໜາດໃຫຍ່ ແລະ ບາງຈຸດກໍເປັນຍ້ອນລະບົບລະບາຍນ້ຳຂອງບັນດາຕຶກອາຄານທີ່ ສ້າງຂຶ້ນໃໝ່ໃນເຂດດັ່ງກ່າວບໍ່ມີມາດຕະຖານບາງຄັ້ງປາກົດເຫັນນ້ຳຂີ້ຊີກພົ້ນຂຶ້ນມາໃນເຂດແຄມທາງດັ່ງກ່າວຍິ່ງ  ເພີ່ມຄວາມເປື້ອນເປີະ ໃຫ້ເສັ້ນທາງສາຍນີ້ທີ່ເປ່ເພເປັນບວກລຸບຂຸມ ຢູ່ແລ້ວຍິ່ງຮ້າຍແຮງ ຂຶ້ນຕື່ມ ແລະ ກົງກັນຂ້າມເບິ່ງ ຄືວ່າ ຂະແໜງຮັບຜິດຊອບ ບໍ່ໄດ້ເອົາຫົວຊາຕໍ່ບັນຫາເປ່ເພດັ່ງກ່າວແຕ່ປະການໃດ ແລະ ບໍ່ຮູ້ວ່າຮອດລະດູຝົນມານີ້ຜູ້ສັນຈອນໄປມາ ແລະ ປະຊາຊົນຜູ້ມີບ້ານເຮືອນຢູ່ ບໍລິເວນ ນັ້ນຈະໃຊ້ຖະໜົນ ນີ້ແນວໃດ ແລະ ໃນຂະນະ ດຽວກັນກໍແມ່ນປີທີ່ຊາວນະຄອນຫລວງວຽງຈັນເຮົາຈະໄດ້ພ້ອມກັນຕ້ອນຮັບປີ ທ່ອງທ່ຽວ ລາວ-ຈີນ ໃຫ້ ສົມໜ້າສົມຕາ.

ແຕ່ແລ້ວບັນຫາຄວາມ ຫຍຸ້ງຍາກໃນການສັນຈອນ ໄປມາ ໃນຕົວເມືອງຫລວງ ເຮົາພັດຍັງມີຢູ່ຢ່າງຫລວງຫລາຍ ແລະ ຖ້າສະພາບແບບນີ້ຫາກຍັງປະປ່ອຍແກ່ ຍາວອອກໄປບໍ່ຮູ້ວ່າບັນດາແຂກຕ່າງດ້າວ, ທ້າວຕ່າງ ແດນຜູ້ມາທ່ຽວຊົມນະຄອນຫລວງວຽງຈັນເຮົາຈະມີມຸມ ມອງແນວໃດຕໍ່ຕົວເມືອງຫລວງເຮົາ./.