ຫລາຍ​ປະ​ເທດ​ຍັງ​ຕ້ອງການ​ຊື້​ໄຟຟ້າ​ຈາກ​ລາວ

- advert banner 728 90 728x90 - ຫລາຍ​ປະ​ເທດ​ຍັງ​ຕ້ອງການ​ຊື້​ໄຟຟ້າ​ຈາກ​ລາວ

  ພາຍຫລັງ​ມີ​ສະມາຊິກ​ສະພາ​ແຫ່ງ​ຊາດ​ຫລາຍ​ເຂດ​ເລື​ອກຕັ້ງ​ໄດ້​ມີ​ຄໍາ​ຖາມ​ເຈາະ​ຈີ້ມຕໍ່ຂະ​ແໜງ​ການ​ພະລັງງານ ​ແລະ ບໍ່​ແຮ່ ກ່ຽວ​ກັບ​ການ​ກໍ່ສ້າງ​ສາຍ​ສົ່ງ ​ແລະ ແຜນ​ຂະຫຍາຍ​ຕະຫລາດ​ໄຟຟ້າ​ເພື່ອ​ຮັບປະກັນ​ການ​ສົ່ງ​ອອກກະ​ແສ​ໄຟ​​ໄດ້​ຕາ​ມ​ແຜນການກໍານົດ​ໄວ້​ນັ້ນ, ທ່ານ​ລັດຖະມົນຕີ​ກະຊວງ​ດັ່ງກ່າວ​ໄດ້​ຊີ້​ແຈງ​ວ່າ: ​ໄລຍະ​ຜ່ານ​ມາ,​ ຂະ​ແໜງ​ການ​ຂອງ​ຕົນ ​ໄດ້​ປະສານ​ສົມທົບ​ກັບ​ພາກສ່ວນ​ກ່ຽວ​ຂ້ອງ​ນັບ​ທັງ​ພາຍ​ໃນ ​​ແລະ ຕ່າງປະ​ເທດ​ໃນ​ການ​ປຶກສາ​ຫາລື, ​ເຈ​ລະ​ຈາ​ຊື້-ຂາຍ​ໄຟຟ້າ​ກັບ​ບັນດາ​ປະ​ເທດ​ໃກ້​ຄຽງ ​ເຊັ່ນ: ຫວຽ​ດນາມ, ​ໄທ, ກໍາ​ປູ​ເຈຍ, ມຽນມາ, ມາ​ເລ​ເຊຍ ​ແລະ ສປ ຈີນ. ​ໄປ​ຄຽງຄູ່​ກັບ​ການ​ເອົາ​ໃຈ​ໃສ່​ຊຸກຍູ້​ການ​ກໍ່ສ້າງ​ສາຍ​ສົ່ງ​ໄຟຟ້າ​ໃນ​ຂອບ​ເຂ​ດທົ່ວ​ປະ​ເທດ​ໃຫ້​ປະຕິບັດ​ຢ່າງ​ມີ​ປະສິດທິ​ຜົນ ​ແລະ ຢູ່​ປະ​ເທດ​ເຮົາ​ການ​ຂະຫຍາຍ​ຕະຫລາດ​ໄຟຟ້າ​ມີ 2 ປະ​ເພດ​ຄື: ຕະຫລາດ​ພາຍ​ໃນ ​ເຫັນ​ວ່າ​ມາ​ຮອດ​ປັດຈຸບັນ​ການ​ຊົມ​ໃຊ້​ໄຟຟ້າຢູ່​ປະ​ເທດ​ເຮົາບັນລຸ​ແລ້ວ 4.222 ກວ່າ​​ເມ​ກາ​ວັດ, ສະ​​ເລ່ຍ​ເພີ່ມ​ຂຶ້ນ 7-8% ຕໍ່​ປີ. ສ່ວນ​ຕະຫລາດ​ຕ່າງປະ​ເທດ​​ແມ່ນໄດ້​ເຊັນ​ບົດ​ບັນ​ທຶກ​ຄວາມ​ເຂົ້າ​ໃຈຊື້​-ຂາຍ​ໄຟ​ໃຫ້​ກໍາ​ປູ​ເຈຍຈໍານວນ 3.215 ​ເມ​ກາ​ວັດ ​ແລະ ປັດຈຸບັນ​ສົ່ງ​ອອກ​​ໄດ້​​ແລ້ວ 20 ​ເມກ​າວັດ, ຄາດວ່າ​ຮອດປີ 2027 ຈະ​ສົ່ງ​​ໃຫ້​ຄົບ​ຕາມ​ສັນຍາ.

- new3 - ຫລາຍ​ປະ​ເທດ​ຍັງ​ຕ້ອງການ​ຊື້​ໄຟຟ້າ​ຈາກ​ລາວ

ສ່ວນ​ການ​ຊື້-ຂາຍ​​ໄຟ​ກັບຫວຽດນາມ ​​ແມ່ນ​ໄດ້​ເຊັນບົດ​ບັນ​ທຶກ​ຄວາມ​ເຂົ້າ​ໃຈ​ນໍາ​ກັນ​ທັງໝົດ 5.000 ​ເມ​ກາ​ວັດ ​ແລະ ສົ່ງອອກ​​ໄດ້ແລ້ວ 540 ​ເມ​ກາ​ວັດ.​ ສໍາລັບ​ປະ​ເທດ​ໄທ ໄດ້​​ເຊັນ​ບົດ​ບັນທຶກຊື້-ຂາຍ​ໄຟ​ທັງ​ໝົດ 9.000 ​ເມ​ກາ​ວັດ ​ແລະ ສົ່ງ​​ໄຟໃຫ້​ແລ້ວ 5.415 ​ເມ​ກາ​ວັດ. ສໍາລັບ​ການ​ສົ່ງ​ໄຟຟ້າ​ໃຫ້​ປະ​ເທດ​ມຽນ​ໄດ້​ແລ້ວ 10 ​ເມ​ກາ​ວັດ, ຮອດ​ປີ 2020 ຈະ​​ເພີ່ມ​ຂຶ້ນ​ເປັນ 20 ​ເມກາວັດ ​ແລະ ຮອດ​ປີ 2023 ​ເພີ່ມ​ຂຶ້ນ​ເປັນ 100 ​ເມ​ກາ​ວັດ. ນອກ​ນີ້, ​ໃນ​ກຸ່ມ​ປະ​ເທດ​ອາ​ຊຽນ,​ ​ໄດ້​ມີ​ແຜນ​ເຊື່ອມ​ໂຍງ​ລະບົບ​ສາຍ​ຮ່ວມ​ກັນ​ໃນ​ການ​ຊື້-ຂາຍ ​ແລະ ​ແລກປ່ຽນ​ພະລັງງານ​ໄຟຟ້າ​ຮ່ວມ​ກັນ, ​ເຊິ່ງ ສປປ ລາວ ​ແມ່ນ​ປະ​ເທດ​ທໍາ​ອິດ​ໄດ້​ລິ​ເລີ່​ມການ​ສົ່ງ​ໄຟຟ້າ​ແບບ​ເຊື່ອມ​ໂຍງ​ໃນ​ອາ​ຊຽນ ​ແລະ ພາກ​ພື້ນ, ​ໂດຍ​ໄດ້​ມີ​ສັນຍາ​ຊື້-ຂາຍ​ໄຟຟ້າ​ກັບ​ມາ​ເລ​ເຊຍ​ໂດຍ​ຜ່ານ​ປະ​ເທດ​ໄທ ​ແລະ ປັດຈຸບັນ​ສົ່ງ​ໃຫ້​ແລ້ວຈໍານວນ 100 ​ເມ​ກາ​ວັດ, ຄາດ​ວ່າຮອດ​ປີ 2020 ຈ​ະ​ເພີ່ມ​ເປັນ 300 ​ເມ​ກາ​ວັດ ​ແລະ ຈະ​ສືບ​ຕໍ່​ເຈລະຈາ​ຊື້-ຂາຍ​ກັບປະ​ເທດ​ສິງກະ​ໂປ​ຕື່ມ​ອີກ.

ສ່ວນ​​ໂຄງການຂະຫຍາຍສາຍສົ່ງໄຟຟ້າຈໍານວນໜຶ່ງທີ່ມີຄວາມຊັກຊ້າ ແມ່ນຍ້ອນທະນາຄານຕ່າງປະເທດທີ່ຈະປ່ອຍເງິນກູ້ໃຫ້ໃນເບື້ອງຕົ້ນນັ້ນ ໄດ້ຍົກເລີກສັນຍາ ຈຶ່ງສົ່ງຜົນກະທົບຕໍ່ການຈັດຕັ້ງປະຕິບັດມີຄວາມຫລ້າຊ້າ.    

error: Content is protected !!