ອາເມລິກາ ຊີ້ “ໂຄວິດ-19” ຕິດຢູ່ນຳ “ປາລາສະຕິກ-ສະແຕນເລດ” ດົນ 3 ວັນ
“ສະຖາບັນສາທາລະນະສຸກອາເມລິກາ” ເປີດເຜີຍລາຍງານໃໝ່ຊີ້ “ໂຄວິດ-19” ມີຊີວິດຢູ່ນຳ “ປາລາສະຕິກກັບສະແຕນເລດ” ໄດ້ດົນ 3 ວັນ, ເຈ້ຍແຂງ 24 ຊົ່ວໂມງ ແລະ ທອງແດງ 4 ຊົ່ວໂມງ.
ສະຖາບັນສາທາລະນະສຸກແຫ່ງຊາດຂອງອາເມລິກາ (NIH) ເຊິ່ງເປັນໜ່ວຍງານສັງກັດກະຊວງສາທາລະນະສຸກອາເມລິກາ ເປີດເຜີຍຜົນການສຶກສາຫລ້າສຸດໃນວັນທີ 11 ມີນາ ລະບຸວ່າ: ເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ສາມາດຢູ່ນຳພື້ນຜິວປາລາສະຕິກ ແລະ ສະແຕນເລດໄດ້ສູງສຸດເຖິງ 3 ວັນ.
ນັກວິໄຈໄດ້ປຽບທຽບຄວາມສະຖຽນຢູ່ເທິງພື້ນຜິວຂອງເຊື້ອໄວຣັສໂຄໂຣນາ ເຊິ່ງກໍ່ໃຫ້ເກີດໂຣກໂຄວິດ-19 ກັບເຊື້ອໄວຣັສທີ່ກໍ່ໃຫ້ເກີດໂຣກຊາຣ໌ສ ໂດຍພົບວ່າ: ເຊື້ອໄວຣັສໂຄໂຣນາສາມາດຢູ່ໄດ້ເທິງພື້ນຜິວທອງແດງສູງສຸດ 4 ຊົ່ວໂມງ, ຢູ່ເຈ້ຍແຂງໄດ້ 24 ຊົ່ວໂມງ. ຂະນະທີ່ຢູ່ປາລາສະຕິກ ແລະ ສະແຕນເລດໄດ້ 2-3 ວັນ.
