ຜູ້ນຳຟີລິບປິນເຜີຍບໍ່ໄດ້ຂໍໃຫ້ອາເມລິກາ ຊ່ວຍຢຸດຕິເຫດຍຶດເມືອງທາງໃຕ້
ມະນິລາ 12 ມິຖຸນາ: ປະທານາທິບໍດີ ໂຣດຣິໂກ ດູເຕີເຕ ຂອງຟີລິບປິນ ປະຕິເສດວ່າ: ບໍ່ໄດ້ຂໍໃຫ້ອາເມລິກາຊ່ວຍຢຸດຕິເຫດກຸ່ມຕິດອາວຸດຍຶດເມືອງມາລາວີ ທາງຕອນໃຕ້ຂອງປະເທດຕາມທີ່ອາເມລິກາໃຫ້ຂ່າວ.
+ ອາເມລິກາກຳລັງຊ່ວຍຟີລິບປິນຢຸດຕິເຫດກຸ່ມຕິດອາວຸດຍຶດເມືອງທາງໃຕ້
+ ອິນໂດເນເຊຍຈັບກຸມຊາຍພົວພັນເຫດຄວາມບໍ່ສະຫງົບຢູ່ຟີລິບປິນ
+ ກອງທັບຟີລິບປິນເຊື່ອເຫດຄວາມບໍ່ສະຫງົບຢູ່ມາລາວີໃກ້ຢຸດແລ້ວ
ປະທານາທິບໍດີ ດູເຕີເຕ ຖະແຫລງຂ່າວຢູ່ເມືອງຄາກາຍັນ ເດິ ໂອໂຣ ຫ່າງຈາກເມືອງມາລາວີ ໃນເກາະມິນດາເນົາໄປ 100 ກິໂລແມັດ ໃນວັນທີ 11 ມິຖຸນານີ້ວ່າ: ບໍ່ເຄີຍຕິດຕໍ່ຂໍການຊ່ວຍເຫລືອຈາກອາເມລິກາ, ທ່ານຫາກໍຮູ້ເມື່ອກອງກຳລັງອາເມລິກາເຂົ້າມາໃນພື້ນທີ່ແລ້ວ. ທ່ານ ດູເຕີເຕ ຢືນຢັນວ່າ: ທ່ານມີອຳນາດເໜືອກະຊວງປ້ອງກັນປະເທດຕາມກົດໄອຍະການເສິກທີ່ປະກາດຢູ່ເກາະມິນດາເນົາມາແຕ່ວັນທີ 23 ພຶດສະພາ, ແຕ່ບໍ່ໄດ້ກ່າວວ່າກອງທັບຕິດຕໍ່ອາເມລິກາໂດຍບໍ່ແຈ້ງທ່ານ ຫລື ບໍ່.
ຜູ້ນຳຟີລິບປິນກ່າວເລື່ອງນີ້ເນື່ອງຈາກກອງທັບຟີລິບປິນຖະແຫລງໃນວັນທີ 3 ມິຖຸນາວ່າ: ກອງກຳລັງອາເມລິກາໃຫ້ການຊ່ວຍເຫລືອດ້ານເຕັກນິກ, ແຕ່ບໍ່ໄດ້ໃຫ້ການສະໜັບສະໜູນພາກພື້ນດິນ ພາຍຫລັງສະຖານທູດອາເມລິກາຢູ່ນະຄອນຫລວງມະນິລາເປີດເຜີຍວ່າ: ໄດ້ຈັດສົ່ງການຊ່ວຍເຫລືອຕາມທີ່ລັດຖະບານຟີລິບປິນຮ້ອງຂໍ. ຂະນະທີ່ກະຊວງປ້ອງກັນປະເທດອາເມລິກາຖະແຫລງຢືນຢັນໃນວັນດຽວກັນວ່າ: ກຳລັງໃຫ້ການຊ່ວຍເຫລືອກອງກຳລັງຟີລິບປິນດ້ານຄວາມໝັ້ນຄົງ ແລະ ການເຝິກອົບຮົມດ້ານການຂ່າວ ແລະ ການລາດຕະເວນ ລວມທັງມີທະຫານພິເສດ 300-500 ຄົນຢູ່ຟີລິບປິນສະໜັບສະໜູນເລື່ອງການອົບຮົມ ແລະ ກິດຈະກຳຕາມປົກກະຕິ, ແຕ່ບໍ່ໄດ້ເປີດເຜີຍໃນລາຍລະອຽດ. ປັດຈຸບັນ ອາເມລິກາບໍ່ມີທະຫານປະຈຳການຖາວອນຢູ່ຟີລິບປິນ, ແຕ່ມີທະຫານພິເສດ 50-100 ຄົນໝູນວຽນໄປຊ້ອມຮົບທາງຕອນໃຕ້ຂອງຟີລິບປິນ.
ທາງການຟີລິບປິນຕັ້ງເປົ້າຈະຢຸດເຫດຍຶດເມືອງມາລາວີໃຫ້ໄດ້ພາຍໃນວັນທີ 12 ມິຖຸນານີ້ ເຊິ່ງເປັນວັນປະກາດເອກະລາດຈາກແອັສປາຍເມື່ອ 119 ປີກ່ອນ ຈົນເຖິງປັດຈຸບັນນີ້ຍັງມີກຸ່ມຕິດອາວຸດຢ່າງໜ້ອຍ 200 ຄົນ ລີ້ຊ້ອນຢູ່ເມືອງ, ມີປະຊາຊົນຄ້າງຢູ່ 500-1.000 ຄົນ ໂດຍບໍ່ມີອາຫານ, ນ້ຳ ແລະ ໄຟຟ້າໃຊ້. ປະຊາຊົນຫລາຍຄົນຖືກກຸ່ມຕິດອາວຸດໃຊ້ເປັນຕົວປະກັນ. ກຸ່ມມາອູເຕເປັນແກນນຳການກໍ່ເຫດ ໂດຍຈັບມືກັບທ້າວ ອິສນິລອນ ຮາປິລອນ ທີ່ກຸ່ມລັດອິສລາມ (IS) ແຕ່ງຕັ້ງໃນປີກ່ອນໃຫ້ເປັນເຈົ້າຜູ້ຄອງລັດໃນອາຊີຕາເວັນອອກສຽງໃຕ້.
