ກະ​ແສ​ໄຟຟ້າ​ມາ​ແຮງ​ແຊງ​ໂຄ​ວິດ-19

ກະ​ແສ​ໄຟຟ້າ​ມາ​ແຮງ​ແຊງ​ໂຄ​ວິດ-19 - 64 1 - ກະ​ແສ​ໄຟຟ້າ​ມາ​ແຮງ​ແຊງ​ໂຄ​ວິດ-19
ກະ​ແສ​ໄຟຟ້າ​ມາ​ແຮງ​ແຊງ​ໂຄ​ວິດ-19 - Untitled design - ກະ​ແສ​ໄຟຟ້າ​ມາ​ແຮງ​ແຊງ​ໂຄ​ວິດ-19

ໂດຍ: ທິດ​ກໍ່າ

ສຳລັບ​ຄໍ​ລຳ​ໃນ​ມື້ນີ້, ທິດ​ກໍ່າ ຂໍ​ເອົາ​ທີ​ເດັດ​ຈາກ​ກະ​ແສ​ສັງຄົມ​ກັບກ​ະ​ແສ​ໄຟຟ້າຢູ່​ບ້ານ​ເຮົາ​ມາ​ວິ​ເຄາະ, ​ເຈຍລະ​ໄນ​ສູ່​ກັນ​ຟັງ​ວ່າ​ ມັນ​ຈະ​ເຢັນ​ດັ່ງນ້ຳ ຫລື ຈະ​ຮ້ອນ​ດັ່ງ​ໄຟ ​ໃນ​ຖານະ​ທີ່​ປະ​ເທດ​ຊາດ​ຂອງ​ພວກ​ເຮົາ​ເປັນ​ປະ​ເທດ​ທີ່​ຜະລິດ​ກະ​ແສ​ໄຟຟ້າ​ສົ່ງ​ອອກ​ຈຳໜ່າຍ​ແຖວ​ໜ້າ​ຂອງ​ບັນດາ​ປະ​ເທດ​ອາ​ຊຽນກໍ​ວ່າ​ໄດ້. ​ເວົ້າ​ເລື່ອງ​ກະ​ແສ​ສັງຄົມ​ຕໍ່​ກັບ​ກະ​ແສ​ໄຟຟ້າ​ທີ່​ວ່າ​ມັນ​ແພງ ​ແລະ ພວມ​ມາ​ແຮງ​ຈົນ​ວ່າ​ແຊງ​ໂຄ​ວິດ-19 ​ໄປ​ແລ້ວ. ​ເມື່ອ​ເອີ່ຍ​ເຖິງ​ຄວາມ​ຂັດຂ້ອງ​ໝອງ​ໃຈ​ຂອງ​ປະຊາຊົນ​ຕໍ່​ກັບ​ບໍລິສັດ​ໄຟຟ້າ​ມັນ​ມີ​ສືບ​ຕໍ່ໆ​ກັນ​ມາ​ຫລາຍ​ປີ​ແລ້ວ. ຖ້າ​ຈະ​ຄິດ​ໄລ່​ຕາມ​ໄລຍະ​ປະຫວັດສາດ ມັນ​ກໍ​ເປັນ​ຫລາຍ​ທົດ​ສະ​ວັດ. ຕອນ​ປະ​ເທດ​ລາວ​ເຮົາ​ມີ​ແຕ່​ເຂື່ອນ​ເຊ​ລະບຳ​ກັບ​ເຂື່ອນ​ນ້ຳງື່ມ I ​ໃຜ​ກໍ​ບໍ່​ຄ່ອຍ​ໄດ້​ລໍ່າ​ລີ​ລໍ່າ​ໄລ​ນຳ​ບັນຫາ​ເລື່ອງ​ກະ​ແສ​ໄຟຟ້າ​ພໍ​ເທົ່າ​ໃດ. ສ່ວນ​ບັນດາ​ແຂວງ​ອື່ນ​ໆ​ທີ່​ບໍ່​ມີ​ເຂື່ອນ​ອຳນວຍ​ໃຫ້ ​ກໍ​ພຽງ​ແຕ່​ນຳ​ໃຊ້​ເຄື່ອງ​ຈັກ​ຂະໜາດ​ໃຫຍ່​ປັ່ນ​ພໍ​ໄດ້​ໃຊ້​ໃນ​ຂອບ​ເຂດ​​ເທດສະບານ, ຢູ່​ຊົນນະບົດ​ເກືອບ​ຮ້ອຍ​ເປີ​ເຊັນ​ແມ່ນ​​ໄຕ້​ມັງ​ຊົງ, ຕະກຽງ​ໃສ່​ນ້ຳມັນ​ກ໊າດ ຫລື ນ້ຳມັນ​ກາ​ຊວນ ​ແລະ ກະບອງ​ໄຕ້​ກໍ​ຖື​ວ່າ​ຂັ້ນສຸດ​ຍອດ​ຂອງ​ຊີວິດ.

ມາ​ຍຸກ​ນີ້, ​ໃນ​ເງື່ອນ​ໄຂ​ທີ່​ປະ​ເທດ​ຊາດ​ບ້ານ​ເມືອງ​ເຮົາ​ນັບ​ມື້ມີ​ການ​ສ້າງສາ​ພັດທະນາ​ດັ່ງ​ທຸກ​ວັນ​ນີ້, ບັນດາ​ເຂື່ອນ​ໄຟຟ້າ​ເກີດ​ຂຶ້ນປານ​ດອກ​ເຫັດ ຈົນ​ມີ​ສາຍາ​ນາມ​ວ່າ: ​ເປັນ​ໝໍ້​ໄຟ​ແຫ່ງ​ອາ​ຊຽນ, ທຸກ​ເມືອງ, ທຸກ​ບ້ານ, ທຸກ​ຄົວ​ເຮືອນ ​ໃຜ​ກໍ​ມີ​ໄຟຟ້າ​ໄຕ້​ຮ້ອຍ​ເປີ​ເຊັນ​ກັນ​ໝົດ​ແລ້ວ. ​ໃນ​ຖານະ​ທີ່​ປະ​ເທດ​ຊາດ​ມີ​ເຂື່ອນ​ໄຟຟ້າ​ຂະຫຍາຍຕົວ​ໄປ​ຕິກໆ​ຄື​ແນວ​ນີ້ ປະຊາຊົນ​ບັນດາ​ເຜົ່າ​ເຮົາ​ເຂົາ​ກໍ​ມີ​ຄວາມ​ມຸ້ງ​ຫວັງ ທັງ​ສະ​ເໜີ​ວ່າ​ຢາ​ກ​ໃຫ້​ຂັ້ນ​ເທິງ ກໍ​ຄື​ທາງ​ບໍລິສັດ​ໄຟຟ້າ​ມີ​ນະ​ໂຍບາຍ​ຜ່ອນຜັນ​ໃນ​ການ​ນຳ​ໃຊ້​ຄ່າ​ກະ​ແສ​ໄຟຟ້າ ກໍ​ຄື​ນະ​ໂຍບາຍ​ດ້ານ​ອື່ນ​ໆ​ທີ່​ເຫັນ​ວ່າ​ເໝາະ​ສົມ ​ໂດຍ​ສະ​ເພາະ​ແມ່ນ​ໃນ​ຊ່ວງ​ວິ​ກິດ ​ເໝືອນ​ດັ່ງ​ປະ​ເທດ​ອື່ນໆ​ທີ່​ເຂົາ​ມີ​ບາງ​ຢ່າງ​ເຊັ່ນ​ວ່າ: ປະ​ເທດ​ໃດ​ມີນ້ຳມັນ​ຫລາຍ ຄ່າ​ນ້ຳມັນ​ໃສ່​ລົດ​ມັນ​ກໍ​ຖືກ​ລົງ, ປະ​ເທດ​ໃດ​ມີ​ບໍ່​ເງິນ-ບໍ່​ຄຳ​ຫລາຍ ​ເຂົາ​ກໍ​ຂຸດ​ຄົ້ນຂຶ້ນມາ​ເອົາ​ໄປ​ຄ້ຳປະກັນ​ຢູ່​ທະນາຄານ​ໂລກ ​ເພື່ອ​ໃຫ້​ເງິນຕາ​ຂອງ​ຕົນ​ແຂງ​ຄ່າ ​ແລະ ອື່ນໆ. ທຸກ​ສິ່ງ​ທຸກ​ຢ່າງ​ທີ່​ກ່າວ​ມາ​ນີ້​ລ້ວນ​ແຕ່​ແມ່ນ​ນະ​ໂຍບາຍ ​ເພື່ອ​ຄົນ​ໃນ​ປະ​ເທດ​ຈະ​ໄດ້​ມີໜ້າ​ມີ​ຕາ​ເວົ້າອ້າງ​ໝູ່​ທີ່​ເຂົາ​ບໍ່​ມີ​ຄື​ບ້ານ​ເຮົາ. ກ່ຽວ​ກັບ​ການ​ບໍລິການ​ຂາຍ​ກະ​ແສ​ໄຟຟ້າ​ຢູ່​ບ້ານ​ເຮົາ​ມັນ​ກໍ​ບໍ່​ຕ່າງ​ຫຍັງ​ກັບ​ໄມ້ຄ້ຳກ້ວຍ ຫລື​ວ່າ ກ້ວຍຄ້ຳ​ໄມ້. ໝາຍວ່າ​ບໍລິສັດ​ໄຟຟ້າ​ເປັນ​ຜູ້​ບໍລິການ​ຈຳໜ່າຍ​ກະ​ແສ​ໄຟຟ້າ​ໃຫ້​ປະຊາຊົນ​ກໍ​ມີ​ລາຍ​ໄດ້​ຈາກ​ປະຊາຊົນ​ຢ່າງ​ມະຫາສານ. ປະຊາຊົນ​ໄດ້​ຮັບ​ການ​ບໍລິ​ໂພ​ກ​ໄຟຟ້າ​ດີ​ກໍ​ຍ້ອນ​ໄຟຟ້າ​ມີ​ການ​ພັດທະນາ​ຂະຫຍາຍຕົວ​ໄປ​ເລື້ອຍໆ. ລາຍ​ໄດ້​ມະຫາສານ​ຈາກ​ໄຟຟ້າ​ທັງ​ໝົດ​ກໍ​ແມ່ນ​ມາ​ຈາກ​ປະຊາຊົນ ຫລື ສັງຄົມ​ເປັນ​ຜູ້​ຊົ​ມ​ໃຊ້ ​ແລະ ສະໜັບສະໜູນ. ​ເພາະສະນັ້ນ ກໍ​ຕ້ອງ​ມີ​ການ​ເອື້ອອາທອນ​ຜ່ອນ​ສັ້ນຜ່ອນ​ຍາວ​ເຊິ່ງກັນ ​ແລະ ກັນ​ມັນ​ຈຶ່ງ​ມີ​ຄວາມ​ສະຫງົບ, ຍືນ​ຍົງ​ຄົງ​ກະ​ພັນ​ຕະຫລອດ​ໄປ.

​ແນວ​ໃດ​ກໍ​ຕາມ, ​ເທົ່າ​ທີ່​ເຄີຍ​ໄດ້​ຍິນ ​ແລະ ​ເຄີຍ​ເຫັນ​ສະພາບ​ຜ່ານ​ມາ ບໍລິສັດ​ໄຟຟ້າ​ໄດ້​ເອົາ​ລັດ​ເອົາ​ປຽບ​ປະຊາຊົນ​ບໍ່​ໜ້ອຍ​ເຊັ່ນ: ນອກຈາກ​ຄ່າ​ໄຟຟ້າ​ແພງ​ຂຶ້ນຕິກໆ​ແລ້ວ ພຶດຕິ​ກຳ​ການ​ບໍລິການ​ໃຫ້​ຄວາມ​ອົບ​ອຸ່ນ​​ແກ່​ຜູ້​ບໍລິ​ໂພ​ກກໍ​ບໍ່​ຄ່ອຍ​ຄັກ​ແນ່​ປານ​ໃດ, ພະນັກງານ​ເກັບ​ຄ່າ​ໄຟ​ເວົ້າບໍ່​ມ່ວນ, ບາງ​ຄັ້ງ​ເວົ້ານາບ​ຂູ່​ປະຊາຊົນ, ຕິດ​ໜີ້​ດ້າມ​ເດືອນ​ຈ່າຍ​ບໍ່​ທັນ​ເພິ່ນ​ກໍ​ມາ​ຕັດ, ​ເມື່ອ​ຊອກ​ເງິນ​ມາ​ໃຊ້​ໜີ້​ຄົບ​ຖ້ວນ​ແລ້ວ ​ເວລາ​ມາ​ໃສ່​ຄືນ​ກໍ​ຕ້ອງ​ໄດ້​ຈ້າງ​ເຂົ້າ​ໃໝ່. ການ​ຄິດ​ໄລ່​ຄ່າ​ກະ​ແສ​ໄຟຟ້າ​​ໃນ​ແຕ່ລະ​ເດືອນ​ກໍ​ບໍ່​ປົກກະຕິ ທັງໆ​ທີ່​ຜູ້​ຊົມ​ໃຊ້​ບາງ​ເດືອນ​ເຂົາ​ກໍ​ຮູ້. ສາ​ເຫດ​ກໍ​ຍ້ອນ​ເພິ່ນ​ຄິດ​ໄລ່​ແບບ​ກະ​ຕວງ ​ແລະ ຍັງ​ມີ​ປາກົດການ​ຫຍໍ້​ທໍ້​ອື່ນໆ​ໃນ​ໜ້າ​ທີ່​ບໍລິການ​ຂອງ​ພະນັກງານ​ບໍລິສັດ​ໄຟຟ້າ. ສະນັ້ນ ບັນຫາ​ເລື່ອງ​ຄ່າ​ກະ​ແສ​ໄຟຟ້າ​ແພງ​ຈຶ່ງ​ເປັນ​ປະ​ເດັນ​ທີ່​ກືນ​ບໍ່​ເຂົ້າຄາຍ​ບໍ່​ອອກ​ ​ເປັນ​ຊຳ​ເຮື້ອມາ​ຕະຫລອດ​ຈົນ​ທຸກ​ວັນ​ນີ້. ພໍ​ຕົກ​ມາ​ຮອດ​ທ້າຍ​ປີ 2019 ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດ​ ຊຸດ​ທີ VIII ກໍ​ມີ​ຂ່າວ​ຢືນຢັນ​ວ່າ​ທາງ​ການ​ຈະ​ມີ​ນະ​ໂຍບາຍ​ຫລຸດ​ຄ່າ​ກະ​ແສ​ໄຟຟ້າ​ຕໍ່​ປະຊາຊົນ​ຜູ້​ທຸກ​ຍາກ​ເຖິງ 50%. ​ເມື່ອ​ກະ​ແສ​ຂ່າວ​ນີ້​ອອກ​ມາ ​ໃຜ​ກໍ​ດີ​ໃຈ​ ທັງ​ລໍ​ຄອຍ​ວັນ​ເວລາ​ມາ​ເຖິງ. ການ​ເວລາ​ໄດ້​ແກ່ຍາວ​ມາ​ຈົນ​ຮອດ​ກາງ​ເດືອນ​ພຶດສະພາ 2020 ຈຶ່ງ​ເຫັນ​ທາງ​ບໍລິສັດ​ໄຟຟ້າ​ນະຄອນ​ຫລວງ​ແຈ້ງ​ເຖິງ​ລະບົບ​ການ​ຄິດ​ໄລ່​ຄ່າ​ກະ​ແສ​ໄຟຟ້າ​ແບບ​ໃໝ່​ວ່າມີ​ຜູ້​ຂຶ້ນຜູ້ລົງ ​ເຊັ່ນວ່າ​ກຸ່ມ​ຄົນ​ທີ່​ໄດ້​ໃຊ້​ໄຟຟ້າ​ບໍ່​ເກີນ 150 ກິ​ໂລ​ວັດ​ໂມງ ​ແມ່ນ​ຫລຸດ​ເຖິງ 50%, ສ່ວນ​ຜູ້​ໃຊ້​ເກີນ​ກວ່າ​ແມ່ນ​ເພີ່ມ​ຂຶ້ນ ​ແລະ ຜູ້​ໃຊ້​ເກີນ 500 ຫລື 1.000 ຂຶ້ນ​ເມືອ ພັດ​ມີ​ທ່າ​ອ່ຽງຫລຸດ​ລົງ​ໜ້ອຍ​ໜຶ່ງ ຈຶ່ງ​ເປັນ​ເຫດ​ໃຫ້​ກະ​ແສ​ສັງຄົມ​ຮື​ຮາ​ກັນ​ວິຈານ​ບໍ່ໜ້ອຍ.

ກະ​ແສ​ໄຟຟ້າ​ມາ​ແຮງ​ແຊງ​ໂຄ​ວິດ-19 - Wave100S AD to Website 2020 0 - ກະ​ແສ​ໄຟຟ້າ​ມາ​ແຮງ​ແຊງ​ໂຄ​ວິດ-19

ຕໍ່​ບັນຫາ​ດັ່ງກ່າວ, ຈຶ່ງ​ຢາ​ກ​ໃຫ້​ບໍລິສັດ​ໄຟຟ້າ​ຄຳນຶງ​ເບິ່ງ​ໃນ​ຄຳ​ວ່າ: ນະ​ໂຍບາຍ​ຕໍ່​ຜູ້​ທຸກ​ຍາກ ​ແມ່ນ​ຄຳ​ເວົ້າ​ແບບ​ກວມ​ກວມ ບໍ່​ໄດ້​ສະ​ເພາະ​​ເຈາະ​ຈົງ​ແຕ່​ບາງ​ກຸ່ມ​ຄົນ​ທີ່​ໄດ້​ຮັບ​ຜົນ​ປະ​ໂຫຍ​ດ. ​ເວົ້າ​ແຈ້ງ​ກໍ​ຄື ຖານະ​ຂອງ​ປະ​ເທດ​ເຮົາ​ປັດຈຸບັນ​ແມ່ນ​ຢູ່​ໃນ​ໄລຍະ​ທຸກ​ຍາກ ​ແລະ ດ້ອຍ​ພັດທະນາ ທັງ​ໝົດ​ຍັງ​ບໍ່​ທັນ​ພົ້ນທຸກ​ໄດ້​ເທື່ອ. ສະນັ້ນ ການ​ຄິດ​ໄລ່​ຄ່າ​ກະ​ແສ​ໄຟຟ້າ​ຈະ​ຂຶ້ນ ຫລື ລົງ ມັນ​ກໍ​ແມ່ນ​ທົ່ວ​ສັງຄົມ​ໄດ້​ຮັບ​ຜົນ​ປະ​ໂຫຍ​ດຮ່ວມ​ກັນ ຫາກ​ບໍ່​ແມ່ນ​ສະ​ເພາະ​ແຕ່​ກຸ່ມ​ໃດ​ກຸ່ມ​ໜຶ່ງ​ເທົ່າ​ນັ້ນ.

​ເຖິງ​ຢ່າງ​ໃດ​ກໍ​ດີ, ຕໍ່​ສະພາບ​ການ​ວຸ້ນວາຍຄ່າ​ກະ​ແສ​ໄຟຟ້າ​ທີ່​ຍັງ​ບໍ່​ແລ້ວ​ບໍ່​ທົ່ວ ທ່ານ​ນາຍົກລັດຖະມົນຕີ ທອງ​ລຸນ ສີ​ສຸ​ລິດ ຈຶ່ງ​ໄດ້​ມີ​ຄຳ​ສັ່ງ​ໃຫ້​ກວດຄືນ​ໃໝ່ ​ເພື່ອ​ຄວາມ​ເປັນ​ທຳ​ຢ່າງ​ຈະ​ແຈ້ງ​ຕໍ່​ທຸກ​ຄົນ ຈຶ່ງ​ຂໍ​ໃຫ້​ພວກ​ເຮົາ​ອຸ່ນ​ອ່ຽນ​ທຸ່ນ​ທ່ຽງ. ທຸກ​ສິ່ງ​ທຸກ​ຢ່າງ​ທີ່​ພັກ-ລັດ​ເຮົາ​ນຳພາກໍ​ເພື່ອ​ຄວາມ​ສົມບູນ​ພູນ​ສຸກ​ຂອງ​ປະຊາຊົນ. ດັ່ງ​ຄຳ​ວ່າ: ພັກ​ນຳພາ, ລັດ​ຄຸ້ມ​ຄອງ, ປະຊາຊົນ​ເປັນ​ເຈົ້າຂອງ​ປະ​ເທດ​ຊາດ ນັ້ນ​ແລ !.

ກະ​ແສ​ໄຟຟ້າ​ມາ​ແຮງ​ແຊງ​ໂຄ​ວິດ-19 - WhatsApp Image 2020 05 27 at 5 - ກະ​ແສ​ໄຟຟ້າ​ມາ​ແຮງ​ແຊງ​ໂຄ​ວິດ-19
ກະ​ແສ​ໄຟຟ້າ​ມາ​ແຮງ​ແຊງ​ໂຄ​ວິດ-19 - WhatsApp Image 2020 05 27 at 5 - ກະ​ແສ​ໄຟຟ້າ​ມາ​ແຮງ​ແຊງ​ໂຄ​ວິດ-19
  • 1095 Posts
  • 0 Comments
iLike/LPN/20
error: Alert: ເນື້ອຫາຂ່າວມີລິຂະສິດ !!