ບົດຮຽນ​ການ​ປົກ​ປ້ອງ​ສິດທິ ​ແລະ ການ​ສົ່ງ​ເສີມສະຫວັດ​ດີພາບ​ຂອງ​ເດັກນ້ອຍ

ບົດຮຽນ​ການ​ປົກ​ປ້ອງ​ສິດທິ ​ແລະ ການ​ສົ່ງ​ເສີມສະຫວັດ​ດີພາບ​ຂອງ​ເດັກນ້ອຍ - Untitled design - ບົດຮຽນ​ການ​ປົກ​ປ້ອງ​ສິດທິ ​ແລະ ການ​ສົ່ງ​ເສີມສະຫວັດ​ດີພາບ​ຂອງ​ເດັກນ້ອຍ

ໂດຍ: ວິ​ເສດ ສະ​ແຫວ​ງສຶກສາ

ໜຶ່ງ​ໃນ​ຫລາຍໆ​ເຫດການ​ທີ່​ມີ​ຄວາມ​ໝາຍ​ສຳຄັນ​ໃນ​ເດືອນ​ມິຖຸນາ​ຂອງ​ທຸກໆ​ປີ ກໍ​ຄື​ວັນ​ເດັກ​ສາກົນ ​ເຊິ່ງກໍ​ຖືກ​ກຳນົດ​ໃຫ້​ເປັນ​ວັນ​ເດັກ​ແຫ່ງ​ຊາດ​ລາວ​ເຊັ່ນ​ກັນ. ​ເພື່​ອ​ໃຫ້​ເຫັນ​ຄວາມ​ສຳຄັນ​ຂອງ​ວັນ​ດັ່ງກ່າວ, ຜູ້​ຂຽນ​ໄດ້​ສັງ​ລວມ+​ເອົາ​ຂ່າວ​ກ້ອມໆ​ກ່ຽວ​ກັບ​ນະ​ໂຍບາຍ ກໍ​ຄື​ມາດ​ຕະການ​ປົກ​ປ້ອງ​ສິດ ​ແລະ ສົ່ງ​ເສີມ​ສະຫວັດ​ດິພາບ​ຂອງ​ເດັກໆ​ໃນ 5 ປະ​ເທດ.

ຂໍ​ເລີ່​ມຈາກ​ປະ​ເທດ​ກຳປູ​ເຈຍ, ຂ່າວ​ໃນຕົ້ນ​ເດືອນ​ມັງກອນ​ປີ​ນີ້​ໃຫ້​ຮູ້​ວ່າ: ທາງ​ການ​ກຳປູ​ເຈຍ​ໄດ້​ເລີ່​ມຂະ​ບວນ​ໂຄສະນາ​ກ່ຽວ​ກັບ​ຄວາມ​ປອດ​ໄພ​ດ້ານ​ອາຫານ​ຢູ່​ຕາມ​ໂຮງຮຽນ​ຕ່າງໆ​ໃນ​ຂອບ​ເຂດ​ທົ່ວ​ປະ​ເທດ ​ແນ​ໃສ່​ຮັບປະກັນ​ຄຸນຄ່າ​ທາງ​ໂພຊະ​ນາ​ການ, ຄວາມ​ປອດ​ໄພ ​ແລະ ຄຸນ​ນະພາ​ບຂອງ​ອາການ​ສຳລັບ​ເດັກ​ນັກຮຽນ. ຂະ​ບວນການ​ໂຄສະນາ​ໄດ້​ເລີ່​ມຂຶ້ນທີ່​ໂຮງຮຽນ​ປະຖົມ​ພໍ​ນໍຣະດົມ ຢູ່​ເຂດ​ດອນ​ເປັນ​ຂອງ​ນະຄອນຫລວງ​ພະນົມ​ເປັນ.

ຂ່າວ​ໃຫ້​ຮູ້​ຕື່ມ​ວ່າ: ກ່ອນ​ໜ້າ​ມີ​ຂະ​ບວນການ​ດັ່ງກ່າວ, ທາງ​ກະຊວງ​ສຶກສາ​ທິການ, ​ເຍົາວະ​ຊົນ ​ແລະ ກິລາ​ຂອງ​ກຳປູ​ເຈຍ ຍັງ​ໄດ້​ອອກ​ຄຳ​ສັ່ງ​ຫ້າມ​ຈຳໜ່າຍ​ອາຫານ-​ເຄື່ອງ​ດື່ມ​ 6 ປະ​ເພດ​ຕາມ​ໂຮງຮຽນ​ວັດ ​ແລະ ​ເອກະ​ຊົນ ​ເຊິ່ງ​ໄດ້​ແກ່: ​ເຄື່ອງ​ດື່ມ​ທີ່​ມີ​ທາດ​ເຫລົ້າ, ຜະລິດ​ຕະພັນ​ທີ່​ມີ​ທາດ​ນິ​ໂກຕິ​ນ, ອາຫານ​ທີ່​ບໍ່​ບອກ​ແຫ​ລ່ງຜະລິດ, ​ເຄື່ອງ​ດື່ມ​ຊູ​ກຳລັງ, ອາຫານ​ທີ່​ມີ​ທາດ​ຫວານ​ເກີນ​ໄປ ​ແລະ ​ເຄື່ອງ​ດື່ມ​ທີ່​ສ່ຽງ​ເປັນ​ພະຍາດ​ຕຸ້ຍ (ທາດ​ນ້ຳຕານ​ສູງ).

ທີ່​ປະ​ເທດ​ອີຣານ ກໍ​ມີ​ຂ່າວ​ວ່າ: ທາງ​ການ​ຂອງ​ປະ​ເທດ​ນີ້​ຫ້າມ​ນຳ​ໃຊ້​ເຄືອ​ຂ່າຍ​ສື່​ສັງຄົມ​ອອນ​ລາຍ​ຂອງ​ຕ່າງປະ​ເທດ​ພາຍ​ໃນ​ໂຮງຮຽນ​ຢ່າງ​ເດັດຂາດ. ກະຊວງ​ສຶກສາ​ອີຣານ ​ໄດ້​ປະກາດ​ຢ່າງ​ຈະ​ແຈ້ງວ່າ: ​ໂຮງຮຽນ​ທຸກໆ​ແຫ່ງ​ຕ້ອງ​ນຳ​ໃຊ້​ເຄືອ​ຂ່າຍ​ສື່​ສັງຄົມ​ຂອງ​ພາຍ​ໃນ​ປະ​ເທດ​ເທົ່າ​ນັ້ນ. ພາຫະນະ​ສື່​ສັງຄົມ​ອອນ​ລາຍ​ຂອງ​ຕ່າງປະ​ເທດ​ທີ່​ນິຍົມ​ກັນ​ໃຊ້​ໃນ​ອີຣານ​ແມ່ນ​ອິນ​ສະຕາ​ແກຣມ ​ແລະ ​ແອັບ, ສ່ວນ​ເຟດບຸກ ​ແລະ ທະວິ​ດ​ເຕີນັ້ນມີ​ຄົນ​ໃຊ້​ໜ້ອຍ ​ເພາະ​ມີ​ການ​ຈຳກັດ. ​

ເຫດຜົນ​ທີ່​ຫ້າມ​ນຳ​ໃຊ້​ເຄືອ​ຂ່າຍ​ສື່​ສັງຄົມ​ຂອງ​ຕ່າງປະ​ເທດ​ຢູ່​ຕາມ​ໂຮງຮຽນ ​ແລະ ສະຖານ​ທີ່​ສຶກສານັ້ນກໍ​​ແມ່ນ​ເພື່ອ​ປ້ອງ​ກັນ​ບໍ່​ໃຫ້​ເດັກ​ນັກຮຽນ​ເສບ​ຕິດ​ສື່​ທີ່​ບໍ່​ຫວັງ​ດີ​ກັບ​ອີຣານນັ້ນ​ເອງ. ຕໍ່​ໄປ​ແມ່ນ​ຂ່າວ​ດີ​ຈາກ​ສິງກະ​ໂປ​ທີ່​ບອກ​ວ່າ: ທາງ​ການ​ສິງກະ​ໂປ​ມີ​ນະ​ໂຍບາຍ​ຕໍ່​ຜູ້​ເປັນ​ພໍ່​ທັງຫລາຍ​ທີ່​ເຮັດ​ໜ້າ​ທີ່​ເບິ່ງ​ແຍງ​ລູກ​ຮ່ວມ​ກັບ​ຜູ້​ເປັນ​ເມຍ. ນະ​ໂຍບາຍ​ທີ່​ວ່າ​ນັ້ນ ກໍ​ຄື​ການ​ອະນຸຍາດ​ໃຫ້​ຜູ້​ຊາຍ​ທີ່​ເປັນ​ພໍ່​ລູກ​ອ່ອນ​ສາມາດ​ພັກ​ວຽກ​ຕາມ​ຄວາມ​ສະໝັກ​ໃຈ​ໄດ້​ຫລາຍ​ກວ່າ 2 ອາທິດ (ທີ່​ເຄີຍ​ປະຕິບັດ​ມາ​ແມ່ນ 2 ອາທິດ) ​ເພື່ອ​ເບິ່ງ​ແຍງ​ເມຍ​ຢູ່ກຳ ຫລື ຊ່ວຍ​ວຽກ​ເຮືອນ​ການ​ຊານ​ເວລາ​ເມຍ​ມີ​ລູກນ້ອຍ.

ຢູ່ ສປ ຈີນ ​ເມື່ອ 5 ປີ​ຢ້ອນ​ຫລັງ, ສະພາ​ປະຊາຊົນ​ແຫ່ງ​ຊາດ​ຈີນ ​ໄດ້​ຮັບຮອງ​ເອົາ​ກົດໝາຍ​ຕໍ່​ນັກ​ໂທດຜູ້​ທີ່​ໃຊ້​ບໍລິການ​ໂສ​ເພນີ​ທີ່​ມີ​ອາຍຸ​ຕໍ່າ​ກວ່າ 14 ປີ ດ້ວຍ​ການ​ລົງ​ໂທດ​ຈຳ​ຄຸກ​ສູງ​ສຸດ 15 ປີ, ສ່ວນ​ໂທດ​ສູງ​ສຸດ​ຕໍ່​ຄະດີ​ຂົ່ມຂືນ​ເດັກນ້ອຍ​ນັ້ນ ກໍ​ຄື​ໂທດ​ປະຫານ​ຢ່າງ​ດຽວ. ຜູ້​ຂຽນ​ຂໍ​ປິດ​ທ້າຍ​ກັບ​ຂ່າວ​ການ​ຊົດ​ເຊີຍ​ຕໍ່​ເດັກ​ນັກຮຽນ​ທີ່​ຖືກ​ລະ​ເມີດ​ສິດ​ຢູ່ ສ.ອາ​ເມ​ລິ​ກາ.

ຂ່າວ​ບອກ​ວ່າ: ນັກຮຽນ​ມັດທະຍົມ​ຄົນ​ໜຶ່ງ (ບໍ່​ບອກ​ຊື່) ທີ່​ລັດ​ກາລີ​ຟໍ​ເນຍ ​ໄດ້​ຮ້ອງ​ຟ້ອງ​ຕໍ່​ສານ​ເພື່ອ​ທວງ​ຄ່າ​ຊົດ​ເຊີຍ​ເປັນ​ເງິນ​ຈຳນວນ 25.000 ​ໂດ​ລາ​ສະຫະລັດ ຍ້ອນ​ຕົນ​ຖືກ​ນາຍຄູ​ຫ້າມ​ບໍ່​ໃຫ້​ໄປ​ຫ້ອງ​ນ້ຳ​ເພື່ອ​ຖ່າຍ​ເບົາ ​ໂດຍ​ຄູ​ໄດ້​ອ້າງ​ວ່າ: ກົດ​ລະບຽບ​ຂອງ​ໂຮງຮຽນ​ບໍ່​ອະນຸຍາດ​ໃຫ້​ນັກຮຽນ​ໄປ​ຫ້ອງ​ນ້ຳ​ເວລາ​ບົດຮຽນ​ພວມ​ດຳ​ເນີນ​ຢູ່. ຄູ​ໄດ້​ບອກ​ໃຫ້​ນັກຮຽນ​ຜູ້​ຮ້ອງທຸກ ​ເຊິ່ງ​ເວລາ​ນັ້ນມີ​ອາຍຸ 14 ປີ ຍ່ຽວ​ໃສ່​ຄຸ​ເຊິ່ງຕັ້ງຢູ່​ແຈ​ຫ້ອງ​ຮຽນ​ພາຍ​ໃນ​ຫ້ອງ. ​ເຫດການ​ໃນ​ຄັ້ງນັ້ນ​ໄດ້​ເຮັດ​ໃຫ້​ນັກຮຽນ​ຄົນ​ດັ່ງກ່າວ​ອັບອາຍ​ຂາຍໜ້າ ຍ້ອນ​ຖືກ​ໝູ່​ຮ່ວມ​ຫ້ອງ​ເວົ້າ​ເຢີ້ຍສຽດ​ສີ​ຢອກ​ລໍ້ ຈົນ​ຜູ້ກ່ຽວ​ມີ​ບັນຫາ​ຊຶມ​ເສົ້າ. ຂ່າວ​ນີ້​ບອກ​ວ່າ: ນັກຮຽນ​ຜູ້​ຮ້ອງທຸກ​ໄດ້​ຮັບ​ການ​ຊົດ​ເຊີຍ​ຈາກ​ທາງ​ໂຮງຮຽນ​ສູງ​ເຖິງ 1,25 ລ້ານ​ໂດ​ລາ​ສະຫະລັດ ​ແທນ​ທີ່​ຈະ​ເປັນ 25.000 ​ໂດ​ລາ ຕາມ​ທີ່​ສະ​ເໜີ ຍ້ອນ​ທາງ​ສານ​ເຫັນ​ວ່າ “​ເປັນ​ຄະດີ​ລະ​ເມີດ​ສິດທິ​ມະນຸດ ​ໂດຍ​ສະ​ເພາະ​ເດັກ​ທີ່​ຮ້າຍ​ແຮງ​ໜັກໜ່ວງ”.

 

ບົດ​ນີ້​ອີງ​ໃສ່​ຂໍ້​ມູນ​ຈາກ: ໜັງສືພິມ ປະ​ເທດ​ລາວ         9/1/20       (​ເລື່ອງ​ກຳປູ​ເຈຍ)

ບົດຮຽນ​ການ​ປົກ​ປ້ອງ​ສິດທິ ​ແລະ ການ​ສົ່ງ​ເສີມສະຫວັດ​ດີພາບ​ຂອງ​ເດັກນ້ອຍ - Wave100S AD to Website 2020 0 - ບົດຮຽນ​ການ​ປົກ​ປ້ອງ​ສິດທິ ​ແລະ ການ​ສົ່ງ​ເສີມສະຫວັດ​ດີພາບ​ຂອງ​ເດັກນ້ອຍ

The Nation        17/4/8       (​ເລື່ອງ​ອີຣານ)

Vientiane Times   12/6/17     (​ເລື່ອງ​ສິງກະ​ໂປ)

Vientiane Times   26/9/15     (​ເລື່ອງ​ຈີນ)

The Nation        28/1/17     (​ເລື່ອງ​ອາ​ເມ​ລິ​ກາ)

ບົດຮຽນ​ການ​ປົກ​ປ້ອງ​ສິດທິ ​ແລະ ການ​ສົ່ງ​ເສີມສະຫວັດ​ດີພາບ​ຂອງ​ເດັກນ້ອຍ - WhatsApp Image 2020 05 27 at 5 - ບົດຮຽນ​ການ​ປົກ​ປ້ອງ​ສິດທິ ​ແລະ ການ​ສົ່ງ​ເສີມສະຫວັດ​ດີພາບ​ຂອງ​ເດັກນ້ອຍ
ບົດຮຽນ​ການ​ປົກ​ປ້ອງ​ສິດທິ ​ແລະ ການ​ສົ່ງ​ເສີມສະຫວັດ​ດີພາບ​ຂອງ​ເດັກນ້ອຍ - WhatsApp Image 2020 05 27 at 5 - ບົດຮຽນ​ການ​ປົກ​ປ້ອງ​ສິດທິ ​ແລະ ການ​ສົ່ງ​ເສີມສະຫວັດ​ດີພາບ​ຂອງ​ເດັກນ້ອຍ
error: Alert: ເນື້ອຫາຂ່າວມີລິຂະສິດ !!